Mu gihe hashize iminsi mike hasojwe icyumweru cy’icyunamo mu rwego rw’igihugu, bamwe mu bahanzi biyemeje gukomeza gutanga ubutumwa bwo kwibuka inzirakarengane zazize Jenoside yakorewe Abatutsi mu 1994.

Mu kiganiro na IGIHE, umuhanzi Zouzou Zoulaika usanzwe umenyerewe mu mivugo yo kwibuka n’indirimbo z’icyunamo nka ’Turabatashya’ yahimbye akayiririmbana n’abandi bahanzi batandukanye (Masamba, Kizito Mihigo, Emmy, Lil G, Christian Rwirangira, na Uncle Austin), yatangaje ko kwibuka ari uguhozaho.

Ati “Bamwe bibwira ko kwibuka bibaho rimwe mu mwaka, ariko twe duhora twibuka abacu bo kibukwa, kuko ntibajya bava mu bitekerezo byacu. Birakwiye ko habaho igihe kidasanzwe cyo kwerekana agaciro kabo n’ubwo ababishe bibwiye ko bakabambuye”.

Uwo muhanzi kandi avuga ko iyo uhora wibuka uwawe bigufasha gutera imbere no kugira icyo wigezaho, kuko ugira imbaraga zo guharanira kuba umugabo ukaba watera imbere, ukiyubaha, ukanagera kuri byinshi kuko hari abo uba ushaka kwerekana ishema ryabo.

Ati “Ni byiza ko buri wese yajya atekereza kwibuka abacu yiyubaka, anubaka igihugu; bizatuma twese tubiba imbuto y’urukundo, yere muri buri wese, bidufashe ko ibyabaye bitazongera ukundi”.

Muzika, umuti ku muhanzi wacitse ku icumu

Zouzou Zoulaika kandi avuga ko kuririmba no guhimba imivugo ari nk’umuti ku muhanzi wacitse ku icumu kuko bimufasha kuvuga akababaro ke akaruhuka, akanabasha kuruhura no guhumuriza abandi mu butumwa abaha.

Uwo muhanzi kuri ubu aritegura gushyira hanze indirimbo ebyiri zo kwibuka, harimo iyo yise ‘Mpora Mbibuka’ yakoze wenyine, n’iyitwa ‘Ihorere Nyanza’ ari gukorana n’umuhanzi Jean Paul Samputu. Zombi ziri gukorerwa muri Celebrity Music kwa Producer Jimmy uzwiho kuba yarafashije abahanzi benshi mu ndirimbo zo kwibuka.

Biteganyijwe ko izo ndirimbo zizamurikwa tariki 29 Mata, ubwo hazaba hashyingurwa imibiri y’inzirakarengane zazize Jenoside yakorewe Abatutsi i Busasamana mu Karere ka Nyanza, ari nako Zoulaika akomokamo.