Uyu munsi ngarukamwaka uzajya wizihizwa buri tariki 18 Ugushyingo, mu rwego rwo kuzirikana uruhare uyu muhanzi yagize mu guteza imbere ibijyanye n’imyidagaduro muri uyu mujyi yavukiyemo mu 1992.

Iyi tariki 18 Ugushyingo 2023 niyo Davido yatangirijeho iserukiramuco ryahariwe umuziki wa Afrobeats n’umuco wa Afurika muri Diaspora ryiswe A.W.A.Y (Are We African Yet?) ryabereye muri uyu mujyi mu nyubako ya State Farm Arena yakira abantu barenga 16,888.

Mu kiganiro Meya Andre Dickens yagiranye n’itangazamakuru ku wa 22 Ugushyingo 2023, yashimiye uyu muhanzi ku ruhare agira mu gufasha imiryango itandukanye yo muri Afurika no muri Amerika muri rusange, binyuze mu muziki n’ibindi bikorwa by’ubugiraneza akora.

Ati “Mu izina ry’Umujyi wa Atlanta, ndagushimira imbaraga zawe nk’umuririmbyi uzwi, umwanditsi w’indirimbo, umuyobozi w’ubucuruzi, umugiraneza ndetse n’umuvugizi w’abaturage.”

“Mu mibereho yawe idasanzwe, ukomeza gukoresha urubuga rwawe mu gufasha imiryango muri Amerika ndetse no muri Afurika yose.”

Mu itangazo ryashyizwe ahagaragara n’Inama Njyanama y’Umujyi wa Atlanta bo banditse bagira bati “Twe, abagize Njyanama y’Umujyi wa Atlanta, mu izina ry’abaturage ba Atlanta, twemeje ko ku wa 18 Ugushyingo , ari umunsi wa Davido mu Mujyi wa Atlanta.”

Inama y’abakomiseri y’Intara ya Fulton nayo yahaye icyubahiro Davido, ivuga ko tariki 21 Ugushyingo ari umunsi wo gushimira Davido mu Ntara ya Fulton muri Leta ya Georgia.

Davido yavukiye mu Mujyi wa Atlanta, ahava afite imyaka itanu umuryango we usubira muri Nigeria, ndetse n’abana b’impanga aherutse kwibaruka bavukiye muri uyu mujyi.

Ibitaramo aherutse kuhatangiriza bya A.W.A.Y (Are We African Yet?) Music Festival yabihuriyemo n’abandi bahanzi batandukanye bo muri Nigeria barimo Adekunle Gold, MayorKun, Musa Keys, Spinall, Victony, King Promise, Lo Jay, E Cool usanzwe ari DJ we n’abandi.

Davido ni umwe mu bahanzi bakunzwe hirya no hino ku Isi

Ubuyobozi bw'Umujyi wa Atlanta, bwashyizeho umunsi wahariwe umuhanzi Davido