Muri iki cyumweru IGIHE yagusanyirije zimwe mu ndirimbo nshya zamuritswe n’abahanzi batandukanye zumvikanamo abarimo Nel Ngabo, Ruti Joel, Yago Pon Dat, Aimé Uwimana, Davis D, Capslock, Shemi, B- Threy, Zoe Trap, Javanix n’abandi.

“Ivre” – Nel Ngabo ft Ruti Joel

Nel Ngabo yamurikiye abakunzi ba muzika amashusho y’indirimbo “Ivre” iri kuri album ye ya gatatu yise “ Life, Love & Light”.

Amajwi y'iyi ndirimbo yatunganyijwe na Ishimwe K Clement, asozwa na Bulamu Vybz mu gihe amashusho yayo yakozwe na Meddy Saleh.

“Naba Mpumirije” – Aimé Uwimana

Aimé Uwimana yahaye abakunzi b’indirimbo zo kuramya no guhimbaza Imana amashusho y’indirimbo yise “Naba Mpumirije” yatunganyijwe na Dudestin Levis.

“Bedroom Calypso” – Ketchup na Yago Pon Dat

Muri iki cyumweru Yago yamurikiye abakunzi ba muzika Nyarwanda indirimbo ye ya mbere akoranye n’umuhanzi w’umunyamahanga.

Iyi ndirimbo bise “Bedroom Calypso” yayihuriyemo na Ketchup wo muri Nigeria, yatunganyijwe na Prince Kiiz mu buryo bw’amajwi mu gihe amashusho yayo yakozwe na John Elarts.

“Solo” – DJ Pyfo, Shemi na B-Threy

DJ Pyfo umenyerewe mu kuvangavanga umuziki yahurije hamwe Shemi na B- Threy bakorana indirimbo bise “Solo”.

Iyi ndirimbo yatunganyijwe n’aba-Producers bane barimo Romeo Kartel, Huybbie, Jokash1 na Zed w’i Nyamirambo, mu gihe amashusho yayo yakozwe Jewish Brothers na Chico Berry.

“Poropati” – Capslock

Nyuma y’igihe kinini asubitse ibikorwa bya muzika Capslock yagarukanye indirimbo yise “Poropati” igaruka ku musore usezeranya umukobwa urukundo ruzira uburyarya.

Iyi ndirimbo yatunganyijwe na Producer To The Hit ukorera muri The Rayan Music, isozwa na Real Beat mu gihe amashusho yayo yatunganyijwe na Dir Sani B afatanyije n’abarimo Charles na Capslock.

“Ibiceri” – Fejos na Davis D

Fejos yiyambaje Davis D bakorana indirimbo bise “Ibiceri” igaruka ku musore wifuza gukora ibishoboka byose akegukana umutima w’umukobwa bahuye bwa mbere.

Iyi ndirimbo yatunganyijwe na M Motif amashusho yayo akorwa na Bagenzi Bernard.

“Nikoneshe” – Jumper Keellu, DJ Khizzbeats ft Horus Rao

Jumper Keellu umenyerewe mu muziki wa EDM kuri iyi nshuro yunze imbaraga na DJ Khizzbeats ndetse na Horus Rao bakorana indirimbo iri mu njyana ya Amapiano bayita “Nikoneshe”.

“Ibare” – Javanix

Umuraperi Javanix yakoze mu nganzo aha abakunzi be indirimbo eshanu zigize EP (Extended Play) yise “Zamani”.

Iyi EP Yakozweho n’aba-Producer barimo Herbert skills,Logic hit it, Beat Killer na Fazo iriho indirimbo zirimo Zamani, Kwa Nyagasani, Rongora, Inyambo na Ibare.

“Hear It Roar” – See Muzik

Umuririmbyi w’indirimbo zo kuramya no guhimbaza Imana, See Muzik, yashyize hanze indirimbo yise “Hear it Roar” isaba abakirisitu kudatinya igihe bumva Satani abugarije bagomba kwibuka ko Yesu ahora ari umutsinzi igihe cyose.

Iyi ndirimbo yatunganyijwe na T Van mu buryo bw’amajwi mu gihe amashusho yayo yakozwe na Enock Zera.

“Hareruya” – Remedy

Remedy yahaye abakunzi ba Muzika Nyarwanda indirimbo yise “Hareruya” igaruka ku nkuru y’umusore umaze igihe yihiringa ashakisha amaramuko akaba acyibaza igihe ibyo arimo bizarangirira.

Iyi ndirimbo yatunganyijwe na Wayeeh Beats isozwa na Bob Pro, amashusho yayo yakozwe na Sani B afatanyije na Dawest.

“Shit Nshyashya” – Kavu Freestyle ft Zeo Trap

Abasore bahuriye muri Kavu Gang bayohowe na Zeo Trap bahuje imbaraga bakorana indirimbo ya kabiri bise “Shit Nshashya” yatunganyijwe na Bobly mu gihe amashusho yayo yakozwe na Zeo afatanyije n’abarimo Pdj na El-Srim

COLORIST

“Irinde Gusinda Urumogi” – Nessa ft Beat Killer

Umuraperikazi Nessa akomeje kuryohereza abakunzi b’injyana ya Hip hop binyuze mu bihangano bitandukanye abaha buri cyumweru.

Muri iki cyumweru yangeye guhurira mu ndirimbo imwe na Beat Killer bakorana indirimbo bise “Irinde Gusinda Urumogi” isaba akaresha ibiyobyabwenge kubireka.

“Ivu rihoze” – Lish Igisare

Umuraperi Lish Igisare yamurikiye abakunzi ba muzika zimwe mu ndirimbo zigize Mixtape ye ya mbere igizwe n’indirimbo eshanu yise “Ivu Rihoze”

Uyu muraperi avuga ko iyi Mixtape yayise atya ashaka kugaragaza ko nubwo bamwe batamwumva nyamara afite ibikorwa biremereye birenze ibyo batekereza umunsi umwe bazatungurwa no kubibona byageze kure.

“Ko Ngukunda” – Prince Alino ft Racine

Prince Alino yiyambaje Umuraperi Racine bakorana indirimbo bise “Ko Ngukunda” igaruka ku nkuru y’umusore wifuza kubwira umukobwa ko amukunda nubwo we aba atabikozwa.

Iyi ndirimbo amajwi yayo yatunganyijwe na Real Beat asozwa na Bob Pro, amashusho yayo akorwa na Sinta Films.

“Urahambaye”- Jerusalema Choir [ADEPR Rwahi]

Korali Jerusalem yo muri ADEPR Rwahi yamurikiye abakunzi bayo indirimbo bise “Urahambaye” igaruka ku imbaraga z’Imana mu kurinda abantu bayo.

“Data mfasha” – Isharah Alliance

Isharah Alliance ukiri mushya mu muzika y’indirimbo zo kuramya no guhimbaza Imana yamuritse Indirimbo yise “Data Mfasha” igaruka ku gusaba Imana imbaraga zo gukomeza urugendo igihe yumva yacitse intege.