Mu ijoro ryo kuwa 26 rishyira kuwa 27 Kamena 2014, urugo rw’umuririmbyi Eric Senderi ruherereke mu Karere ka Kicukiro, mu Murenge wa Kigarama, Kagari ka Rwampara mu Mudugudu wa Bwiza rwatewe n’abajura bamena imodoka ye baramwiba.

Nk’uko Senderi yabitangarije IGIHE mu gitondo cyo kuwa 27 Kamena, Senderi yatashye avuye kureba umupira ahagana saa sita, aparika imodoka mu gipangu abamo asigamo ibintu byinshi birimo imyambaro n’amafaranga barabyiba.

Senderi yagize ati:“Bapfumuye imodoka bayimennye ikirahure, bakuramo ibyari birimo byose no muri boot beguye intebe bajyamo bakuramo ibyo nari nasizemo; harimo imyenda nari kuzambara i Muhanga muri Guma Guma hamwe n’inkweto, batwaye radio n’amafaranga yarimo, n’utundi twuma.”

Ubusanzwe Senderi aba wenyine ngo nta mukozi cyangwa umuzamu agira ari nabyo byaba byatumye atamenya ko yagenderewe n’aba benengango.

Senderi yavuze ko yababajwe no kwibwa bwamuteje igihombo kinini ariko ngo ntibyamuciye intege.

Yagize ati “Ntabwo binsha intege zo gukomeza gukora nubwo ari ibibazo nyine, iyo umuntu atagutwaye ubuzima ibindi byose birashoboka.”

Ubwo umunyamakuru wa IGIHE yavuganaga na Senderi, yari mu igaraje ari gukoresha imodoka ye, yavugaga ko nahava ajya kuri Polisi ngo akurikirane niba hari icyo yagaruza nyuma yo kubimenyesha inzego z’ibanze.

Iyi modoka ya Senderi niyo yangijwe n'abajura bakanatwara ibyari birimo. Aha ni hambere Senderi yifotoza kuri iyi modoka yananditseho izina rye.

Reba Senderi mu gitaramo aheruka kuririmbamo mu irushanwa rya PGGSS4: