Kuri uyu wa Gatanu Tariki 13 Nyakanga 2012 guhera saa kumi n’imwe z’umugoroba mu ihema ry’Igicumbi cy’umuco riherereye muri Stade Amahoro hazabera igitaramo cyo kwibuka Umwami w’Inanga ariwe Sentore Athanase.

Iki gitaramo cyateguwe n’umuryango n’inshuti ba Nyakwigendera, babifashijwemo n’ikigo cy’umuco cy’Abadage “Goethe-Institut”, Positive Productions ndetse n’abahanzi Nyarwanda.

Cyateguwe hagamijwe kwerekana urukundo n’icyubahiro bikwiye umuhanzi w’intangarugero, wagiriye akamaro kanini muzika Nyarwanda (gakondo).

Muri iki gitaramo hazataramiramo abahanzi Nyarwanda batandukanye, hatangirwemo ubutumwa butandukanye ndetse hanerekanwe amafoto na film byo kumwibuka.

Abo bahanzi bazataramira abazitabira iki gitaramo ni umwana wa Nyakwigendera “Intore Masamba”; Mighty Popo; Itsinda Indashyikirwa; Itsinda rya Gakondo (rigizwe n’Umwuzukuru wa Nyakwigendera “Jules Sentore”, Ngarukiye Daniel, Habumuremyi Emmanuel ndetse na Ngabo Michel); umuhanzi Kamanzi Samuel w’Itsinda Ikobe; umucuranzi w’inanga Nzayisenga Sophie; Jean Paul samputu; Nirere Shanel; Mani Martin; Patrick Nyamitari ndetse n’abandi.

Ubutumwa n’imivugo bizatangwa n’umuvandimwe wa Nyakwigendera “Cyoya”, Kalisa Rugano, Kayishema Jean Marie, Atome na Kamanayo Georges.

Films n’amafoto bikaba bizerekanwa na Ntwali Alain ndetse na Kamanayo Georges naho umushyushyabirori akazaba ari Rutazibwa Bernardin.

Nta kiguzi cyo Kuzinjira muri ibi birori byo kwibuka (kwinjira ni ubuntu), ababiteguye batangaje ko abazitabira ibi birori ari inkunga bazaba batanze mu gafatanya kwibuka Nyakwigendera Sentore.