00:00:00 IGIHE NETWORK KN KINYARWANDA EN ENGLISH FR FRANCAIS

The Ben ugiye kuririmbira i Burayi bwa mbere arakubita agatoki ku kandi

Yanditswe na

Munyengabe Murungi Sabin

Kuya 23 December 2015 saa 11:30
Yasuwe :

The Ben uba mu Mujyi wa Chicago muri Leta Zunze Ubumwe za Amerika amaze amezi atatu akora imyitozo yo kuririmba Live mu gihe yitegura kujya kuririmbira i Burayi ku nshuro ya mbere kuva yatangira umuziki.

Mugisha Benjamin wiyita Intare Gisa agiye kumara imyaka itandatu muri Leta Zunze Ubumwe za Amerika, aho asigaye akorera umuziki. Mu myaka igera ku icumi amaze aririmba, ngo ntiyigeze agira amahirwe yo kujya gukorera igitaramo ku Mugabane w’u Burayi.

Muri Werurwe 2016, The Ben azaririmbira mu Mujyi wa Bruxelles mu Bubiligi aho ategerejwe n’umubare munini w’abafana be biganjemo Abanyarwanda n’abo mu bihugu bihana imbibi n’u Rwanda batuye i Burayi.

Iki gitaramo cya mbere azakorera i Burayi, ngo yagishyizemo imbaraga nyinshi kugira ngo azahave akoze ku mbamutima za buri mufana uzaza kumushyigikira ubwo azaba amurika album ya Kabiri yise ‘Ko Nahindutse’.

Yagize ati “Ni ubwa mbere ngiye gukorera igitaramo i Burayi kuva natangira kuririmba. Ni ibintu bikomeye cyane, hariya hari abantu benshi bantegereje nanjye ntabwo nkiryama ndakora uko nshoboye ngo nzakore igitaramo ku buryo buri mufana nzamusiga yishimye.”

Muri iki gitaramo cya mbere azakorera i Burayi ngo yiteze ibihe bijya gusa n’ibyo yagiriye i Kigali muri 2009 ubwo yamurikaga album ya Mbere abafana bamwe bagataha barira kubera umubyigano wababujije kwinjira.

Mu kumurika album ya mbere ya The Ben benshi bararize, abandi barakomereka kubera umuvundo wari mu bafana buri wese abyiganira kureba ‘The Ben’ wabicaga bigacika mu ndirimbo ‘Amahirwe ya Nyuma’, ‘Wigenda’ n’izindi.

Muri iki gitaramo kizaba muri Werurwe 2016, The Ben ngo yiteguye kuzaboneramo ibitangaza birusha imbaraga ibyabereye i Kigali amurika album ya mbere.

The Ben ari mu myiteguro yo kujya kumurika iyi album mu gihe ari gukurikirana imirimo ya nyuma y’amashusho y’indirimbo aherutse gushyira hanze yise ‘Nta cyadutanya’ ahuriyemo na Princess Priscillah.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .