Kozanya ibirenge, Umutsima (Gateau) mu mabara y’ubururu n’umweru arimo izina rya Rayon Sports n’amazina y’Abageni, ni byo by’ingenzi byaranze ubukwe bw’umuyobozi w’ikinyamakuru Indatwa.

Mu cyumweru gishize, ku wa 26 Ukuboza 2013, Umuyobozi mukuru w’ikinyamakuru Indatwa Byiringiro Jean Elysee yashyingiranwe n’umwarimukazi Uwizeyimana Marie Aime imbere y’Imana muri Kiliziya kwa Kalori Lwanga i Nyamirambo.

Muri uyu muhango hakaba haragaragayemo ibintu bitari bisanzwe bimenyerewe muri Kiliziya Gatolika, umuhango wo kozanya ibirenge hagati y’abageni Byiringiro Jean Elysee na Uwizeyimana Marie Aimee. Ubusanzwe uyu muhango wo kozanya ibirenge ukaba umenyerewe mu yandi madimi, ariko cyane cyane ku munsi ubanziriza Pasika.

Ikindi kitari kimenyerewe n’abantu benshi ni umutsima wateguriwe abageni wari wari ushushanyijeho ibirango by’ikipe ya Rayon Sports ndetse handitseho n’ayo mazina yayo, abangikanye n’ay’abageni. Uwo mutsima wose wari ukozwe mu mabara ya Rayon Sports.

Ibyo gukoresha umutsima ukozwe mu mabara ya Rayon Sports, Byiringiro atangaza ko ari uko we n’umugore we ari abakunzi b’akadasohoka b’iyo kipe, kandi bombi bavuka mu karere ka Nyanza.

[email protected]