00:00:00 IGIHE NETWORK KN KINYARWANDA EN ENGLISH FR FRANCAIS

The Ben ugendana ‘umujinya mutagatifu’, amaso ayahanze Papa Francis

Yanditswe na

Munyengabe Murungi Sabin

Kuya 9 September 2015 saa 12:50
Yasuwe :

The Ben agendana ishimwe n’inyota ikomeye ku mutima nyuma y’ibihe atazibagirwa mu buzima bwe ubwo yacurangiraga mu maso y’abagabo bubashywe ku Isi barimo LGen Roméo Dallaire, Ban Ki-moon n’abandi.

Mugisha Benjamin wiyita Intare Gisa mu myaka yose amaze ku Isi by’umwihariko mu muziki, ngo hari ibihe bidasanzwe yanditse ku mutima ku buryo hari igihe bigaruka mu ntekerezo ze agaturika akarira.

Uyu muhanzi ukorera umuziki we mu Mujyi wa Chicago muri Leta Zunze Ubumwe za Amerika, ngo ntazibagirwa na rimwe ibihumbi by’abantu bitabiriye igitaramo cyo kumurika album ya mbere yise ‘Amahirwe ya Nyuma’.

Imvano y’uyu mujinya mutagatifu

Amashusho y’ibyabereye muri iki gitaramo yakoze mu mwaka wa 2009 yanze gusibangana mu mutima we. Icyo gihe benshi bararize, abandi barakomereka kubera umuvundo wari mu bafana buri wese abyiganira kureba ‘The Ben’ wabicaga bigacika mu ndirimbo ‘Amahirwe ya Nyuma’, ‘Wigenda’ n’izindi.

The Ben na we yabonye iby’uyu muvundo n’uburyo amagana y’abafana yaheze hanze na we yaraturitse arira ay’abana mu maso y’itangazamakuru n’abakunzi be.

Ni cyo gitaramo cy’amateka cya nyuma yakoze mbere y’uko ava mu gihugu akajya kuba mu mahanga uruberera.

Ubuzima abamo nyuma y’uko kuva mu Rwanda ahora akumbura iteka ibihe yagiriye i Kigali n’indi minsi atazibagirwa yahaweho amahirwe yo kwiyereka amaso y’Isi.

Kure y’amaso…

Ku itariki ya 4 Nyakanga 2010 nibwo The Ben yerekeje muri Amerika kuririmba mu gitaramo cyiswe ‘Urugwiro Conference’ ahita afata umwanzuro wo kugumayo.

Imyaka itandatu igiye gushira uyu muhanzi akorera umuziki we muri Leta Zunze Ubumwe za Amerika gusa izina ryabaye ‘isereri’ mu mitwe y’abakunda ibihangano bye.

Kure y’amaso si kure y’umutima! Nubwo ari mu bihugu bya kure aho maso atagera, abafana be ntibamukuyeho amaboko ahubwo bagenda biyongera uko imyaka ishira indi igataha.

Muri iyi myaka amaze imahanga, yakoze indirimbo zuje uburyohe ku bakunda ibihangano biganisha ku rukundo. Zimwe muri zo yazihuriyemo n’abahanzi bakomeye izindi azifatanya na bagenzi be bo muri Press One. Umudiho wazo ni inyuramatwi kuri benshi upimiye ku mibare y’abazumva ku mbuga nka YouTube n’ahandi.

Zimwe mu ndirimbo yakoreye muri USA harimo nka ‘Nzakubona’, ‘She Is Amazing ft Sean Nity’, ‘Give it to Me’, ‘Turi Kumwe ft Mike E’, ‘I am in love’ n’izindi. Iyo aheruka gushyira hanze yise ‘Ko Nahindutse’, ni imwe mu zifite uburyohe bwihariye ndetse na we ngo niyo arutisha izindi yakoze zose.

Mu kiganiro The Ben yagiranye na IGIHE muri Mutarama 2015, yatangaje ko afite intego yo kuzahura ireme ry’umuziki nyarwanda no kuwusakaza ku Isi abifashijwemo n’imbaraga z’Imana.

Incamake y’amateka ye

Mugisha Ben, uzwi ku izina rya The Ben yavutse ku itariki ya 9 Mutarama 1988. Yavukiye i Kampala muri Uganda. Ni mwene Jean Mbonimpa na Esther Mbabazi. The Ben ni umuhanzi nyarwanda uririmba injyana ya RnB/Pop.

Ni uwa kabiri mu muryango w’abana 6 barimo nka Danny (nawe w’umuhanzi nubwo atigeze amenyekana mu Rwanda), Green P (umuraperi mu itsinda rya Tuuf Gangz) n’uwitwa Inoc.

Ajya gutangira ubuhanzi…

Iby’ubuhanzi The Ben yabihereye mu muryango aho yakuze ukundishwa n’ababyeyi be gusenga cyane. Byatumye ajya muri Korali aho yari ari kumwe n’abandi bahanzi bamenyekanye nka Meddy, Lick Lick na Nicolas.

Indirimbo yamenyekaniyeho cyane ni ‘Amaso ku Maso’. Iyi ndirimbo yayisohoye mu mwaka wa 2008, nyuma y’izindi nyinshi zimenyekanye cyane yari yararirimbiyemo Tom Close nka ‘Si beza’ na ‘Mbwira’.

Nyuma yaje gukora indirimbo nka Uzaba Uza (yaririmbanye na Roger), Wirira, Imfubyi, Wigenda, Uri he, Sinzibagirwa, Amaso ku Maso, Amahirwe ya Nyuma, Zoubeda n’izindi zari kuri Album ye ya mbere yise ‘Amahirwe ya Mbere’ yashize hanze mu Kwakira 2009.

Nyuma yaho yaje no gushyira hanze indirimbo nka ‘Ese Nibyo’ n’izindi nyuma aza kwerekeza muri Amerika aho yaje gukomereza ubuhanzi bwe. Indirimbo ya mbere yakoreye muri USA yitwa ‘Turi Kumwe’ ayihuriramo n’umwe mu batunganya indirimbo witwa Mike Ellison.

The Ben ahamya ko umuziki yawutangiriye mu rusengero ndetse nyina ngo ni we wamukundishije kuririmba.

Yagize ati “Nkiri hagati y’imyaka itatu n’itanu mama ambwira ko aribwo nagaragaje gukunda kuririmba cyane. Uko nakuze ni nako nagiye ndirimba mu nsengero zitandukanye byari iby’igiciro kinini.”

Indirimbo ya mbere yakoze

Ati “Hari muri 2008. Indirimbo yanjye ya mbere yitwa ‘Amaso Ku Maso’ yakozwe na Producer Nicholas ni inshuti yanjye magara kuva ngitangira umuziki.”

Agendera mu ntambwe za R.Kelly

Kuva yatangira gukora umuziki nk’umwuga, The Ben yagendera ku bikorwa bya R.Kelly, umwe mu bahanzi bubashywe ku Isi. Mu rugendo rw’umuziki we ahora arangamiye kuzahinduka nk’iki cyamamare agahesha ishema igihugu cye.

Ati “Umuhanzi wambereye icyitegererezo ni R.Kelly ndetse ndacyafite inyota yo gukora byinshi mu buryo bujya gusa n’ibye.”

Amafaranga menshi yakoreye bwa mbere

Ati “Bwa mbere mpabwa ikiraka, amafaranga ya mbere nakoreye byari ibihumbi ijana [100.000 frw] ku indirimbo nari nakoze ya PSI muri 2008”.

Iminsi y’amateka akomeye

Ati “Ukwezi kwa Kanama 2009 ni ukwezi ntazibagirwa mu buzima bwanjye. Undi munsi w’amateka akomeye ni igihe nahamagarwaga kujya kuririmba ku cyicaro cya Loni i New York imbere ya Ban Ki-Moon”

Ku butumire bw’umujyi wa Oklahoma muri USA, ubinyujije mu rwibutso rwitwa Oklahoma City National Memorial, ku wa 31 Werurwe The Ben , ni we muhanzi nyarwanda waririmbye mu muhango wo guha igihembo Lt. Gen Romeo Dallaire ku gikorwa yatangije cyo kurwanya ikoreshwa ry’abana mu gisirikare.

Nyuma y’igitaramo, Romeo Dallaire yashimiye The Ben ku kazi yakoze ndetse uyu muhanzi na we akaba avuga ko ari ishema rikomeye yagize.

Ati “Impamvu nta yindi ni uguhabwa umwanya wo kubwira Isi u Rwanda rwa none ko atari rwo rw’ejo hashije, ko ahubwo ari u Rwanda rushingiye ku kuri, ubumwe n’iterambere.”

Aribona he mu myaka 10 izaza?

Ati “Mumyaka 10 ndi kwibona ahantu haruta cyane aho ndi ubu. Ndikwibona ahantu nzabasha guhesha ishema Umunyarwanda wese aho ari hose ku Isi. Kubivuga byumvikana ko bigoye ariko hamwe n’Imana bizashoboka”

Amaso ayahanze i Roma

Nyuma yo gukora ibitaramo byamuhesheje amahirwe yo guhura n’abagabo bubashywe ku Isi nka Ban Ki-Moon n’abandi, kuri ubu uyu muhanzi ategereje ko inzozi yarose agitangira umuziki zo kuzahura n’Umushumba wa Kiliziya Gatulika ku Isi zizaba impamo.

Umuntu rukumbi mu bakomeye ku Isi yifuza guhura na we ni Papa Francis, ngo ni inzozi yakuranye kuva mu buto. Aho agereye muri Amerika ngo yiyumvamo ko bishoboka cyane.

Ati “Umuntu ukomeye ndangamiye, numva ko nimpura na we nzaruhuka ni Papa Francis. Imana izabikora mbigereho”

Perezida Kagame ‘intwari y’ibihe byose’

The Ben afata Perezida Kagame nk’umwana udasanzwe u Rwanda rwibarutse kuko yanyuze mu nzira zitoroshye na busa, abasha gukura igihugu mu mwijima w’icuraburindi, ari naho ahera avuga ko iyi adasanzwe.

Igitera The Ben ishema rikomeye ngo ni uburyo benshi mu Banyarwanda bararirimba ibyiza, iterambere, ubuzima bwiza, amahoro, umutekano, ubumwe n’ubwiyunge n’ibindi ntagereranywa Perezida Kagame yagejeje ku Rwanda.

Yagize ati “Ngize amahirwe ngahura na Perezida wacu namushimira. Namushimira ku bw’ubutwari ntagereranywa no kwitanga yagiriye Igihugu. Kuri njye ni intwari y’ibihe byose u Rwanda rufite.”

Imiryango iracyafunguka

The Ben na Diamond Platnumz batumiwe mu muhango ukomeye wo gutanga ibihembo byitwa ‘Africa Entertainment Awards USA’ ku bahanzi b’ibihangange muri Afurika bizaba ku itariki ya 31 Ukwakira 2015.

Mu minsi mike iri imbere hari ibindi bitaramo yatumiwemo azakorera i Burayi ariko ntaratangaza amatariki nyir’izina bizaberaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .