Umuririmbyi mu njyana ya Afrobeat Eric Senderi International Hit, kuwa Gatandatu tariki 08 Werurwe 2014, umunsi mpuzamahanga w’abagore ubwo yari mu gitaramo cya Bruce Melodie, yagaragaje yambaye imyenda y’abagore. Akaba yaravuze ko aribwo buryo bwiza yabonye yakwifatanya nabo ku munsi wabo.

Senderi mu busanzwe utajya utana n’ibintu bitangaje, yatangarije IGIHE ko yakoze ibi yabitekerejeho, atari ibintu byamugwiririye.

Abajijwe igihe n’iduka yaba yarahahiyemo umupira usa n’iroza yagize ati: “Uriya mupira nawuguze ibihumbi 25 kuwa Gatanu nimugoroba, nari ndimo kwitegura ibyo birori nawuguriye mu iduka riri imbere ya Camelia. Nabikoze kugira ngo nerekane ko nifatanyije n’abadamu n’abakobwa; abagabo biriwe batetse abandi basasa nanjye nifuje kujya mu gitaramo yo nambaye kuriya.”

Eric Senderi avuga ko yubaha abagore n’abakobwa kubera akamaro nyina yamumariye n’ubwo atabonye uko amwitura ineza yamugiriye kuko yapfuye akirerwa.

Ati: “Mama yapfuye muri Jenoside, naramukundaga, hari indirimbo nakoze nshaka kumwitura, ivuga ngo kumwitura ineza ntibyankundiye, ngo mushimire ibyo yankoreye, nari imfura ye, ni njye yari ategerejeho byinshi, icyo nibuka nkiri muto yarambwiye ngo ujye umenya ubwenge, narabikurikije uwo niwo murage wa mbere yampaye.”

Ng'uko uko Senderi yari yambaye ku munsi w'abagore. Ifoto: Muzogeye Plaisir

[email protected]