Steven S. DeKnight wanditse iyi filime yatangiye umushinga wo gutunganya igice gishya kizibanda kuri Nick Tarabay ukina yitwa “Ashur” mu bice byabanje.

Ikigo STARZ cyarekanye iyi filime cyatangaje ko iki gice gishya kizitwa “Spartacus: House of Ashur”.

Ni igice kizaba gisubiza ibibazo by’uyu mwanditsi Steven S. DeKnight aho agira ati “Byagenda bite niba Ashur atarapfiriye ku musozi wa Vesuvius mu gice cya ‘Spartacus: Vengeance’?.”

“Ese byagenda bite niba yarahawe kuyobora ishuri ry’indwanyi (gladiator) ryari mu biganza bya Batiatus muri Capua mu rwego rwo gufasha Abaroma kwica Spartacus no guhagarika ubwigomeke bwabacakara?”

Iyi filime ishingiye ku nkuru yabayeho y’indwanyi yitwaga Spartacus, yikuye mu bucakara bw’Abaroma, ikayobora umutwe wari ukomeye w’abacakara warwanyije ubwami bw’Abaroma.

Igice cya mbere cy’iyi filime “Spartacus: Blood and Sand” cyasohotse mu 2010, cyari kiyobowe na Andy Whitfield nk’umukinnyi mukuru, gusa mu 2011 yishwe na kanseri asimbuzwa Liam McIntyre wakomeje mu mwanya we nka Spartacus mu bice byakurikiyeho birimo Spartacus Vengeance na Spartacus War of the Damned.

Haribazwa uko bizagenda niba Ashur atarapfiriye ku musozi wa Vesuvius mu gice cya ‘Spartacus Vengeance’

Nick Tarabay ukina yitwa “Ashur” ni umwe mu bazibandwaho muri iki gice gishya cya Spartacus