Iki gitaramo cyabaye ku mugoroba wo kuri uyu wa 22 Ukuboza, cyabereye mu mujyi wa Kigali rwagati muri gace kahariwe abanyamaguru kazwi nka ‘Car Free Zone’.

Ku bufatanye bw’Umujyi wa Kigali na Minisiteri y’Umuco na Siporo, bateguye iki gitaramo mu rwego rwo kwifuriza abatuye umurwa mukuru w’u Rwanda, Noheli nziza n’Umwaka mushya muhire wa 2019.

Iki gitaramo cyatangiye saa kumi, abari bakizi bari babukereye n’abandi bihitiraga batazi ibyabaye babanzaga bagatereraho akajisho bagakomeza, abadafite izindi gahunda bagashinga ingando bagakomeza gutarama.

Itorero ry’intore mu biruhuko (abanyeshuri bari mu biruhuko batojwe kubyina bya Kinyarwanda), berekanye ubuhanga mu gukaraga umubyimba n’imihamirizo ku buryo batanga icyizere ko bazavamo intore zikomeye z’ejo hazaza.

Si intore mu biruhuko gusa kuko hari itorero ry’Umujyi wa Kigali, Indatirwabahizi, Itorero ry’igihugu Urukerereza, ryasusurukije imbaga yari iteraniye aho mu mbyino zabo nka Benimana, Bagorebeza, imihamirizo iryoheyeje ijisho y’intore ziyobowe na Semanza.

Abahanzi basimburanye mu ndirimbo z’umuco gakondo barimo Masamba na Muyango washimishije abakiri bato mu ndirimbo ye ‘Sabizeze.

Christopher umuhanzi rukumbi uririmba indirimbo z’iki gihe wari watumiwe, yafashije abari batwawe no kureba imihamirizo gusimbuka mu ndirimbo ze nka ‘Agatima’, Birahagije, Uwo munsi n’izindi.

Jules Sentore mu ndirimbo zirimo umudiho gakondo uvuguruye niwe wasoje mu igitaramo abyinana n’urubyiruko rwari aho indirimbo ze nka Diarabi, Kora Akazi, Udatsikira, Warakoze n’izindi.

Umuyobozi w’Umujyi wa Kigali Ushinzwe Ubukungu, Busabizwa Parfait, yavuze ko abanyarwanda bafite impamvu yo kwishima, ari nayo mpamvu buri gihembwe hazajya haba igitaramo nk’iki.

Yagize ati “Ni iki cyabuza abanyarwanda kwishima? Dufite igihugu cyiza, umutekano urahari. Buri gihembwe tuzajya tubazanira abahanzi babataramire, mwishime.”

Minisitiri w’Umuco na Siporo, Nyirasafari Espérance, yashimiye byimazeyo ababyeyi bemereye abana babo kwitabira gahunda y’intore mu biruhuko, anasezeranya ko aba bana bazakomeza kwitabwaho kugira ngo bazavemo intore zizihiye u Rwanda.

Indatabigwi z'Umujyi wa Kigali mu mbyino zo ku Nkombo

Indatirwabahizi zibyina Ikinimba

Intore mu biruhuko mu cyiciro cy'abagimbutse bamenye kuvuna sambwe

Ababyinnyi b'urukerereza baragororotse

Abakaraza berekanye ubuhanga mu kuvuza ingoma

Abangavu bo mu itorero ry'intore mu biruhuko bashimiwe

Abanyeshuri biga mu mashuri abanza bigishijwe kubyina bya kinyarwanda

Car Free Zone yari irimo abantu benshi

Gahunda y'intore mu biruhuko yatumye abakiri bato bakunda umuco nyarwanda

Gukaraga umubyimba barabimenyereye

Imbyino zigaragaza umuco nyarwanda zerekanywe

Intore z'ejo hazaza zigwa mu nka

Intore z'Urukerereza ziva mu ngamba

Masamba ari ku rubyiniro

Masamba yeretswe ko urubyiruko rwiyumva mu ndirimbo ze

Mu muhanda rwagati niho igitaramo cyabereye

Semanza umwe mu bahanga babyina mu Itorero ry'Igihugu Urukerereza

Ubuhanga bw'aba bana bwatumye Minisiteri y'umuco na siporo yiyemez kubitaho

Ubwitabire muri iki gitaramo bwari bushimishije

Umuyobozi wungirije w'Umujyi wa Kigali na Minisitiri Nyirasafari bishimiye imyiyereko y'intore