00:00:00 IGIHE NETWORK KN KINYARWANDA EN ENGLISH FR FRANCAIS

PGGSS 5: Knowless yizeye kwegukana igikombe agakora amateka

Yanditswe na

Jean Pierre Mazimpaka

Kuya 4 April 2015 saa 04:39
Yasuwe :

Butera Jeanne d’Arc ukoresha izina ry’ubuhanzi rya Knowless ni umwe mu bahataniri Primus Guma Guma Super Star ya 5 ndetse akaba yemeza ko naramuka ahawe igikombe biza ari amateka akomeye ku bahanzi b’igitsinagore mu Rwanda akanashimangira agikwiye.

Knowless umwe mu bahanzi babiri b’igitsinagore bari mu icumi bahatanira miliyoni 24 zizatangwa na Bralirwa . Mu kiganiro na IGIHE yashimangiye ko uburyo yamamaye mu Rwanda n’ingufu z’umuziki we bimwemerera kuza imbere y’abandi bityo akazaba ari we muhanzi wegukana iki gikombe ku nshuro ya gatanu.

Konwless yavuze ko nyuma y’ibitaramo bibiri amaze kwitabira i Rusizi na Nyamagabe ngo yasanze urugendo rwe rumwerekeza ku gikombe ruhagaze neza ku buryo afite icyizere cyo kuzarusha bagenzi be icyenda bahanganye.

Yagize ati “Igikombe ngomba kugikoraho ndetse nkanagitwara kuko birageze. Inshuro eshanu Primus Guma Guma imaze iba ni nyinshi. Turetse n’uko byaba ari amateka ku mukobwa mu muziki Nyarwanda, ariko ndanabikwiye.”

Knowless ngo yizeye kuzatwara iki gikombe bishingiye ahanini ku buryo azakomeza kwitwara mu irushanwa by’umwihariko akaba yizeye ko azanabigeraho abifashijwemo n’abafana.

Yagize ati “Ntabwo navuga ngo igikombe ndagikwiye gusa abafana batabigizemo uruhare, hari amatora, bagomba kuntora. Igikombe ndacyizeye ku bw’amasengesho, ku bw’imirimo ngomba gukora n’imbaraga zanjye zose no ku bw’abafana banjye bakomeza kunshyikira no kuntora”

Butera Knowless amaze kwitabira PGGSS inshuro eshatu. Ahabera ibitaramo byo hirya no hino mu gihugu uhasanga umubare munini w’abafana be bazwi ku izina ry’Intwarane. Ibi bituma hari abavuga ko uyu muhanzi aba yabakodesheje kugira ngo baze bamutize umurindi nyamara ngo siko bimeze.

Mu bitaramo bya Rusizi na Nyamagabe, hagaragaye umubare munini w’abafana ba Knowless bari baturutse i Kigali. Ababona aba bafana ba Knowless ahantu hose baba bamuherekeje bakeka ko ari we ubakodeshereza imodoka zibatwara ndetse akarenzaho kubaha amafaranga.

Ku ruhande rwe, Knowless yabwiye IGIHE ko aba bafana bihurije hamwe bakiyita Intwarane, ngo barenze kwitwa abafana be ahubwo ngo kugeza ubu bameze nk’abavandimwe be.

Yagize ati “Ntabwo ndi gutegura abafana habe na gato. Umufana nyakuri akurikira umuhanzi aho yaba agiye hose. Ntabwo namara icyumweru ntegura uburyo nzaririmba ngo njye no gutegura abafana. Wabibonye ukuntu abafana bari bari hejuru bose. Ubwo se naba mfite ubushobozi bungana iki bwo gutegura abantu bangana kuriya”

Asoza agira ati “Mfite abafana, mfite Club. Ntabwo nayita fan Club, yamaze kuba nk’umuryango kuko banyereka urukundo nanjye rundenze. Ahantu hose mba ndi, naba ndi mu mwobo, naba ndi he, mpfa kuba nagiye kuririmba baba bahari. Kuba bankurikira aho ngiye hose ni ikintu gishimishije cyane kigaragaza umufana nyawe.”

Butera Knowless amaze imyaka itanu aririmba, asanga igihe kigeze ngo yegukane PGGSS. Umwaka ushize wa 2014, Knowless ntiyitabiriye PGGSS kubera impamvu ze bwite zijyanye no guteza imbere umuziki we. Kuri iyi nshuro ngo yiteguye kwegukana irushanwa.

Twitter: mazimpakajp


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .