Kuri uyu wa gatanu tariki 19 Mata 2013, abahanzi bahatanira kwegukana amarushanwa ya PGGSS ku nshuro yayo ya 3 basuye ibitaro byata ku bantu barwaye indwara zo mu mutwe i Ndera.

Abahanzi uko ari 11 bari mu irushanwa rya Primus Guma Guma Super Star itegurwa na Bralirwa ku bufatanye na East African Prom’oters ku nshuro yayo ya gatatu (PGGSS 3) basuye ibitaro bizwi nka ‘Hopital Neuro-Psychiatrique’ – ‘Neuro-Psychiatric Hospital – CARAES Ndera’ bivurirwamo abafite ibibazo by’imitsi yo mu bwonko no mu rutirigongo, ndetse n’abafite indwara zo mu mutwe, zifata cyane imitekerereze, banabiha inkunga y’amafaranga y’u Rwanda ibihumbi 500.

Aganira na IGIHE, Jean Michel Iyamuremye, ushinzwe ibikorwa by’ubuvuzi muri ibi bitaro, yavuze ko iki gikorwa kibashimishije cyane ku buryo umuntu atapfa kubona amagambo yo gushimira aba bahanzi.

Yagize ati: “Iki ni igikorwa twebwe tutapfa kubona icyo tuvugaho kuko biraturenze. Mwabibonye ko n’abarwayi bari bahari babakiriye bishimye cyane, kubera ko si kenshi ko abantu bafata umwanya wabo bakaza hano gusura abarwayi b’indwara zo mu mutwe. Abenshi usanga batumva ko hano hakorerwa ubuvuzi nk’ubundi. Urumva rero ko kubona abantu b’ibyamamare mu gihugu cyose bafata umwanya bakaza aha, ni iby’agaciro, byadushimishije cyane.”

Avuga mu ijwi rya Bralirwa, Samputu Jacques Patrick, ushinzwe ibikorwa n’inkunga mu ishami ry’imenyekanishabikorwa, yagize ati: “Ubusanzwe, Bralirwa nk’uruganda rugeza ku bantu ibinyobwa bisindisha n’ibidasindisha, ntigarukira aho gusa kuko igira na gahunda z’ibikorwa byo kwita ku baturage. Ni yo mpamvu mu bihe nk’ibi ifata gahunda zo kwita ku bafite ibibazo bitandukanye, ikifatanya nabo, ndetse ikabatera inkunga uko bishoboka. Ni muri urwo rwego twateguye ko abahanzi bari mu PGGSS3 baza gusura ibi bitaro by’abafite indwara zo mu mutwe.”

Abahanzi bose bashimishijwe no kuba basanze aba barwaye babazi ndetse banakunda ibihangano byabo cyane, kuko baririmbagaho gato bagahita babafasha kuyiririmba.

Ibi bitaro, ‘Hopital Neuro-Psychiatrique – CARAES Ndera’, byashinzwe n’abihayimana bitwa ‘Les Frères de la Charité’, mu mwaka w’1972, kikaba kuri ubu kibarirwamo abarwayi 321, ariko bamwe bagenda bakira cyangwa bakaguma baza gukurikirana ubuzima bwabo, ndetse hakanakirwa abandi.

Amafoto:

Abahanzi bahatanira PGGSS 3 basuye ibitaro by'i Ndera

Abahagarariye ibitaro, Bralirwa na EAP

Humble Jizzo avuga mu ijwi ry'abandi bahanzi

Jean Michel Iyamuremye ushinzwe ibikorwa by’ubuvuzi muri ibi bitaro

Bahaye ibitaro inkunga y'ibihumbi 500

Bafashe ifoto y'urwibutso