00:00:00 IGIHE NETWORK KN KINYARWANDA EN ENGLISH FR FRANCAIS

Icyo abandi bahanzi bafana Bruce Melody bavuze ku gitaramo cye bitabiriye

Yanditswe na

Dean Irak

Kuya 10 March 2014 saa 10:05
Yasuwe :

Mu kumurika Album ye ya mbere yise “Ndumiwe”, umuhanzi Bruce Melody yashigikiwe n’abahanzi bagenzi be basanzwe bazwi cyane mu Rwanda, nka Mani Martin, King James, Christopher, Knowless, Kamichi, Ama-G The Black, Uncle Austin, Dream Boyz n’abandi bose batangaje ko banyuzwe n’iki gitaramo.
Uretse Ama-G The Black we warenzwe n’amarangamutima akajya imbere ku rubyiniro akavuga ko yishimiye ko uyu muhanzi bakuranye bakanatangirana ubuhanzi yageze kuri iyi ntera ishimishije yo kumurika Album, n’abandi (...)

Mu kumurika Album ye ya mbere yise “Ndumiwe”, umuhanzi Bruce Melody yashigikiwe n’abahanzi bagenzi be basanzwe bazwi cyane mu Rwanda, nka Mani Martin, King James, Christopher, Knowless, Kamichi, Ama-G The Black, Uncle Austin, Dream Boyz n’abandi bose batangaje ko banyuzwe n’iki gitaramo.

Uretse Ama-G The Black we warenzwe n’amarangamutima akajya imbere ku rubyiniro akavuga ko yishimiye ko uyu muhanzi bakuranye bakanatangirana ubuhanzi yageze kuri iyi ntera ishimishije yo kumurika Album, n’abandi bahanzi bagiye bagaragaza akanyamuneza batewe n’iki gitaramo.

TMC wo muri Dream

TMC usanzwe ari umufana ukomeye w’umuziki wa Bruce Melody, yaguze itike ya VIP areba igitaramo nk’abandi bafana.

Nyuma y’iki gitaramo TMC yagize icyo avuga kuri iki gitaramo n’uyu muhanzi agira ati: “Mu bitaramo byagiye biba iki kiri mu byiza bya LIVE bibayeho uyu mwaka. Bruce Melody ni umwana, navuga umwana kuko ari umuhanzi uri mu baje vuba ariko ni umusaza mu muziki icyo gukora arakizi, afite ijwi rikomeye riremereye ari nacyo cyatumye abantu banyurwa. Navuga ko atumye ijoro ryanjye rimera neza, ari nayo mpamvu naziye igihe kugira ngo singire ikindi kintu kincika kuko nari nzi ko ari bubikore n’ubundi”.

TMC we hamwe na Platini bagaragazaga gufana muri iki gitaramo, ubundi bakanyuzamo bagatangarira ibiri kuba bagakurikira cyane basa n’abumiwe basa n’abaguye mu kantu, avuga ko hari byinshi yungukiye kuri iki gitaramo ndetse ko hari ibishya yamenye kuri Bruce Melody.

Yagize ati : “LIVE ya Melody iri ku rwego rwiza rwatanga urugero mu Rwanda. Njye nari nzi ko ari umuhanga ariko hari aho yageraga ijwi rye ukumva ko yarihinduye yarigize nk’umukobwa, hari indirimbo z’abandi yaririmbaga azivangavanga mu ze, ijwi ukumva arihinduye nk’iry’iyo ndirimbo ari kwigana neza neza. Icyo ni ikintu gikomeye cyiza ku muhanzi. Ni umuntu ushobora gutwara ijwi akarigeza aho ashaka akarikoresha uko yishakiye.”

Yakomeje agira ati: “Kubona umuhanzi ushobora kuzamura ijwi akarigeza kuri ruriya rugero rwo hejuru noneho akarihindura nk’iry’umukobwa; icyo ni ikintu cyantunguye ni ikikwereka umuhanzi ushobora kuba yaririmba style zose, mu buryo ubwo ari bwo bwose.”

“Jamal we nsanzwe ndi umufana we ariko we ntiyampaye icyo nari mutegerejeho, aho rwose sinkubeshye. Jamal ndamufana, aririmba neza aranakunzwe, indirimbo ze ni nziza ariko nkurikije we na Melody, Melody mu by’ukuri niwe watumye igitaramo kiryoha na cyane ko igitaramo cyari icye. Kuba umunyamahanga aza tugataha tuvuga ngo umunyamahanga ntacyo atweretse umunyarwanda niwe ukitweretse icyo nacyo ni ikintu cyiza cyo kwishimirwa; byari byiza!”

King James

Uyu muhanzi w’icyamamare mu njyana ya RnB, Afrobeat, Zouk, Pop n’izindi akora nawe yaguze itike ku mafaranga ye yitabira iki gitaramo cya Melody. King James uvuga ko asanzwe ari umufana wa Melody, nawe yagize icyo avuga kuri iki gitaramo.

Yagize ati: “Nabibonye neza, gusa njye ku giti cyanjye nkunda Melody, nkunda uburyo aririmba, nkunda indirimbo ze cyane ndi umufana we muri rusange kandi nabyishimiye ukuntu yaturirimbiye, ukuntu igitaramo cyagenze n’ukuntu abantu bacyitabiriye nabyishimiye.”

yakomeje agira ati: “LIVE imaze kugera ahantu heza kandi ngirango mwabibonye uko baririmbye bose, kandi bizaba byiza bitewe n’abariho n’abari kugenda baririmba LIVE ni umuzi ugenda ukura uko bwije n’uko bukeye navuga yuko rero bizaza n’abazaza bazaza babimenyereye basanga ari byo bihari kuko umuntu akurikiza ibyo asanze bihari.”

Christopher

Ku muntu wese ukurikirana umuziki nyarwanda, azi ko Christoper na Bruce Melody bakora injyana imwe, kuri ubu bakaba bagiye no guhangana mu marushanwa akomeye ya Primus Guma Guma Super Star baririmba bombi RnB ashobora gukeka ko badacana uwaka; nyamara kuri bo si ko bimeze.

Christopher avuga ko akunda bitavugwa indirimbo za Melody, kandi ko basanzwe bahamagarana iyo umwe afite igikorwa gikomeye agiye gukora mu muziki, bakifurizanya amahirwe masa.

Umva icyo yavuze nyuma yo kwitabira igitaramo cya Melody: “Melody yishimiye uko igitaramo cyanjye cyitabiriwe, nanjye nishimiye uko icye cyabaye cyiza. Njye na Melody nta bushyamirane na bumwe twari twagirana, ahubwo harimo ubucuti; turi muri generation (ikigero) cyiza kitagirana ubushyamirane, buri wese yishimira iterambere ry’undi.”

“Melody twaravuganye ko ngomba kuza ariko nta butumire nigeze mwaka kuko ndabizi agaciro bifite rero nanjye naje nishyura nk’abandi bose, naguze itike dore n’agashwanyu ngaka [arakerekana].”

Abajijwe indirimbo akunda za Bruce Melody, Chritopher yagize ati: “Indirimbo ye nkunda ni iyitwa Indorerwamo, irandyohera bya hatari, sinashobora kuyiririmba nk’uko we ayiririmba ariko aravuga ngo ‘Fata indorerwamo maze wirebe, i yeeee wirebe, umenye impamvu ngukunda i yeeeee.”

Christoper we avuga ko ahanini yishimiye kuba iki gitaramo cya Melody nacyo cyitabiriwe, n’ubwo bitari cyane, akavuga ko bitanga icyizere ko ibitaramo bitazapfa kongera guhomba. Anashimangira ko binaha icyizere abahanzi bashya.

Yagize ati : “Hari hashize igihe haba ibitaramo ntibyitabirwe bikantera impungenge, ariko ubu narabikunze ko byongeye kwitabirwa, nahereye ku cyanjye mfite impungenge kuko ari cyo cyabaye mbere ariko mbona abantu baraje, n’iki ngiki urabona ko baje; ibi rero bitanga icyizere mu muziki muri rusange ndetse binaduha imbaraga twebwe nka generation yaje nyuma ho gatoya.”

“Ni ibintu nishimiye cyane, niba abantu batangiye kuza mu bitaramo gutya turi urungano rushibutse vuba, nidukomeza gukora cyane ibintu bizarushaho kugenda neza n’abantu bazarushaho kuza ari benshi mu bitaramo ntabwo tuzongera kubura abantu.”

Amag The Black

Ku rundi ruhande, Ama-G nawe yatangarije muri iki gitaramo ko anyuzwe n’ibyo mugenzi we yerekanye anamutera akanyabugabo, ati: “baziture musaza” bishatse gusobanura biti “bampere umuziki”.

Mani Martin

Mani Martin, wari wicaye imbere, nawe ari mu bishimiye cyane iki gitaramo kuko yakunze kugaragara ahaguruka abyina amanika amaboko yerekana cyane ko yanyuzwe n’uyu muziki wa Melody.

Hari n’abandi bahanzi barimo Knowless, Kamichi, Uncle Austin n’abandi bahanzi bari bitabiriye iki gitaramo ntitwabashije kuvugana nabo ngo batangaze amarangamutima kuri uyu muhanzi bigaragara ko akunzwe.

Melody muri iki gitaramo yaririmbye indirimbo ya nyakwigendera Niyomugabo Philemon, ifitanye amateka n’ubuzima bwe, ndetse bikaba binavugwa ko basa.

Melody ni umwe mu bahanzi bavugwaho ubuhanga mu miririmbire mu ijwi mu Rwanda, kandi wahihibikaniye kuva kera kubigaragariza abantu ariko akajya ahura n’ibizazane byinshi. Yifuje no kujya mu marushanwa ya Tusker Project Fame ariko ntibyamuhira.

Kuri ubu Bruce Melody, ari mu bahanzi 15 bahatana mu irushanwa rya Primus Guma Guma Super Star IV, akaba, bitewe n’ijwi rye, ari no mu bahabwa amahirwe menshi yo gukomeza mu icumi bazagera ku musozo waryo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .