Umunyamideli ‘Dady de Maximo Mwicira Mitali’, yagize ubutumwa agenera abanyarwanda muri iki gihe cyo kwibuka Jenoside yakorewe abatutsi mu 1994 abinyujije mu muvugo.

Daddy de Maximo aganira na IGIHE yagize ati: “Ubutumwa ntanze mu cyunamo ni igitekerezo umubyeyi wari wihishanye n’umwana we yabona ko bagiye kuvumburwa bakicwa bose ahitamo gusohoka aritanga ngo batamwicira umwana, mukumwica we yarebanaga n’umwana we mu maso, amaso ye n’umutima bisiga impanuro n’inama ku mwana we. Ubutumwa nabwise: Akira Ijambo ndatashye”.

Umuvugo wa Dady de Maximo

"Akira ijambo ndatashye"

Ndagiye,simbishaka

Urasigaye ngo batagushaka,

Ngutaye mu buvumo

Ngo utavumvurwa

Ariko kuba uriho ndiho.

Twihishe hamwe, nguhisha ko ngiye

Ngo uzashishe ntakiriho

Nubwo mpindwa n’ubwoba

Ubwema ndabujyanye

Pfuye nemye,mpagaze nicwa.

Nciriwe mu maso,ariko singuciriye ishyanga.

Inkuba irakubise,amaraso aramenetse

Inkota inyinjiye ntuje; kuko nzi aho ngusize

Igumire aho mwana wanjye ntawuhagusanga

Isi n’abayo bahugiye kurinjye,

Ariko nanjye mbahaye wose barawikwije

Nako bari kuwugabanaaaa ndavuga umubiri wanjye.

Ndize n’abaha intero,

umubabaro wanjye ntiwahagarika ibitero

Igumire aho mwana wanjye ntawuhagusanga

Reka ngende nibashirwa bararuhuka

Ngiye naniwe cyane nabahaye umubiri wose

Na roho yanjye irigukora yihishanye nawe.

Nguhanure ngenda

Simpisemo kwicwa, sibyakiriye ntibikwiye

Sigihe mpawe kuko ubugome ndi kubona

Ntibugira iminota ndiguhutwa nkutaravutse nk’abandi

Ariko ijisho ryanjye uwo rirebye

Ntazanyibagirwa iteka.

Va mu buvumo, ukure ukore

Kora wemye,hitamo neza

Uzananirwa ndabizi, ntuzakundwa udatunze

Ntuzatunga utavunitse

Nutavunika ntuzivura ibikomere.

Uzakire nkanjye,ugwize ubukungu mu mutima

Intero yange kwica, uce bugufi mukaga,

Murwango no kwiheba ukore cyane

Ntuzate umwanya wawe,Isi nabayo niho bakubonera

Ngiye ntabishaka,ariko nshatse ko uba umugabo cyane.

Simpari ngo nzakurerere, sinanze kugutahira ubukwe

Nubyara uzirerere,wirinde guta abawe,ubakunde iteka

Ujye urwana ishyaka, kuryana no gushyashyariza ubyirinde

Uzakundwa kuko ufite icyo utanga

Uzangwa kuko nkuraze ubutwali,Uzatware ingoma yawe

Wirinde izabandi kandi nuba umukaraza mwiza uzahirwa.

Iwacu dukunda abacu uko bameze kose

Ntuzabe inkirabuheri ngo kuko ubu utunze

Uzazirikane ko kubaho kwawe

Bivuye mu mugitambo cy’urukundo

Ngiye utantumye, ndahamagawe ngo nicwe

Ariko gusize ndi kubaseka cyane

Kuko igihe cyacu njye nawe mwana wanjye

Twagikoresheje neza,ngo ineza izagutwaze umuruho

Kandi nubwo utamenyerwa, ijambo nkiri rirawugutwaza.

Ninayo mpamvu uzategura kera hawe

Ndavuga ku Mana Ishobora byose,

Kuko nyuma y’amahoro uziha,

Azaramba uzayageraho nabwo nuyakorera.

Simpemutse kuko nditabye ngo ubeho

Ntawitaba Imana aciwemo kabiri!

Ntawitaba Imana atewe igisongo!

Ntawitaba Imana yicwe urubozo!

Ntawahitamo kwitaba Imana muri izi nzira

Mpisemo gutaramira Imana

Niko intore zigenda.

Izi saha ndi kuvumwa,

niswe amabi yose ngo ukunde ubeho

Igumire mu bwihisho nibyo bituma

Nduhuka neza. Ngiye utantutse ni mahire

Kandi uzabyirinde iteka.

Niswe ikigoryi,ntuzagoryame

Ndikwitwa icyo ntazi kitumva

Uzumvire umutimanama wawe

Niswe inyenzi, inyegamo yawe izabe amahoro kuri bose

Ndatobwe ntabishaka, ariko ururupfu ruzakubere urumuri.

Imyaka ni myinshi, kandi uko ikura nibwo uzankumbura

Uzakunde u Rwanda,wakire amateka ukore ayawe.

Ntuzarebe umunabi uzange inabi

Uzasuzugurwa nabenshi, nuwawe ntazagutinya

uzacunaguzwa henshi

Ntuzace inshuro ahubwo uzigabire amajana.

Uzabyaze umusaruro duke uhawe

Wirinde kwiha iby’abandi

Ngo nunabironka ukandagire abo musangiye amateka

Ngiye ntakuriye, ntuzarye uwo mwakuranye

Ntuzacire uwo mwasangiye amata n’umuruho

Reka njye nyacibwe n’igitambo cy’amahoro i Rwanda

Mbyemeye ntatuje ariko Mata yanditswe niyi

Nawe uzandike iryawe mu mateka.

Kwicwa ndishwe,ngutobwa birabaye

Kubabara ndabijyanye ariko nawe bizagusura

Amateka y’94 ntazasibangana n’inkovu ntizisasibama

Ariko uzasiga ubuvumo wubake heza hawe nah’abandi

Ariko uzasiga ubuvumo, uvome kwiriba rikwegereye

Kandi uzava mu buvumo ugabire abandi

Iki gihugu kiratuje singituye

Iki gihugu kirakeye,ngo mugiture

Iki gihugu kirakeye, ngo mu minuze

Iki gihugu mugiture,musangire byose

Iki gihugu nudatuza,simpari ngo ngusunike

Ahanjye hari aha, ahawe niho hakenewe

Ijambo ryanjye rizagitura iteka,

ariko ibikorwa byawe nibyo bizacyubaka.

Mpumirije ntuje, nakiriwe n’Umwami 94 nyiribyose ariko wowe kuko ukiriho

Umwami wawe kandi ugomba kuyobora n’ubuzima ubu bwo kw’Isi,

nushaka umwami wanjye kandi wacu

Uzabikorere bitinde nabyo urabikwiye

Kuko unyumvise neza,ihanagure uhaguruke

Urire utaboroga,nanjye nabyirinze

Agahinda kazakura buri munsi

Ntikamenyerwa urakivura.

Ngaho rero kibondo kura ngende.