Ishuri OKDALE Kigali Music School risanzwe ryigishiriza umuziki, riratangaza ko mu rwego rwo kwagura ubumenyi bw’Abanyarwanda muri muzika bukagera ku rwego mpuzamahanga rigeze kure rikorana n’ishuri ryo mu Bwongereza ryitwa Gloucester Academy of Music (GAM) ku nyigisho za gitari.

OKDALE Kigali Music School batangaza ko babonye Abanyarwanda bakeneye kwiga umuziki mu buryo mpuzamahanga nk’umwuga, batangira gushaka ubufatanye n’ibindi bigo byateye imbere hirya no hino ku isi mu kwigisha umuziki.

Mu mashuri yaganiriye n’iri shuri harimo ayo mu Budage, mu Bubiligi, mu Bwongereza no muri Amerika nubwo ngo abaje bwa mbere ari abo mu Bwongereza hagatangirirwa ku ishami rya gitari.

Umuyobozi wa OKDALE Kigali Music School Nsabayesu Aimable, avuga ku bushobozi bw’ibi bigo yagize ati “Iwabo bakorera impamyabushobozi zihanitse, PHD n’ibindi muri muzika. Tugendera kuri porogaramu yo mu Bwongereza muri icyo kigo cya Gloucester Academy of Music.”

Avuga ko batangiriye ku ishami rya gitari bigana n’abantu bari bamaze imyaka isaga irindwi bigira muri OKDALE Kigali Music School. Ubu hari umwarimu wo muri GAM umaze amezi atandatu mu Rwanda yigisha aba banyeshuri biga gitari, ariko ngo abarimu basanzwe baza mu Rwanda kwigisha bagasiga batanze impabumenyi y’icyiciro cyigishijwe kuko ngo ubu hamaze gutangwa impamyabumenyi y’icyiciro cya kane mu byiciro umunani bizigishwa kuri gitari.