Niba ukeneye gukomeza kuryoherwa na Weekend, IGIHE yagukusanyirije zimwe mu ndirimbo nshya zamuritswe n’abahanzi batandukanye muri iki cyumweru zumvikanamo abarimo, Bruce Melodie, Chris Eazy, Bruce The 1st , Victor Rukotana, Maylo, Josh Ishimwe ,2 For Trap, The Same, Fireman n’abandi.

“Stop” - Chriss Eazy

Chriss Eazy yamurikiye abakunzi ba muzika indirimbo yise “Stop” akinamo urukundo na Igihozo Nshuti Mireille umenyerewe muri sinema.

Iyi ndirimbo igaruka ku musirikare wakunze umuyobozi we (Afande), amajwi yayo yatunganyijwe na Prince Kiiz, amashusho akorwa na Sammy Switch.

“Azana (Agati)” - Bruce Melodie

Bruce Melodie yatanze ibyishimo ku bakunzi ba muzika nyarwanda binyuze mu ndirimbo yise “Azana”.

Iyi ndirimbo itasohokanye n’amashusho yayo, yatunganyijwe na Producer Element.

“First Class” - Bruce The 1st

Umuraperi Bruce The 1st ukomeje kwigarurira imitima ya benshi mu rubyiruko, yashyize hanze mixtape yise “Ask and Receive” igaruka ku buzima bwe mu rugendo rwa muzika.

Iyi mixtape igizwe n’indirimbo zirindwi, zatunganyijwe n’aba-producers barimo Muriro, Pro Zed, Kina Beat, Ehlers On The Track na Bob Pro.

“Imirongo 100” - 2forTrap (Bakame x PillaBoy) na Maylo

Abasore babiri bahuriye mu itsinda rya 2forTrap bahuje imbaraga n’umuraperi Maylo bakorana indirimbo bise “Imirongo 100” iri kuri EP(Extended Play) bise “Mu mutuku”.

Iyi ndirimbo yatunganyijwe n’aba Producers babiri barimo Ehlers na Producer Zed, amashusho yayo yakozwe na Booma.

“Akayama”- Victor Rukotana

Victor Rukotana yamurikiye abakunzi ba muzika nyarwanda Extended Play (EP) ye ya mbere yise “Rukotana I” ikubiyeho indirimbo eshatu zirimo, Akayama, Tubahige na Temba.

“Akayama” imwe mu ndirimbo zigize iyi EP yanditswe na Victor Rukotana na Ras Kayaga, yatunganyijwe na KnoxBeat amashusho yayo yakozwe na Eazy cut afatanyije na 2saint.

“Sinogenda Ntashimye” - Josh Ishimwe

Umuririmbyi w’ indirimbo zo kuramya no guhimbaza Imana ariko ziri mu mudiho w’umuziki gakondo, Josh Ishimwe yamurikiye abakunze b’uyu muziki indirimbo nshya.

Iyi ndirimbo amajwi yayo yatunganyijwe na Boris amashusho yayo yakozwe n’abarimo, Musinga, Peace Marara, Credo Santos.

“Warayobye” - The Same na Fireman

Nyuma y’umwaka bari bamaze abacecetse itsinda The Same ryegereye umuraperi Fireman bakorana indirimbo bise “Warayobye”.

Iyi ndirimbo yatunganyijwe na Niz beats mu buryo bw’amajwi yasojwe na Bob Pro, amashusho yayo akorwa na Sinta Films.

“Toroma” – QD

QD ubarizwa muri sosiyete ifasha abahanzi ya The Rayan Music Entertainment, nyuma y’amezi atandatu yari amaze atagaragara mu bikorwa bya muzika yagarukanye indirimbo yise “Toroma”.

Iyi ndirimbo yatunganyijwe na Ben Pro/To The Hit isozwa na Genius mu buryo bw’amajwi mu gihe amashusho yayo yakozwe na Josh Lenzi afatanyije n’abarimo Sanib, Capslock na Rembo.

“Ngushimire” - Jonathan Nish

Jonathan Nish mu ndirimbo nshya yise “Ngushimire” yakanguriye aba-kristu gushima Imana ibihe byise mu byiza no mu bibi.

Ni ndirimbo yashibutse kuyitwa “Gratitude” ya Brandon Lake yashyizwe mu Kinyarwanda na Nishimwe Jonathan.

Amashusho y’iyi ndirimbo yatunganyijwe na Producer Nish amashusho yayo yakozwe na Cyusa afatanyije na Chrispin.

“Urweze” - Umusizi Murekatete na Nzayisenga Sophie

Umusizi Murekatete yahuje imbaraga n’Umukirigitananga Sophia Nzayiyenga bakorana igisigo bise “Urweze” cyatuganyijwe na De Lou mu buryo bw’amajwi mu gihe amashusho yayo yatunganyijwe na Tag Mayors.

“Inyenyeri” - Abe Star

Abe Star impano nshya muri muzika nyarwanda yamuritse indirimbo ya kabiri yise “Inyenyeri”.

Iyi ndirimbo yakorewe mu Bisumizi aho yageze abifashijwemo n’umuraperi Karigombe, amajwi yayo yatunganyijwe na Evydecks isozwa na Bob Pro mu gihe amashusho yayo yafashwe na Dirictor Max.

“RIP Junior Multisystem” - Slim Jesus na Young Generation

Slim Jesus yahurije hamwe abanyamuziki batandukanye bakorana indirimbo yo guha icyubahiro Junior Multisystem witabye Imana mu minsi ishize bamwifuriza gukomeza kuruhukira mu mahoro.

“Kwiturira mu Rukundo” - Groupe des Jeunes Christus Regnat Busanza

Urubyiruko rugize Groupe des Jeunes Christus Regnat Busanza rwahuje imbaraga rukora indirimbo bise “Kwiturira mu Rukundo”.

Iyi ndirimbo yanditswe na André Ntungiyehe , amajwi yayo yakozwe na Emmy Pro amashusho akorwa n Marcel Proust Tungiyehe.

Groupe des Jeunes Christus Regnat Busanza ni umuryango gatolika w’urubyiruko rwa Centrale Busanza, Paroisse Kanombe, washinzwe mu mwaka wa 2013.