00:00:00 IGIHE NETWORK KN KINYARWANDA EN ENGLISH FR FRANCAIS

Christopher yamuritse album mu gitaramo cy’akataraboneka (Amafoto)

Yanditswe na

Jean Paul Ibambe

Kuya 16 February 2014 saa 09:34
Yasuwe :

Kuwa Gatandatu tariki 15 Gashyantare 2014, ni umunsi ushobora kutazibagirana ku muririmbyi Christopher Muneza, wamuritse album ya mbere yise ‘Habona’, mu gitaramo cy’akataraboneka muri Kigali Serena Hotel.
Igitaramo cyateguwe na label ya Kina Music, Christopher abarizwamo, ku isaha ya saa kumi n’ebyiri zuzuye cyari gitangiye nk’uko byari biteganyijwe. N’ubwo abantu bo bari batarahagera mu buryo bushimishije, umusaza Makanyaga Abdoul we yahise atangira gucuranga, maze mu ndirimbo nka Ansila, Uri (...)

Kuwa Gatandatu tariki 15 Gashyantare 2014, ni umunsi ushobora kutazibagirana ku muririmbyi Christopher Muneza, wamuritse album ya mbere yise ‘Habona’, mu gitaramo cy’akataraboneka muri Kigali Serena Hotel.

Christopher akigera ku rubyiniro, yaririmbye indirimbo y'Imana

Igitaramo cyateguwe na label ya Kina Music, Christopher abarizwamo, ku isaha ya saa kumi n’ebyiri zuzuye cyari gitangiye nk’uko byari biteganyijwe. N’ubwo abantu bo bari batarahagera mu buryo bushimishije, umusaza Makanyaga Abdoul we yahise atangira gucuranga, maze mu ndirimbo nka Ansila, Uri mwiza n’izindi acurange mu gihe kirenga isaha yose.

Makanyaga yaje kwakirwa n’umuririmbyi Peace Joris. Uyu musore ukiri muto, azwiho kuririmba mu ijwi rinyura benshi, akaba anaheruka kwitabira Tusker Project Fame 6, irushanwa yasezerewemo rugikubita. Uyu muhanzi kandi anafite indirimbo yakoranye na Christopher bakaba ari n’inshuti kuva bakiri bato.

Amaze kuririmba indirimbo zigera muri eshatu, Peace yaje gukurikirwa n’abasore Nemeye Platini na Mujyanama Claude bita TMC bombi bagize Dream Boys. Ubwo bageraga ku rubyiniro, aba basore bakaba bahawe amashyi menshi cyane, maze baririmba indirimbo imwe bahita bava ku rubyiniro bakurikirwa na Knowless.

Mu ikanzu y’umukara igaragaza mu mugongo he, Knowless Butera bajya banahimba Kabebe, yaririmbye indirimbo ebyiri, ‘Baramushaka’ na ‘Follow you’ maze ahita ava ku rubyiniro, uba ubaye umwanya wa Christopher Muneza.

MC Lion Imanzi ati: “Umwanya tugezemo rero ni uwa nyiri igikorwa, reka duhe rugari Christopher”. Abantu bose batanga amashyishyi.

MC Lion niwe wari uyoboye ibi birori.

Amatara nibwo ahinduwe, amabara, abacuranzi batangira gukora ku mirya, mu ikote n’ipantaro yaryo n’ishati y’umweru dede, n’igisunzu kinyereje ku mutwe, Christopher ng’uwo aba araje.

Uyu muhanzi wahereye ku ndirimbo y’Imana, yahise akurikizaho iyo yise ‘Kwihangana Byanze’ maze agiye kuyigera ku musozo, haza abaririmbyi ba korali abarizwagamo yitwa St Augustin yo kuri Paruwasi ya Mutagatifu Karoli Lwanga i Nyamirambo. Hari mu nyikirizo y’iyi ndirimbo.

Korali St Augustin yasanze Christopher ku rubyiniro

Christopher wananyuzagamo agasubiramo indirimbo z’abandi bahanzi nka Sorry Beautiful, yaje guhamagara Peace baririmbana indirimbo ‘Uwo munsi’. Yaje kuririmba indirimbo nka Ndabyemeye maze ahabwa akaruhuko hinjira Tom Close muri ‘Ibintu byarahindutse’.

Christopher yageze aho akura ikote

Uyu mugabo uheruka kurushinga, yashimishije bari aho muri iyi ndirimbo ariko biba akarusho ubwo yabyinaga mu buryo budasanzwe.

Tom Close ati: "Abantu barahindutse"

Nyuma Christopher yaje kugaruka ku rubyiniro maze akomeza kuririmbira abantu ari nako babyina maze indirimbo ze zose arazihetura.

Mo hagati uyu musore yaje gufata umwanya ashimira ababyeyi be bari aho ndetse na Producer Clement wamufashije kuva mu mwaka wa 2009. Yanashimiye kandi abaterankunga nka Bralirwa, Select Kalaos n’abandi bamufashije harimo Kina Music, maze ahita atumira abaririmbyi babarizwa muri Kina Music.

Kina Music irimo Tom Close, Knowless, Dream Boys na Christopher babanje kuririmba indirimbo ‘Kanda Amazi’, bahise bahamagara muzehe Makanyaga Abdoul maze baririmba indirimbo ‘Nshatse inshuti’ baheturira kuri Rubanda.

Igitaramo cyaje kurangira nta muntu n’umwe ubona abishaka kuko Christopher ubwe yashatse gusezera maze abafana be bakanga bakamusaba kongera kubaririmbira, igitaramo kirinda kirangira icyumba cyabereyemo iki gitaramo kicyuzuye, dore ko hari abantu benshi bamwe bakabura ho bicara bakanahagarara hanze.

Makanyaga Abdoul aririmba.
Peace
Peace Joris aririmba muri iki gitaramo
Dream Boys bitegura kujya ku rubyiniro
Platini Nemeye
TMC wa Dream Boys
Knowless mu gitaramo cya Christopher
Knowless ati: "Baramushaka"
Mama wa Christopher yari muri iki gitaramo
Se wa Christopher yari yaje kureba uko umuhungu we amurika album
Kina Music muri Kanda Amazi
Hamwe na Makanyaga, Kina Music bati: "Rubanda ntibakakoshye".
Serena Hotel yakubise yuzuye.

Iki gitaramo cyaranzwe n’ubwitabire bwinshi bw’abafana, abahanzi bakitabiriye bose baririmbye mu buryo bw’umwimerere (Live).

Miss Rwanda 2012 Aurore Mutesi Kayibanda yari muri iki gitaramo
Aba babyinnyi ba Salsa bashimishije abantubenshi

Habona ni album ya mbere Christopher amuritse, iriho indirimbo nka Bahona, Iri joro, Ndabyemeye, Byanze n’izindi. Christopher ubwe akaba ari umwe mu bahanzi bakora injyana ya RnB mu Rwanda , yatangiye muzika mu mwaka wa 2009. Yitabiriye irushanwa rya PGGSS 3 ryabaye mu mwaka wa 2013.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .