Aba banyamideli bahuriye muri Mercedes-Benz, babona ko bashyize imbaraga hamwe hari aho bashobora kugera kurenza umwe akomeje gukora ukwe.

Iri tsinda ryiswe NFE (Novelty Fashion Experience), rizajya rikora ibikorwa bitandukanye birimo guhuza ibitekerezo ku ngingo runaka bakayikoraho imyambaro itandukanye.

Gutegura amamurikabikorwa n’ibirori by’imideli bitandukanye, gutanga amahugurwa no gusangiza abandi ubumenyi bafite. Ibi byose babishyizemo imbaraga kugira ngo bateze imbere uruganda bakoramo.

NFE kugeza ubu igizwe n’abahanzi b’imideli batanu barimo Gikundiro Joyeuse watangije inzu y’imideli ya Koni Clothing, Niyigena Maurice washinze Matheo Studio, Shema Gaetan, Maison Inkingi na BRAND 8.

Aba bahanzi bazajya bakomeza bakorere mu nzu z’imideli zabo ariko bagire n’umwanya wo gukorera hamwe nk’itsinda.

Niyigena Maurce yabwiye IGIHE ko bahisemo gutangiza iri huriro kugira ngo bagire umusanzu batanga mu ruganda rw’imideli.

Ati "Hari imbogamizi nyinshi umuhanzi w’imideli ku giti cye ahura nazo, nko kumenya ngo amahirwe ari he? Ni hehe nakura ibikoresho?”

“Twararebye tubona hari ikintu kibura mu mideli y’u Rwanda niko kuvuga ngo bakuru bacu hari ibyo bakoze ariko si byose twifuza. Twebwe kuki tutagerageza gukuramo icyo cyuho kirimo?”

Yakomeje avuga ko bashishikajwe no gukora ibikorwa bigaragaza ubuhanga buri mu guhanga imideli ndetse no gutanga ubumenyi buzatuma hari imyumvire ihinduka nko kumva ko hari ibyo Abanyarwanda batashobora.

NFE irateganya ibirori by’imideli izagaragarizamo ibikorwa byabo bya mbere ku bukangurambaga bwo guhindura imyumvire abantu bafite ku mideli. Biteganyijwe mu Ukwakira 2023.

Gikundiro Joyeuse watangije inzu y'imideli ya Koni Clothing na we ari muri iri huriro

Inzu y'imideli ya BRAND 8 nayo iri muri iri tsinda

Immwe mu myambaro yakozwe na Maison Inkingi

Imyambaro yakozwe na Shema, umwe mu bagize iri huriro

Matheo Studio iri mu nzu zikora imyambaro igezweho, ikaba yarashinzwe na Niyigena nayo iri muri iri huriro

Niyigena yavuze ko bashishikajwe no kuzana impinduka mu mideli

Shema Gaetan uri mu bahanzi b'imideli bagezweho yibumbiye muri iri tsinda