Jay Polly, ni umuraperi ufite abafana batagira ingano mu irushanwa rya PGGSS4. Umugereranyije na bagenzi be 9 ahanganye na bo, uyu muhanzi ubona ko yamaze kubanikira mu bijyanye no kugaragaza ko akunzwe koko.
Si igikundiro afite gusa ahubwo no kuririmba akoresheje ijwi rye ry’umwimerere banamucungira mu buryo bwa Live, Jay Polly yaraye yeretse abanya-Kigali ko hari intambwe ikomeye amaze kugeraho.
Uyu muraperi wageze kuri Stade Amahoro ahabereye iki gitaramo ubona nta gihunga afite, umwanya we wo kuririmba wageze azamuka ku rubyiniro aririmba mu buryo bwa Live indirimbo ye yise Ku musenyi.
Akigera imbere y’abafana, bamweretse ko badakunda kumwuga gusa aririmbisha CD ahubwo no kurapa kwe acuranga live byabaryoheye maze benshi muri bo bazamura amaboko hejuru atanabibasabye bamufasha kuririmba.
Ageze hagati indirimbo Ku musenyi, ababyinnyi be bahise bamusanganira ku rubyiniro maze bamufasha gususurutsa abafana mu buryo bukomeye.
Yagaragaje ko afite abafana benshi
Kimwe mu bigenderwaho akanama nkemurampaka batanga amanota ku muhanzi, harimo kugira umubare munini w’abafana ari nayo ngingo ifite amanota menshi. Ugereranyije n’uko abandi bahanzi bakiriwe ku rubyiniro, Jay Polly yari afite abafana benshi ndetse banamufasha kuririmba.
Ibintu 4 by’ingenzi akanama nkemurampaka kagenderaho mu guha umuhanzi amanota : Kugira abafana benshi (popularity 50%), uko aririmba(performance30%), uko agaragara ku rubyiniro(stage appearance10%) n’ikinyabupfura(Discipline10%).
Bimwe mu byo Jay Polly yagerageje kwigaragazamo neza ni abafana benshi yarushije abandi ubwo yaririmbaga ndetse by’umwihariko akaba yanagerageje kuririmba agendana n’abacuranzi be ijwi rye ryumvikana neza.
Icyizere imbere y’abafana
Jay Polly wanageze aho iki gitaramo cyabereye ubona ko ku maso ye nta gihunga na gito afite ku maso ye, n’imbere y’abafana yabigaragaje. Ubwo yaririmbaga, wabonaga ko yaje kuririmbira abafana ataje gukorera amanota , guhangana cyangwa kurangiza umuhango gusa.
Yacishagamo akereka ikimenyetso abacuranzi be atabanje guhindukira ngo abarebe, bakagabanya ibyuma maze akaririmbira abafana be mu ijwi rye yarangiza bagahita bakomerezaho bamucurangira.
REBA UKO JAY POLLY YARIRIMBYE LIVE I KIGALI:
Uyu muraperi yanyuzagamo akaririmba anyuranamo n’ababyinnyi be ubona ko yakoze imyitozo ihagije.
Guhinduranya isura ya stage
Jay Polly wari wambaye ishati n’ipantaro benshi bita ama bubu, amaze kuririmba Ku musenyi yahise akurikizaho iyo yise Deux Fois Deux ahita ahindura uburyo yagaragaraga ku rubyiniro, amatara bayahinduye ndetse n’ababyinnyi be, abasore n’abakobwa, baza bahindura byinshi.
Uburyo umuhanzi ategura urubyiniro rwe, uko aririmba n’uburyo aba yambaye, bigenerwa amanota angana na 30%.
Aya manota atanga n’akanama nkemurampaka ahuzwa n’amatora akorwa n’abafana binyuze kuri telefone aho wandika umubare w’umuhanzi ukunda ukohereza kuri 4343. Umubare uranga Jay Polly muri iri rushanwa ni 6.
NB: Mu nkuru zacu zitaha turabagezaho uko abandi bahanzi nabo bitwaye
VIDEO: Eliel Sando
TANGA IGITEKEREZO