Ukwibyara: Umwihariko wa Strong Voice, itsinda ry’abahanzi 6 babyawe n’umugore umwe

Yanditswe na

Munyengabe Murungi Sabin

Kuya 25 Mutarama 2016 saa 08:11
Yasuwe :
0 0

Kamere Antoine na Tuyisenge Jacqueline, ni ababyeyi bishimye bavuga ko bagize umugisha ukomeye wo kubyara abana b’abanyempano mu muziki. Mu bo bibarutse harimo abacuranzi bakomeye, abanditsi b’indirimbo, abaririmbyi n’ababyinnyi bihurije mu itsinda rikomeye bise ‘Strong Voice’.

- Ni itsinda ryashinzwe na bene mugabo umwe mu Biryogo
- Ni abahanzi batandatu babyawe na Kamere
- Ni abanyempano, inkurikirane ku mubyeyi umwe
- Nyina ati ‘Nzatuza nimbona abana banjye bazwi ku Isi’
- Basigasiye umurage wasizwe n’abakurambere ba Reggae
- Bakora injyana ya Reggae itavanzemo urumogi
- Bashinze studio iwabo mu cyumba
- Binjije asaga miliyoni zirindwi mu myaka icumi bamaze
- Imihigo ni uruhuri…

Strong Voice, ni itsinda rihuriwemo n’abahanzi batandatu bavukana mu nda kuri Kamere Antoine na Tuyisenge Jacqueline. Batuye mu Karere ka Nyarugenge, Umurenge wa Nyarugenge mu Kagari ka Agatare mu gace ka Biryogo.

Ni itsinda rihuriwemo n’abana b’inkurikirane : Dusabimana Heritier (28), Eric Nsengiyumva(26), Uwase Carine (24), Nteziryayo Patrick (22), Uwimana Rachel(20) na Niyigena Pacifique(18).

Buri wese afite umwihariko we mu itsinda, Heritier acuranga gitari basse, Patrick agacuranga acoustique. Nsengimana Eric ni we ucuranga piano mu gihe bashiki babo Carine na Rachel baririmba mu majwi y’inyuma (backup vocalists).

Umuhererezi wabo, Niyigena Pacifique ni we ucuranga ingoma yabyize afite imyaka icyenda abisabwe na bakuru be. Patrick ati “Twatangiye tudafite uwo gucuranga ingoma, Paci(Pacifique) yari gato cyane ariko tumusaba kwiga ingoma. Yabimenye mu byumweru bibiri gusa.”

Imizi ya Strong Voice

Dusabimana na Nteziryayo Patrick ni bo bazanye igitekerezo cyo gushinga iri tsinda mu mwaka wa 2006. Icyo gihe se yari yarabashakiye umuntu ubigisha gucuranga gitari witwa Kayibanda Bakari, na we yari umuhanzi ukomeye wa Reggae.

Patrick ati “Tumaze kumenya gucuranga, njye na Heritier twatekereje gushinga groupe ariko tugira imbogamizi. Twari babiri, tunacuranga gitari gusa […] Carine na Rachel baje kwinjira mu itsinda nk’abaririmbyi duhita dushinga iyitwa Kidz Voice kuko twari tukiri utwana duto.”

Kamere, se w’aba bana na we ni umucuranzi ukomeye wa gitari ndetse ni we usa n’uwabahumuye amaso mu bya muzika.

Ukwibyara...

Mu 1972 yacurangaga mu bitaramo n’ibirori bitandukanye, amaze kubyara ngo yifuje gusangiza impano ye abana be ari na byo byakuze bivamo ivuka rya Strong Voice.

Heritier, imfura muri bo ati “Ni muzehe dukesha byose, yakundaga gucuranga mbese njyewe nakuze mubona acuranga. Yaje kudushakira mwarimu wa gitari, buriya impano iruvukira twigishijwe mu gihe gito duhita tubifata.”

Aba bavandimwe bagize Strong Voice, bahuje nyinshi mu mpano n’ababyeyi babo zirimo gucuranga no kuririmba.

Tuyisenge Jacqueline na we ngo asigaye yiyumvamo ubuhanzi, nubwo adahanga nk’abana be ariko iyo bacuranga iwabo mu rugo kenshi yigana ibyo bakora haba kuririmba no gucuranga gitari.

Abana batandatu yabyaye bavukanye impano zitandukanye mu muziki.

Mu kiganiro yagiranye na IGIHE, Tuyisenge Jacqueline yasobanuye ko mu rugo rwe nta rungu riharangwa. Bose uko ari umunani [kuva kuri Kamere kugeza ku muhererezi yabyaye] buri wese yigaragaza mu isura ye nk’umuhanzi.

Yagize ati “Biba ari ibintu bishimishije cyane kuko usanga umwuka ari umwe, abana banjye bose ni abahanzi kandi nk’umubyeyi biranezeza.”

Iwabo mu rugo, babana kirasita

Nasuye aba bahanzi mu rugo iwabo, ibyo nabonye byanyeretse ko koko ‘impano yivukira’. Patrick ni we wari warandangiye aho batuye, nagezeyo ahagana saa kumi n’imwe z’umugoroba.

Nabasuye by’igitunguro ariko ncyinjira iwabo natunguwe n’uko babayeho. Udashishoje neza wakeka ko ari urugo rukora imiziki. Nasanze umuto muri bo (Pacifique) ari gutunganya ibyuma biteguye gukora repetitions za nimugoroba.

Nyina yari afashe gitari asa n’usubiramo ibyo yigishijwe, ngisuhuza bose bahagaritse ibyo barimo baza kunyakira. Banzaniye intebe nicara hanze kuko mu ruganiriro hari huzuye ibyuma basa n’abiteguye igitaramo.

Nyina w’aba bana yaranganirije ndamwibwira, amenye ko ndi umunyamakuru yahise ahamagara Pacifique ngo aze ansuhuze ndetse telefone zitangira gucicikana babwirana ko umunyamakuru yabasuye bityo ngo batahe bwangu.

Yatangiye kunshyira mu biganiro bigaruka ku bana be ndetse akambwira ko ‘yiyumvamo imbaraga zidasanzwe kubera ubuzima abanyemo n’abana be.

Mu gihe twari dutegereje ko abandi bahagera, Pacifique we yasubiye mu nzu gukorogoshora ibyuma byasohokagamo akaziki gake ka Reggae ukabona nyina yizihiwe azunguza umutwe nka bimwe by’abarasita.

Patrick yahageze ari kumwe na mushiki wabo mukuru witwa Carine. Uyu mukobwa ntakibana na bo kuko yashakiye i Gisenyi aho abana n’umugabo. Mu kanya gato haje Heritier na murumuna we Eric ukora muri banki mu Mujyi wa Huye.

Mu ndamukanyo zabo, higanjemo amagambo ya kirasita ndetse n’imitako yo mu rugo, imigirire n’imitekerereze byabo ubona ko ari ibya kirasita.

Strong Voice n'umubyeyi wabo, bose bahuje inganzo yo kuririmba

Byahise bihinduka nk’igitaramo kuko batangiye gucuranga nyinshi mu ndirimbo zabo zo mu njyana ya Reggae. Iyo bakora repetions mu rugo nyina aba yicaye iruhande rwabo ukeneye amazi yo kunywa akayamuha, ibidacometse neza akabarebera. Biguha ishusho y’ubwuzuzanye n’uburyo tsinda rishyigikiwe n’umuryango.

Itsinda rishyigikiwe n’ababyeyi

Nyina w’aba bana, yavuze ko we n’umugabo bashyigikiye iri tsinda kuva ryashingwa ndetse mu ryo rikora byose rihabwa ubufasha bushoboka mu muryango.

Nubwo hari ababyeyi bazitira abana bakabuza gukora umuziki ngo kuko bibashora mu ngeso mbi, kuri uyu muryango siko bimeze.

Ati “Bose mu mashuri bagiraga amanota meza. Ntabwo navana umwana mu muziki ngo ni ukubera ishuri kandi anyereka indangamanota imeze neza. Umwana yaba aba uwa mbere igihe cyose ukamuburiza iki gukora ibyo ashaka?”

Tuyisenge Jacqueline, umubyeyi w'aba bana

Jacqueline n’umugabo we bitabira ibitaramo bya Strong Voice ndetse babashyigikira muri byinshi. Mu mwaka ushize bitabiriye iserukiramuco mpuzamahanga rya Doa Doa International Music Festival muri Jinja, Uganda, icyo gihe baherekejwe na se.

Jacqueline kandi ngo azishima bikomeye nabona abana be bamenyekanye ku rwego mpuzamahanga ndetse ngo afite icyizere.

Yabanje gukubita igitwenge , ati “Nifuza ko bagera ku rwego mpuzamahanga, bazabigeraho cyane. Birimo biraza…”

Strong Voice, itsinda rifite imihigo

Mu mwaka wa 2011 bakoreye ibitaramo mu Burundi ahitwa CCF, Musee Vivant, mu Gitega n’ahandi. Bavuyeyo bahembwe imodoka, gusa baje kuyigurisha baguramo indi nziza ibatwara mu kazi ka buri munsi.

Bitabiriye amaserukiramuco atandukanye : FESPAD, Isaano Festival, baserukiye u Rwanda muri Doa Doa International Music Festival, KeshA Festival.

Kuva mu mwaka wa 2011, baririmbye muri Kigali Up Music Festival inshuro zose imaze iba. Banitabiriye ibitaramo bikomeye by’abahanzi bakora Reggae byabereye mu Rwanda.

Bashinze studio mu cyumba

Dusabimana Heritier avuga ko mu myaka igera ku icumi bamaze baririmba, babashije kwinjiza amafaranga agera kuri miliyini zirindwi uvanyemo ayo bakoresheje mu kazi ka muzika n’ayo batakaje mu ngendo bakora.

Ati “Ugereranyije tumaze kwinjiza miliyoni nka zirindwi, ubwo mbaze mvanyemo ayo twakoresheje ku ruhande n’ayo twatakaje. Bigenda biza, hari icyizere ko amafaranga aziyongera.”

Undi musaruro bavanye mu muziki, bawushinzemo studio yabo bwite bakoreramo indirimbo zicuranze mu buryo bwa live. Yabatwaye agera kuri miliyoni n’ibihumbi magana atanu (1,500,000).

Imyitozo ya live bayikorera mu rugo

Patrick avuga ko yabakemuriye ikibazo bagiraga cyo kujya gukoresha indirimbo mu Burundi kuko ariho babonaga studio zikora umuziki wa live.

Ati “Turi gukoreramo album ya kabiri yitwa ‘Ukuri’ n’indi ya Gatatu […] Ubu dufite studio yacu, dusigaye twikorera indirimbo zacu, mbere twajyaga mu Burundi ariko ubu byarakemutse. N’izindi zizaza ari album zifite ireme.”

Inzozi ni uruhuri

Mu byifuzo biruta ibindi Strong Voice ifite ni ugukora umuziki nk’akazi ka buri munsi ndetse izina ryabo rikamenyekana ku Isi bikabarirwa mu bihanganye nka ba Bob Marley, Lucky Dube, Peter Tosh n’abandi.

Ikindi gikomeye ni uko bifuza ko injyana ya Reggae yahabwa agaciro ntifatwe nk’iy’abanywa rumogi.

Heritier ati “Badufata nk’abanywa urumogi ariko siko bimeze. Turi abana bafite icyerekezo, tubana n’ababyeyi, muri twe nta rumogi ruharangwa. Twigisha amahoro, dutanga ubutumwa bwigisha guhindura Isi nziza.”

Mu biganiro byabo, usanga bakoresha imvugo za kirasita nka ‘Babylon’, Jah Rastafari, amahoro, Selassie n’izindi.

Strong Voice yashimiye se na nyina, ngo ababyeyi babo ni bo babaharuriye inzira mu buhanzi. Ni bo bubatse umuzingi mu muziki kuva mu 2006, kuva ubwo kugeza ubu baraganje mu bwema n’ubwemarare.

Patrick na Pacifique bari mu nganzo, umwe aravuza umwirongi undi akamwunganira na gitari
Uwase Carine, yashinze urugo ariko aguma mu itsinda ry'abavandimwe be
Umuhererezi muri uyu muryango ni we uvuza ingoma

Amafoto: Eric Niyonkuru


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .