00:00:00 IGIHE NETWORK KN KINYARWANDA EN ENGLISH FR FRANCAIS

Tom Close na Muyoboke bavanye ku ishyiga inzigo bamaranye imyaka ine

Yanditswe na

Ibambe & Sabin

Kuya 20 April 2014 saa 01:44
Yasuwe :

2006-2010, ibihe by’ubufatanye muri muzika hagati y’abagabo babiri bafite amazina akomeye muri muzika yo mu Rwanda, Tom Close na Muyoboke. 2010-2014, ibihe by’umwiryane, urwango n’iteranamagambo hagati yabo. Ibi byose byashyizwe ku ndunduro mu ntangiriro z’iki cyumweru ndetse umubano wa Tom Close na Muyoboke wongeye kuba mwiza. Ese aba bagabo bari barapfuye iki? Baba se benda kongera gukorana nka Manager n’umuhanzi? Tom Close na Muyoboke babanye mu cyaro Aba bagabo bombi, Muyoboke na Tom (...)

2006-2010, ibihe by’ubufatanye muri muzika hagati y’abagabo babiri bafite amazina akomeye muri muzika yo mu Rwanda, Tom Close na Muyoboke. 2010-2014, ibihe by’umwiryane, urwango n’iteranamagambo hagati yabo. Ibi byose byashyizwe ku ndunduro mu ntangiriro z’iki cyumweru ndetse umubano wa Tom Close na Muyoboke wongeye kuba mwiza. Ese aba bagabo bari barapfuye iki? Baba se benda kongera gukorana nka Manager n’umuhanzi?

Tom Close na Muyoboke babanye mu cyaro

Aba bagabo bombi, Muyoboke na Tom Close, baziranye kuva kera bakiba mu cyaro mu Burasirazuba bw’u Rwanda. Muyoboke Alex yiganye na mukuru wa Tom Close mu mashuri yisumbuye ndetse muri Kaminuza Tom ahura na Muyoboke ari naho yatangiriye gufashiriza uyu muhanzi mu muziki. Mu kiganiro yagiranye na IGIHE, Muyoboke Alex yadutangarije ko azi Tom Close kuva akivuka kugeza ashinze urugo.

Muyoboke na Tom Close batangiye gukorana mu mpera za 2006

Muyoboke ati, “Tom Close muzi kera, navuga ko yavukiye iruhande rwanjye kuko ndi mu kuru kuri we. Kera yitwaga Junior, muzi kera cyane kuva tukiba hariya iwacu. Niganye na mukuru we witwa Bob muri secondary, twongera guhurira muri Kaminuza”

Kuba barabanye mu cyaro, bavuka mu gace kamwe kandi bakaba bari baziranye cyane nk’abavandimwe, ni imwe mu mpamvu nyamukuru yatumye Muyoboke na Tom Close bakorana bizeranye nubwo hajemo agatotsi bagatandukana.

Tom Close na Muyoboke muri Kaminuza Nkuru y’u Rwanda

Tom Close na Muyoboke Alex uretse kuba barahujwe n’umuziki, bombi banize muri Kaminuza y’u Rwanda ubwo yari ikitwa Kaminuza Nkuru y’ u Rwanda, aho Muyoboke yize akanarangiza mu ishami rya Social Work naho Tom Close akiga mu ishami ry’Ubuganga.

Kubera ko mukuru wa Tom Close yari inshuti magara ya Muyoboke, Tom Close ubwo yari agiye muri Kaminuza yarangiwe Muyoboke nk’umuntu wo kunyuraho akamumenyereza. Ibi ni nako byaje kugenda nk’uko Tom Close yabitangarije IGIHE kuko Muyoboke asa nk’aho ariwe wamumenyereje muri Kaminuza.

Nyuma nibwo baje kuvugana ibijyanye n’ubufatanye mu muziki, aho mu mpera za 2006 batangiye gukorana.

Muyoboke na Tom Close babanye mu nzu imwe

Mu mpera z’umwaka wa 2006 Muyoboka Alex wakoranaga bya hafi na Humble Jizzo(Urban Boyz) ari na we yabereye manager mu muziki ku nshuro ya mbere, nibwo yamenye ko hari umuhanzi witwa Tom Close wari mushya muri Kaminuza Nkuru y’u Rwanda, ishami rya Huye. Humble Jizzo ni we wabaye imbarutso yatumye Muyoboke yemera kuba manager wa Tom Close muri muzika.

Tom Close yakoranye indirimbo nyinshi na The Ben agifashwa na Muyoboke

Kugeza mu ntangiriro za 2007, Humble Jizzo yaririmbaga ku giti cye ariko akaba yarakundaga uburyo Tom Close yaririmbaga bityo agahoza Muyoboke ku nkeke amusaba ko yafasha mugenzi we bombi bakazamukira rimwe.

Muyoboke yatangiye gukorana na Tom Close mu buryo bweruye mu mwaka wa 2007. Icyo gihe, uyu muhanzi yakoraga Hip hop ndetse afite indirimbo nyinshi yakoze muri iyi njyana .

Muyoboke akimubona, yamusanzemo impano ikomeye ahita amufasha kujya kwa Producer Mozey amukorera indirimbo yitwa Mbwira afatanyije na The Ben. Nyuma y’iyi ndirimbo hari izindi nyinshi Tom Close yakoze abifashijwemo na Muyoboke ari nazo zatumye azamuka cyane mu muziki nka za Sibeza, Ntibanyurwa, Mbwira yego, Mama w’abana n’izindi.

Mu mwaka wa 2009, Muyoboke na Tom Close baje kubana mu nzu imwe ahitwa ku Mumena i Nyamirambo. Nyuma haje kuzamo utubazo, aba bagabo baratandukana.
Amakuru IGIHE ifitiye gihamya ni uko batandukanye mu nzu bitewe na Tom Close waje gupakira ibye byose aragenda Muyoboke atashye asanga ibintu byahindutse.

Nyuma baje kwicarana n’inshuti zabo za hafi bakemura utubazo bari bagiranye umubano urakomeza ariko ibibazo ni bwo byatangiye kuzamuka ndetse n’itangazamakuru rimenya ko ishyamba atari ryeru hagati yabo.

Impamvu nyamukuru yatumye batandukana

Igitaramo cya mbere cyo kumurika album, Tom Close yagiteguriwe na Muyoboke ku itariki ya 16 Gicurasi 2008 kikaba cyarabereye mu cyahoze ari Kaminuza Nkuru y’u Rwanda. Iki gitaramo cyitabiriwe n’abahanzi basaga 30 bari baturutse i Kigali ndetse cyitabirwa mu buryo budasanzwe. Mu mwaka wa 2009, Muyoboke yafashije Tom Close gutegura ikindi gitaramo gikomeye cyiswe SIBEZA nacyo cyiritabirwa cyane.

Ibibazo byatangiye kuvuka mu mwaka wa 2010. N’ubwo aba bahanzi ubwabo batarerura ngo bavuge impamvu nyamukuru yatumye batandukana, amakuru dufite yemeza ko hagati mu mwaka wa 2010 aribwo ibintu byatangiye kuba bibi.

Imbarutso nyamukuru yo gushwana yaba yaraturutse ku kutumvikana ku buryo bwo kugana amafaranga yari yavuye mu gitaramo Tom Close yitabiriye cya MTN Tuwukate maze bamaze kumwishyura amafaranga ayakubita umufuka.

Ahagana mu kwezi kwa Nzeli 2010 , Muyoboke na Tom Close bagiranye ikibazo gikomeye ari nacyo cyatumye batandukana ariko kugeza ubu ntibarakivuga.

Nubwo bo ubwabo batapfa kuvuga icyo bapfuye, amakuru tuvana mu nshuti zabo bombi, yemeza ko umukobwa Tom Close yakundaga yaba yarateje ikibazo hagati yabo kuko byageze igihe na Muyoboke akifuza kumugiraho uburenganzira mu rukundo undi yabona bitamushimishije agahitamo kurekana na Muyoboke aho kubura umukunzi we.

Muyoboke na Big Farious bari babukereye mu bukwe bwa Tom Close

Nk’uko Muyoboke yabyemereye IGIHE, muri Nzeli koko nibwo batandukanye ariko bakomeza kubihisha itangazamakuru kugeza igitaramo cyo kumurika album NTIBANYURWA kirangiye Tom Close afata iya mbere mu itangazamakuru avuga ko atagikorana na Muyoboke ku mpamvu atigeze agaragaza icyo gihe.

Muyoboke ati, “Twatandukanye mu kwezi kwa cyenda 2010 ariko ntabwo byahise bimenyekana. Itangazamakuru ryamenye ko twatandukanye mu mpera z’umwaka wa 2010 tumaze kumurika album Ntibanyurwa. Ni Tom ubwe wagiye mu itangazamakuru kuvuga ko twatandukanye, n’abanyamakuru barabimbazaga njye nkavuga ko nta kindi ko contract yarangiye gusa. Ejo bundi aje kunsaba imbabazi, narazimuhaye ariko musaba ko yasubira mu itangazamakuru kubivuga kuko ariho yabinyujije”

Ibibazo by’ingutu kuri Tom Close

Ni inde wavuzweho gushishura (kwigana) indirimbo? Ni ide wateranye amagambo n’abanyamakuru? Ni ide wavuzweho kwambura amafaranga? N’ibindi, Ni Tom Close n’ibindi. Ng’ibyo ibihe byakunze kuranga Tom Close kuva mu mwaka wa 2011 kugeza hafi mu mpera za 2013 mu gihe yasaga nk’aho ariwe wikurikiranira ibikorwa bya muzika.

Mu bibazo byazutaguje Tom Close muri ibyo bihe harimo guhangana n’abavugaga ko yiganye cyangwa yibye indirimbo z’abandi. Kenshi yagiye abihakana ariko ugasanga ibyo bivugwa bisa n’ibimuzitira mu rugendo rwe rwa muzika.

Ikindi kibazo gikomeye yaje guhura nacyo, ni icy’ubwambuzi yagiranye na Dj Zizou aho byavugwaga ko Tom Close yanze kwishyura amafaranga angana n’amadorali 100 bari bavuganye ajya kumukorera akazi kuri album ye.

Aya mafaranga yateje ibibazo hagati y’aba bombi birinda iyo bigera mu itangazamakuru ndetse Tom akurira inzira ku murima Zizou ko ntayo azigera amuha n’ubwo yayamugombaga.

Tom Close yongeye kugirana ibibazo bikomeye n’umunyamakuru DJ Adams, ubwo yamuvugagaho muri Studio, maze Tom Close agahaguruka akamusanga aho City radio ikorera agasanga Adams muri studio akamutera hejuru bagatongana rubanda bose babyumva dore ko yamusanze mu kiganiro rwa gati.

Ibi byatumye hari abandi banyamakuru bamwitwaraho umwikomo ndetse nyuma aza kwihohora yemera ko yari yarengereye.

Ikindi kibazo Tom Close yaje guhura nacyo atazibagirwa mu buhanzi bwe, ni igitaramo cye cyahombye ubwo yasaga nk’aho ariwe ubwe wikurikiranira ibijyanye n’ubuhanzi bye byose.

Hari mu gitaramo yakoreye kuri Stade i Remera amurika Album ye yise “Komeza utisnde.” Iki gitaramo ntabwo kitabiriwe ku buryo uyu muhanzi atazacyibagirwa mu mateka ye y’ubuhanzi.

Tom Close yanze gutaha ubukwe Bwa Muyoboke

Ku itariki ya 08 Ukuboza 2012 nibwo Muyoboke Alex yasezeranye n’umugore we. Ubu bukwe bwabereye i Nyamirambo bwitabiriwe n’abahanzi benshi bo mu Rwanda harimo abo yakoranye nabo ,abafasha mu muziki, abaterankunga ba muzika batandukanye.

Mu bahanzi bose Muyoboke yagiranye nabo ubucuti bakiri kukaminuza, abo babanye muri Uganda, abo yamenyaniye nabo i Kigali, abenshi bari batashye ubu bukwe gusa Tom Close we ntiyahakandagije ikirenge kandi yari yarahawe ubutumire bwo gutaha ubukwe.

Muyoboke yatashye ubukwe bwa Tom Close

Ku itariki ya 30 Ugushyingo 2013, Tom Close yambikanye impeta na Tricia Niyonshuti. Ubu bukwe nabwo bwatashywe n’abahanzi benshi bakomeye mu Rwanda .

Nubwo Tom Close atabashije gutaha ubukwe bwa Muyoboke n’umugore we, uyu mugabo yerekanye ko inzigo yari hagati ye n’uyu muhanzi yarangiye. Muyoboke ari kumwe na Big Farious, yubahirije ubutumire yahawe na Tom Close ataha ubukwe bwe.

Nubwo Tom Close atatashye ubukwe bwe, Muyoboke we yatashye ubw'uyu muhanzi

Benshi mu babonye uyu mugabo kwa Tom Close, bahise babona ko ibibazo bari bafitanye mu myaka ine ishize bishobora kuba bigiye kugera ku ndunduro ndetse ni nako bigenze.

Nyuma yo kurushinga na Tricia, Tom Close yateye intambwe yo gusaba imbabazi

Ubwo hatangazwaga ko aba bagabo biyunze ndetse ko Tom Close ariwe wateye intambwe yo gusaba imbabazi n’ubwiyunge, hari abavuze ko byaba byaraturutse ku kuba Tom Close yaba yarasanze atari byiza gukomezanya urwango ngo hato rutazakurikirana urugo rwe.

Uko abantu bagendaga batanga ibitekerezo hari abavugaga ko Tricia ariwe ushobora kuba yaramugiriye inama ndetse akanamusaba ko yakwiyunga na Muyoboke wahoze ari inshuti ye magara, wamubereye umujyanama mu muziki igihe kirekire akanamugeza kuri byinshi.

Tom Close kandi, icyo atangaza kuri iyi ngingo ntabwo gihabanye cyane n’ibyo abantu bavuze. We avuga ko gusaba imbabazi no guhitamo ubwiyunge yabihurijeho n’umugore we Tricia. Ati: “Ni igitekerezo twahurijeho n’umufasha wanjye.”

Ibi byiyongera ku kuba ubwo yatangazaga ko yiyunze na Muyoboke yaragize ati: “Ubu nahinduye ubuzima namaze kuba undi muntu bityo kuri ubu sinifuza ko inzigo yaba yarabaye hagati yanjye na Muyoboke yagira uwo igeraho ku muryango wanjye cyangwa uwa Muyoboke ngo izane urundi rwango.”

Ibyo uyu muhanzi yavuze byerekana ko kuba yarubatse biri mu cyatumye yifuza ko ibintu bihinduka kuri we n’umuryango we, cyane cyane aho we ubwe avuga ngo: “namaze kuba undi muntu bityo kuri ubu sinifuza ko inzigo yaba yarabaye hagati yanjye na Muyoboke yagira uwo igeraho ku muryango wanjye cyangwa uwa Muyoboke.”

Aba bagabo bashobora kuzongera gukorana

Nta kidashoboka munsi y’ijuru. Niba ubufatanye hagati ya Tom Close na Muyoboke bwarigeze kugira icyo bugeraho kandi ku buryo bugaragara, nta cyazabuza ko aba bombi bongera guhura ndetse bagakorana mu bihe bizaza, igihe cyose baba bagikomeje ibikorwa byabo bijyane na muzika.

Tom Close ubwo yabazwaga niba bashobora kuba bakongera bagakorana yatangaje ko ubu afite Kina Music bakorana atakorana n’undi muntu.

Muyoboke nawe yatangaje ko kubera amasezerano afitenya n’abandi bahanzi (Kid Gaju na Social Mula afite muri sosiyete ya Decent Entertainment) adashobora kugira undi akorana nawe ariko akongeraho ko nk’uko bose bari muri muzika bashobora kuzagira uburyo bakorana.

Muyoboke ati, “Ubu nonaha ntacyo natangaza kandi mfite Kid Gaju mfite na Sosiyete ifite Social Mula mubo ikurikirana ntabwo ubu nonaha ndabitekerezaho, nawe amvugisha ntabwo yigeze ambwira ko afite iyo gahunda, ubu nonaha nta gahunda ihari.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .