Uyu ni umukobwa w’imyaka 22 ukundirwa cyane ingano ye, kuko ni umwe mu bamurika imideli bafite ibilo bike, ibikundwa cyane n’abahanzi bayo.

Mu 2021 nibwo abakurikiranira hafi imideli batangiye kubona Uwase Phiona cyane, haba mu mafoto no mu myambaro amurika muri rusange, ubona ko ari ibintu ashoboye.

Nubwo uru ari uruganda ubona ko asobanukiwe neza, ntabwo ari ibintu yakuze atekereza ko yazakora, ariko icyo uzaba ntaho kijya.

Mu kiganiro IGIHE yagiranye na Uwase, yavuze ko atigeze arota kumurika imideli ahubwo yakundaga kwandika, abona atari kubigeraho, ashaka kubinyuza mu mafoto.

Ati "Ntabwo nigeze ndota kuba naba umunyamideli gusa, hari abambwiraga ko nabikora neza ariko simbihe agaciro, njye nakuze nkunda kwandika nk’imivugo cyangwa andi magambo atanga ubutumwa."

Yakomeje ati "Nabonye ko ntari kubona uburyo nakwandika igitabo mu 2020, ahubwo mpitamo kujya nifotoza amafoto ngashyiraho ya magambo nshaka gutambutsa."

Uwase yavuze ko yahisemo iyi nzira mu kunyuzamo ubuhanzi bwe, imubera umuryango umwinjza mu ruganda rw’imideli, ni ko gutangira kubyitoza.

Ati "Nagiye gufata amafoto abantu barayakunda bambwira ko naba umunyamideli, ariko njye nkabona uko nteye bitashoboka. Rimwe nagiye kureba Franco Kabano arampima ndetse ambwira ko nabikora neza cyane."

Mu 2020 nibwo Kabano yamweretse ko yaba umunyamideli mwiza, mu gihe yari atangiye kubyitoza, hahita habaho ibihe bya guma mu rugo kubera Covid-19, ntiyabona uko akomeza.

Uwase avuga ko yari afite umuhate ukomeye ku buryo yafashe gahunda yo kwiyigishiriza ibyo kumurika imideli aciye kuri YouTube, arabimenya, nibwo yaje gutangira kubikora nk’akazi.

Uyu mukobwa usanzwe akora mu bijyanye no kwita ku barwayi, avuga ko yishimira ko imideli yamufashije kwisobanukirwa no kubona urubuga agaragarizamo ibyo atekereza, ndetse no kuba hari ubushobozi yabonyemo.

Uwase Phiona akorana n’inzu z’imideli zitandukanye nka Moshions, Izubaa, Masa Mara Africa n’izindi.

Yatangiye afata amafoto agira ngo abone aho agaragariza ubuhanzi bwe

Uwase yiyigishije ibijyanye n'imideli anyuze kuri YouTube

Uwase yinjiye mu mideli ashaka aho yajya agaragariza ibitekerezo bye mu kwandika

Uwase avuga ko atigeze arota ko yaba umunyamideli, kuko yitinyaga

Anakorana n'inzu y'imideli ya Moshions

Uwase ari mu banyamideli bafite ibilo bike

Uwase ari gukorana n'inzu nyinshi zihanga imideli

Abakurikiranira hafi imideli bemeza ko Uwase ari mu bazageza uru ruganda kure

Abinyujije mu mafoto, Uwase yakomeje gutanga ubutumwa butandukanye