Kuwa Mbere tariki ya 20 Mata nibwo Knowless aharekejwe na Producer Clement ndetse na Meddy Saleh bahagurutse i Kanombe berekeza muri Zanzibar gufata amashusho y’indirimbo yitwa ‘Peke yangu’.

Mu kiganiro na Knowless yashimangiye ko yahiriwe n’urugendo uko yateganyaga akazi yagombaga kuhakorera akaba ari na ko kagenze. Ngo akurikije amashusho yahafatiye n’umuhate ikipe yajyanye na yo ifite mu gutunganya iyi ndirimbo ngo yizeye ko azabona umusaruro ufatika.

Muri iyi ndirimbo, hari amashusho Knowless yafashe ari mu bwato mu Nyanja y’Abahinde, ku nkombe z’iyi Nyanja ifite ikirere gikeye, hazanagaragaramo inyubako zimwe zisurwa cyane n’abakerarugendo bajya kuruhukira muri Zanzibar.

Umukinnyi w’imena uzafasha Knowless mu kugaragaza ubutumwa buri mu ndirimbo ye ‘Peke yangu’ ni umusore witwa Evans, umwe mu banyamideli bakomeye i Dar es Salaam na we washimye bikomeye akazi uyu mukobwa yakoze.

Iyi ndirimbo ‘Peke Yangu’, ni imwe mu ziririmbwe mu ndimi Giswahili zizagaragara kuri album ya Gatanu ya Knowless ateganya gushyira hanze bitarenze umwaka wa 2015.

Uyu mukobwa uri mu bahanzi 10 bahatanira kwegukana irushanwa rya Primus Guma Guma Super Star ya 5 aracyashimangira ko yifitemo ubushobozi bwo gutwara igikombe ndetse ngo akurikije ingufu umuziki we ufite akareba na bagenzi be asanga ari we ukwiye guhabwa miliyoni 24 zizagenerwa umuhanzi wa mbere.

Knowless ku nkombe z'Inyanja y'u Buhinde

Knowless na Evans, umunyamideli ukomeye muri Tanzania

Knowless azanagaragara ari mu bwato muri iyi nyanja

Amwe mu mato yo mu Nyanja y'Abahinde azagaragara muri 'Peke yangu'

Iyi ni imwe mu nyubako bifashishije mu gukora aya mashusho

Ikipe yafashaga Knowless mu ifatwa ry'amashusho

Evans, umukinnyi w'imena muri iyi ndirimbo ni umunyamideli ukomeye i Dar es Salaam

Tulia ni imwe mu ndirimbo Knowless yafatiye amashusho hanze y’u Rwanda

Twitter: @murungisabin