Riderman uherutse gushimangira ko abamushinja gukoresha imyuka mibi, abapfumu na Illuminati no kuraguza yashyize hanze indirimbo ikubiyemo amagambo asenya ibitekerezo by’abanzi be n’abamushinja kwiyambaza imbaraga za sekibi.

Nk’uko aherutse kubitangaza, Riderman aremeza ko avuka mu muryango usenga ndetse na we akaba yemera Imana bikomeye ku buryo atakwemera kugurisha roho ye ashaka ubukire. Abacuruza roho zabo bashaka ubutunzi, abadasenga ahubwo bakiyambaza Shitani, abo bose yabise ‘Abafite imitekerereze y’ibicupuri’ ari na bo ahanura muri ‘Bunguka bate’ yakoranye na Bull Dogg.

Ati “Mu ndirimbo ‘Bunguka bate’mbivugamo, sinshobora gucuruza roho yanjye. Nzemera mpfe ndi umukene aho gucuruza roho yanjye, ndi umwemeramana cyane ku buryo ntashobora gukora ibyo bintu bamvugaho”

Muri ndirimbo Riderman yongeye kwikoma abanzi be, akerurira abishimira ibyago bye ko ntacyo bateze kuzageraho ku bwa Nyagasani umurwanirira. Uyu muhanzi avuga ko abatwawe n’ibya Kayizari ari bo bagira imitima mibi ibayobora inzira mbi yo kugurisha roho zabo bashaka ubukire gusa we nk’umwemeramana akabyamaganira kure.

Riderman aririmba agira ati:

Nyuma y’amapingu beat nyifashe mu mashingu
Microphone ndayinyagiza ibitero nk’amahindu
Tracklayer beat ayikubita nta muhini
Reka nze nyicishe inkota yanjye ntunze ku rurimi
Mbwize ukuri abagifite mind(imitekerereze) z’ibicupuri
Ko akabi ntaho kajya ndi igisumizi rukukuri
Nariye ingoma nyinshi
Ndabizi igihe ni iki
Benshi muzashimire Mark Zuckerberg(umuyobozi wa Facebook)
Ku bw’inkuta ze muririraho iyo muri mu kaga
Ruganzu Ndoli a.k.a Kitatire ati,
Ntawe ubura abanzi uretse ibigoryi n’abasazi,
Si ndi umwe muri abo, abanzi banjye mbabamo mbazi,

Riderman abaza abanzi be icyo bunguka nyuma yo kwishimira igihombo cye. Ati “Ahubwo ikibazo mbabaza ni iki,mwungura mu bihombo byanjye? Ndabaza, kunsebya bituma mwubahwa? Ko niterera agatambwe mukababara?”

Riderman ahamya ko abantu bose barwaye indwara idakira yo gukunda imari yabibagije Imana.

UMVA IYI NDIRIMBO HANO

Ubwo mbona umunsi ku munsi bimpa amasomo,
Turi abarwayi twese twakajyanwe Fayisari
Turwaye indwara ikaze cyane yo gukunda imari
Ibya Kayizari byatwibagije Imana,

Abagurisha roho zabo bashaka kuba abanyemari bakomeye ngo babanza kwigiza kure Imana bagaha icyicaro Shitani. Ku ruhande rwe Riderman ngo azemera apfire mu bukene ariko ntahemukire Imana.

Ati “Bamwe ntabwo bagisari bari tayari gucuruza roho zabo ngo bajye mu batunze miliyari. Huuh, ni hatari. Uwabaha masotera ubanza batatinya no kurasa inyangamugayo. Njye nzapfa nkize cyangwa mpfe nk’imbobo, gusa nye nzaba ngifite roho. N’abakora ibisa n’ibyo bose ndabapinga.”