Ibi bihembo biratangwa mu ijoro ryo kuri iki cyumweru tariki 4 Gashyantare 2024, biraba ari umunsi udasanzwe ku bahanzi bo muri Afurika bashyiriweho icyiciro cyihariye.

Ni ijoro ry’amateka ku bakunda umuziki bitewe n’uko umuhanzi wegukanye iki gihembo aba ashyirwa na benshi ku rutonde rw’abanyabigwi babayeho mu mateka y’umuziki.

Hari abahanzi begukana Grammy bakazamura ibiciro, urugero rwa vuba rukaba Tyla wo muri South Africa wafatwaga nk’umuhanzikazi uri kuzamuka, yatangira guhatana muri ibi bihembo ibiciro bigatumbagira.

Ku rundi ruhande guhatana muri Grammy, bizamura agaciro ku muhanzi dore ko usanga kuva i Kigali kugera i Seoul, buri wese afite inzozi zo kuzatwara iki gihembo nibura rimwe mu buzima bwe.

Iyo uganiriye n’abahanzi b’i Kigali bakubwira ko inzozi zihambaye ari ugutwara cyangwa se kwisanga bahataniye iki gihembo. Nibyo koko n’abahanzi bamaze kugwiza amafaranga usanga aricyo cyifuzo.

Ni kenshi umuhanzi wegukanye Grammy abisangiza abamukurikira bose kuko n’iyo agiye guhenda mu gitaramo ashyira imbere kuba yaregukanye iki gihembo cyangwa akagihatanira.

Ibihembo bya Grammy bitegurwa na The Recording Academy biteganyijwe mu rukerera rwo ku wa Mbere Saa Cyenda ku isaha mpuzamahanga ‘GMT’ ku tariki 5 Gashyantare 2024.

Ni umwaka wa kane wikurikiranya umunyarwenya Trevor Noah araba ayoboye ibi birori biba bitegerejwe na buri wese ukunda ubuzima bw’ibyamamare. Biraza gutangirwa muri Crypto Arena.

Solána Imani Rowe wamamaye nka SZA ahatanye mu byiciro icyenda akaba umuhanzikazi rukumbi ufitemo byinshi. Ahatanye mu cyiciro cy’indirimbo y’umwaka, umuhanzi w’umwaka, album y’umwaka, umuhanzi wa R&B w’umwaka n’ibindi byiciro ahatanyemo.

Ubundi abahanzikazi nka Olivia Rodrigo, SZA, Taylor Swift, Brandy Clark, Billie Eilish, Miley Cyrus na producer Jack Antonoff bahatanye mu byiciro bitandatu.

Indirimbo zasohotse guhera ku itariki 01 Ukwakira 2022 kugeza ku tariki 15 Nzeri 2023 nizo zatanzwe noneho izujuje ibisabwa zishyirwa mu byiciro byo guhatanira ibihembo.

Icyiciro cy’umuhanzi mushya gihataniye; Gracie Abrahas, Fred Again, Ice Spice, Jelly Roll, Coco Jones, Noah Kahan n’itsinda ry’umugore n’umugabo biyise The War and Treaty.

Abahanzi bo muri Afurika umutima uradiha bibaza uza kwegukana igihembo akarushaho guca kuri bagenzi be mu bigwi ku ruhando mpuzamahanga.

Abahatanye mu cyiciro kihariye cya Best African Music Performance cyashyiriweho Abanyafurika barimo; Davido uhatanye mu byiciro bitatu; Best Global Music Performance, Best Global Music Album na Best African Music Performance.

Ahuriyemo na bagenzi be barimo Tyla, Asake mu ndirimbo yakoranye na Olamide, Ayra Starr na Burna Boy na we uhatanye mu byiciro bitatu akarenzaho gutaramira abitabiriye. Ni we muhanzi wo muri Afurika ubigezeho mu mateka ya Grammy Awards

Itangwa rya Grammy Award riranyura imbona nkubone kuri CBS na Paramout+ mu rukerera rwo kuri uyu mbere tariki 5 Gashyantare 2024.

Ukurikije ukuntu indirimbo ya Davido na Musa Keys yitwa ‘Unavailable’ yasoje umwaka wa 2023 iri ku mwanya wa gatatu kuri Billboard US Afro beats Chart, irahabwa amahirwe yo kuza gutwara igihembo.

Abandi bahanzi bahabwa amahirwe ni Tyla ukomeje guca uduhigo akesha indirimbo ‘Water’ iri kurushaho gukundwa kuri Spotify no kuri Billboard Hot 100.

Abandi bahanzi batari abo muri Afurika bashobora kuza gutwara ibihembo bitewe n’umubare w’ibyiciro bahatanyemo barimo, Miley Cyrus, Lana Del Rey, Billie Eilish, Victoria Monét McCants, Olivia Rodrigo,Taylor Swift, na SZA uhatanye mu byiciro icyenda.

Trevor Noah agiye kuyobora umuhango wo gutanga Grammy Awards ku nshuro ya kane

Ibihembo bya Grammy biratangwa mu rukerera rwo kuri uyu wa Mbere tariki 5 Gashyantare 2024