Abahanga muri sinema batangiye umushinga wo gukora filime igaragaza ibihe byiza Perezida Barack Obama yagiranye n’umugore we Michelle LaVaughn Robinson bagitangira gukundana mu mwaka w’1989.

Nk’uko bitangazwa n’ikinyamakuru Deadline,umushinga w’ iyi filime yiswe ‘Southside with You’ watangiye kunonosorwa n’umugabo w’umuhanga muri sinema witwa Richard Tanne.

Azakinisha abakinnyi mu buryo buzereka Isi yose umunsi wari wuje ibyishimo n’akanyamuneza ku mitima y’ibihangange , Barack Obama na Michelle, ku itariki itazibagirana mu 1989 ubwo bari basohokanye i Chicago bagitangira gupanga ibyo kwiyemeza kubana akaramata.

Muri iyi filime kandi, Richard Tanne na bagenzi be bazamufasha kuyiyobora, ngo bazerekana uburyo urukundo rw’aba bombi rwatangiye gushing imizi bakiri muri kaminuza kugeza ubwo mu 1992 bemeranyijwe ko bagomba kuzabana kugeza umwe avuye ku Isi.

Iyi filime izerekana ishusho y’uko byari byifashe igihe Perezida Barack Obama yigaga mu ishami ry’amategeko muri Kaminuza ya Harvard nyuma akajya kwimeneyereza mu mwuga(stage) mu rugaga rw’abavoka rwa ‘Sidley Austin’.

Mu gihe yahabwaga amahugurwa amufasha kurushaho gucengerwa n’amategeko n’uburyo abunganizi mu nkiko bakora, nibwo yakunze umukobwa witwaga Michelle LaVaughn Robinson wari umuyobozi we.

Umunsi umwe, Michelle Robinson yemereye uyu munyeshuri wimenyerezaga umwuga ko basohokana ndetse kuri uwo munsi nibwo Obama yeruriye Michelle amubwira ko yifuza ko yamubera umukunzi undi na we ntiyazuyaza aramwerera urukundo rwabo rushinga imizi kuva ubwo.

Umunyamideli witwa Tika Sumpter ni we wamaze gutoranywa ko agomba kuzakina mu kigwi cya Michelle Obama, gusa umusore uzakina ari Barack Obama we ntabwo araboneka. Iyi filime izatangira gutunganywa muri Nyakanga 2015.