Mani Martin werekeje mu Bufaransa mu gitondo cyo kuri uyu wa Mbere Tariki ya 28 Nyakanga 2014, azavayo amaze gutunganya indirimbo zigize album yitegura gushyira hanze. Mu bijyanye Mani Martin harimo no gutaha ubukwe bwa Miss Shanel buzaba ku itariki ya 02 Kanama.

Mu kiganiro Mani Martin yagiranye na IGIHE mbere yo guhaguruka i Kigali, yadutangarije ko mu minsi mike ishize yatunguwe no guhamagarwa n’icyamamare mu gukora indirimbo , Producer Timour , amusaba ko yazaza bagakorana.

Mani Martin, yemeza ko yahamagawe na Producer Timour mu gihe yari amaze igihe ashakisha igihugu yazakoreramo ibihangano bye bigasohoka biri ku rwego mpuzamahanga. Uyu Producer Timour yatunganyije zimwe mu ndirimbo z’abahanzi bakomeye muri Afurika barimo Alpha Blondy, Youssou N’dour, Salif Keita n’abandi.

Ati, “Maze iminsi nkora ifatwa ry’amajwi n’ibicurangisho binyuranye muri studio ya Get Music, twakoze ibyo dushoboye mfatanije na Kesho Band. Mu gihe nashakishaga studio yamfasha kubitunganya mu buryo mpuzamahanga, naje kugira ntya numva mpamagawe n’umu Producer w’umufaransa witwa Timour, wakoze Album iheruka ya Youssou N’dour, yanakoranye n’ibindi bikomerezwa muri muzika nyafurika nka Salif Keita na Alpha Blondy”

Producer Timour yabwiye Mani Martin ko yishimiye mu buryo budasanzwe inganzo ye n’uburyo akora umuziki we bityo amusaba ko yazaza bagakorana kuri album ye nshya.

Mani Martin ati, “Yambwiye ko yakunze cyane ibihangano byanjye, ngo amaze kumva indirimbo zanjye yahise yumva adashidikanya ko mu Rwanda icyizere mu muziki nyafurika w’ejo hazaza. Yanambwiye ko yumva twakorana, na we urabyumva ko yorosoye uwabyukaga”

Mani Martin yagombaga kuba yahagurutse i Kigali ku Cyumweru Tariki ya 27 Nyakanga 2014, aza guhura n’ikibazo cy’indege yagombaga kumutwara urugendo rwe rwigizwa inyuma bityo agenda muri iki gitondo.

REBA INDIRIMBO MY DESTINY YA MANI MARTIN: