Mu mpera z’icyumweru gishize, Kizito Mihigo for Peace Foundation (KMP) ifatanyije n’umuryango World Vision, bahuje amashuri yo mu karere ka Gicumbi mu Ntara y’Amajyaruguru, mu gitaramo cy’indirimbo, imbyino, imivugo n’ikinamico.

Nk’uko umuhanzi Kizito Mihigo abitangaza, iki gikorwa kiri muri gahunda ndende Fondation KMP yise "Inkunga y’ubuhanzi mu burezi no mu burere mboneragihugu."

Iyi gahunda yatangiye mu mwaka wa 2011, igizwe n’ibitaramo by’ubuhanzi bunyuranye (Muzika, Ikinamico, Imivugo ndetse n’imbyino) bibera mu mashuri yisumbuye anyuranye mu gihugu cyose, bigamije gukangurira urubyiruko indangagaciro z’Amahoro, Ubumwe n’Ubwiyunge nyuma ya Jenoside yakorewe Abatutsi mu mwaka wa 1994.

KMP imaze gukora ibyo bikorwa mu mashuri agera kuri 52 (mirongo itanu n’abiri).

Iki gitaramo cyahuje abanyeshuri barenga 2000 n’abayobozi babo aho baturutse mu mashuri arenga atanu, (Groupe Scolaire de Rebero, Groupe Scolaire du Bon Conseil, Groupe Scolaire de Byumba, Ishuri ryisumbuye ry’i Kageyo, ndetse n’amashuri y’uburezi bw’ibanze bw’imyaka 9 na 12 yo muri ako karere).

Iki gitaramo cyatewe inkunga n’umuryango wa Gikristu World Vision, cyitabiriwe n’abayobozi banyuranye mu karere ka Gicumbi, barimo Umuyobozi w’akarere wungirije ushinzwe imibereho myiza y’abaturage, Therese Mujawamariya, abakuru b’Ingabo na Polisi, abayobozi ba World Vision ku rwego rw’igihugu nka Patrick Sebagabo wungirije umukuru wa Wolrd Vision mu Rwanda, Josephine Munyeri umukozi wa World Vision ushinzwe ibikorwa byo kubaka Amahoro n’Ubwiyunge, na Aphrodis Muhashyi uyobora ishami rya World Vision mu karere ka Gicumbi.

Ubutumwa bwa Fondation KMP muri urwo rubyiruko.

1. Kuzirikana indangagaciro nyabumuntu zidasanzwe abantu bavoma mu myemerere yabo.

Kizito Mihigo wavugaga mu izina rya Fondation KMP yari yanamuherekeje muri iki gikorwa, yavuze ko niba urubyiruko rw’u Rwanda rufite amahirwe yo kuba rwemera Imana, rukwiye gukoresha ayo mahirwe, kugira ngo rugaragaze ko muri iyo myemerere yarwo bigiramo imico n’indangagaciro bibafasha kubaho neza no kubana n’abandi mu mahoro.

Kizito ati “Niba imyemerere yacu, yaba iya Gikristu, iya Kiyisilamu cyangwa se iya Kinyarwanda, itadufasha kubaho neza, no kubana na bagenzi bacu mu mahoro no mu rukundo, ni ukuvuga ko iyo myemerere ari nyirarureshwa.”

Aha yavuze ko imiryango World Vision ndetse na Fondation KMP ari imiryango ikomoka mu kwemera kw’abakristu, ariko igakorera ibikorwa ikiremwa muntu cyose, cyane cyane urubyiruko. Mu rwego rwo gushimangira ubu butumwa kandi, Kizito Mihigo yaririmbye indirimbo ze za Gikristu ebyiri: Nyirimbabazi yarazitwanduje na Arc en Ciel.

2. Kwibuka Jenoside yakorewe Abatutsi

Kizito Mihigo yibanze ku butumwa bwo Kwibuka Jenoside yakorewe Abatutsi, avuga ko impamvu yo kwibuka ari ukugira ngo abantu basane ubuzima bwabo, bahe agaciro ababavuyemo ku bw’umubiri, kandi bavane mu mateka amasomo atuma babasha kwiyubakira ejo hazaza no kwirinda ko Jenoside n’ubundi bugome byakomeza kugwirira inyoko muntu. Uyu muhanzi yashimangiye ubu butumwa akoresheje indirimbo zisanwe zimenyerewe mu bihe byo kwibuka.

3. Gusaba imbabazi, Kubabarira no kwiyunga

Nyuma yo kuririmba "ITEME", indirimbo ikubiyemo amagambo akomeye yo kubabarira no kwiyunga, umuhanzi Kizito Mihigo yahaye umwanya abanyamuryango ba Fondation ye bari bamuherekeje, maze bakina ikinamico.

Iyi kinamico yagaragazaga uruhare rw’uwahemukiwe ndetse n’uwahemutse, mu kwubaka amahoro nyuma ya Jenoside. Igaragaza ku buryo buvunaguye, ko gutanga imbabazi bidashoboka umuntu atabihawe n’Imana ndetse gusaba imbabazi na byo bikaba ari igikorwa gisaba kwicisha bugufi cyane, nyamara byombi bikaba bikenewe kugira ngo hagerwe ku bwiyunge nyakuri.

4. Icyizere n’Amahoro mu Rwanda nyuma ya Jenoside

Umuhanzi w’imivugo, Tuyisenge Aimé Valens na we yavuze umuvugo yise "NYUMA Y’UBUGI HARI UBUKI", umuvugo werekana ko nyuma ya Jenoside Abanyarwanda bahishiwe umunezero, kandi uwo munezero bakawugiramo uruhare.

Umucuranzi w’inanga gakondo, Sofia Nzayisenga na we yashimishije benshi mu murya w’inanga ya Kinyarwanda ndetse no mu butumwa bw’amahoro yatanze mu ndirimbo ze. Sofia Nzayisenga tubibutse ko ari umukobwa wa Nyakwigendera Kirusu Thomas, na we wabaye ikirangirire muri Muzika gakondo y’Abanyarwanda.

Muri iki gitaramo, urubyiruko rwakitabiriye rwagaragaje ko rwishimiye umuhanzi Kizito Mihigo wabaririmbiye indirimbo ze zitandukanye ndetse abaha n’ubutumwa.

Patrick Sebagabo war­i uhagarariye World Vision

Umusizi Aime Valens ­Tuyisenge