Umuryango w’urubyiruko rw’Abayisilamu ugamije iterambere “AJMD - Njye Nawe” wahaye abanyeshuri bari mu biruhuko ibiganiro bibafasha kwiyubaka no kubaka igihugu bagendeye ku mateka u Rwanda rwanyuzemo.

Muri iki kiruhuko gisoza igihembwe cya mbere cy’umwaka w’amashuri, kinaba kinahurirana n’igihe cy’icyumweru cyahariwe kwibuka Jenoside yakorewe Abatutsi, urubyiruko rw’Abayisilamu bibumbiye mu kitwa AJMD - Njye Nawe (Association des Jeunes Musulmans pour le Developpement) bageneye abanyeshuri ibiganiro by’iminsi itatu byibanda ku kubigisha amateka y’u Rwanda no kubereka ibibazo bahura nabyo mu buzima n’uburyo babyirinda.

Muri ibyo biganiro byatangiye ku wa gatatu tariki 17 Mata i Gikondo, batangiye barebera hamwe icyo ‘Kwigira’ bivuga n’uburyo urubyiruko rugomba gutangira kwigira ngo rwiteze imbere. Ku wa kane tari 18 Mata barebaye hamwe ibibazo bikunda kugariza urubyiruko n’uburyo babyirinda mu rwego rwo kwamaganira kure ingaruka zabyo, maze basoza ku wa gatanu tariki 19 Mata bajyanwa gusura urwibutso rwa Jenoside rwa Kigali ku Gisozi kwiga no kwirebera birambuye ibyaranze amateka y’u Rwanda.

Aganira na IGIHE, Hakizimana Ismail, umuyobozi wa AJMD - Njye Nawe, yagize ati: “Nk’uko umuryango wacu ugamije kuzamura imibereho y’Abanyarwanda muri rusange n’uw’Abayisilamu by’umwihariko, aho dutegura ibikorwa bitandukanye binyuriye mu rubyiruko n’abari n’abategarugori, buri biruhuko tugenera abanyeshuri bose ibiganiro, ubu tukaba twarabaganiriye ku kwigira mu rubyiruko, tuganira ku bibazo biza byugarije urubyiruko muri iki gihe cy’ikusanyabukungu, hanyuma uyu munsi tuzana urwo rubyiruko gusura urwibutso rwa Gisozi kugira ngo basobanukirwe byimazeyo amateka y’u Rwanda, dore ko abenshi jenoside batanayibonye.”

Yunga mu rya Hakizimana, Uwineza Imani Josiane, uzwi ku izina rya Miss jojo umwungirije, yagize ati: “Iki gikorwa twagiteguriye urubyiruko rwiga rwose rutari n’urw’Abayisilamu gusa, mu rwego rwo kubaba hafi mu gihe cy’ibiruhuko maze tukagira ibyo tubungura mu buzima bwa buri munsi, aho kugira ngo birirwe bata umwanya dore ko ari naho bahurira n’ibigusha byinshi, gusa ntiturabona uburyo bwo guhuza benshi, kuko ubu twabashije guhuza abana 60 gusa.”

Umwamikazi Sharifa Jolie, umwe mu bakurikiye ibyo biganiro yagize ati: “Byaradushimishije cyane kuko twungukiyemo byinshi, tubona uburyo tugomba gushingira ku mateko u Rwanda rwaciyemo, maze tugaharanira kwigira twiteza imbere. Twakunze cyane ko batwigishije ibintu byose bijyanye n’igihe turimo, batwereka ububi bw’ibiyobyabwenge, urugomo , kwishora mu busambanyi bushobora gukururira umuntu kwandura virusi itera SIDA, maze batwigisha n’uburyo bwo kubyiri. Ikindi kandi, kuza aha byatweretse uburyo Abatutsi bicanywe ubugome bw’indengakamere, bikaba ari ibintu byo kwamganwa rwose.”

AJMD - Njye Nawe (Association des Jeunes Musulmans pour le Developpement), ni umuryango w’urubyiruko rw’abayoboke b’idini ya Islam bishyize hamwe kugira ngo bagire uruhare mu iterambere ry’igihugu, bakaba barahereye mu karere ka Kicukiro ariko bafite intego yo kwagura ibikorwa byabo.

Amafoto:

Munezero Clementine ushinzwe Imibereho myiza n'Ubukungu muri AVEGA atanga isomo ryo 'Kwigira'

Bababanje gusobanurirwa imiterere y'urwibutso rwa Jenoside rwa Kigali

Miss Jojo yarari mu baherekeje abana, akaba ari n'umuyobozi wungirije wa AJMD

Hakizimana Ismail, umuyobozi wa AJMD

Sheikh Nshimiyimana Radjaab, umuyobozi w'Abayisilamu mu karere ka Kicukiro

Bunamiye inzirakarengane

Basabiye inzirakarengane

Batambagijwe inzu igaragaza amateka ya Jenoside

Umwamikazi Sharifa Jolie yashimishijwe n'ibiganiro bahawe

Basoza ibiganiro, bafashe ifoto y'urwibutso