Minisitiri w’umuco na Siporo, Protais Mitali, yatangaje ko atazongera kwitabira igitaramo cy’umuhanzi uririmbira kuri CD (bita playback), kereka igitaramo uwo muhanzi azajya aba yabuze inkunga cyangwa hari indi mpamvu ifatika yabiteye.

Minisitiri Mitali yatangarije IGIHE ko azajya yitabira igitaramo cy’abahanzi bataririmbira kuri CD, ubwo yari yitabiriye igitaramo cy’umuhanzi Tonzi ku cyumweru tariki 4 Ugushyingo.

Mitali yatangaje ko mbere y’uko aza no mu gitaramo cya Tonzi na bwo yabanje kubaza, ngo amenye ko ataza kuririrmbira kuri CD. Ngo iyo aza gusanga ariko bimeze atari kucyitabira.

Minisitiri Mitali yadutangarije ko bidashatse kuvuga ko atazongera kwitabira ibitaramo bikoresha playback, ahubwo ashobora kubyitabira bitewe n’impamvu, kuko agomba kubanza kumenya impamvu yatumye umuhanzi ategura icyo gitaramo ari playback, niba ari ukubera ko yabuze ibikoresho/ibyuma cyangwa byatewe n’indi mpamvu ifatika.

Agira ati ”ni mu rwego rwo gukangurira abahanzi nyarwanda kurushaho gukangukira kujya bacurangira abantu umuziki w’umwimerere mu gihe baje mu gitaramo aho kuzana ama CD, kuko umuntu ashobora no kuyigura akajya kuyumvira mu rugo.”

Minisitiri Mitali atangaza ko abona umuziki nyarwanda urimo gutera imbere, ariko hari abahanzi bamwe na bamwe usanga bigana ibihangano n’indirimbo z’ahandi.

Ati” Bafata melody (injyana) z’abandi bagahindura amagambo gusa ariko atari umwimerere wabo. Icyo nabasaba ni uko bashaka umwimerere wabo.”

Minisitiri yongeye gusaba abahanzi gushyira hamwe kuko kuba umuhanzi umwe umwe ku giti cye yishakishiriza bitabateza imbere, kandi ko Minisiteri y’umuco yiteguye kubafasha.