Uyu mukinnyi wa filime mu butumwa n’amashusho yashyize ku rubuga rwa Instagram yagaragaje ko yari akumbuye u Rwanda ndetse ari mu bikorwa byo gufata amashusho ya filime nshya ari gukinamo.

Yanditse agira ati “Ngarutse mu rwabyaye, Rwanda Naragukumbuye cyane!.”

Konti ya Sonia Rolland igaragaza ko ahugiye mu bikorwa byo gufata amashusho ya filime “Entre Deux” ndetse ninabyo arimo mu Rwanda nk’uko bigaragara mu mushusho yanyujije ku rubuga rwa Instagram.

Iyi filime iri kuyoborwa na Jonas d’Adesky wakoze filime zirimo "Petit pays" yavuye mu gitabo cya Gaël Faye bihuje izina nayo amashusho yayo yafatiwe mu Rwanda mu karere ka Rubavu.

Iyi filime “Entre Deux” Sonia Rolland ari gukinamo iri mu biganza bya Neon Rouge Prodution sosiyete yakoze filime zirimo “The Mercy of the Jungle” ya Joël Karekezi, “Omi Nobu” ya Carlos Yuri Ceuninck , “Dent pour Dent” ya Ottis Ba, n’izindi.

Sonia Rolland ni umukinnyi wa filime wabigize umwuga akaba n’umuyobozi wazo, iyo aherutse gukora yise “Un destin inattendu” yitabiriye iserukiramuco rya simena Film Francophone d’Angoulême.

“Un destin inattendu” igaruka ku nkuru y’umukobwa w’imyaka 18 witwa Nadia ufite inkomoko mu Rwanda, wakuranye inzozi zo kuzakina umukino wa Basketball ntibimuhire akisanga mu marushanwa ya Miss Poitou Charentes biturutse ku bitekerezo bya Se n’inshuti ze.

Sonia Rolland uheruka mu Rwanda mu ntangiro za 2023 yishimiye kugaruka mu gihugu yavukiyemo mu 1981 akahava afite imyaka icyenda

Sonia Rolland ari mu Rwanda mu bikorwa byo gufata amashusho ya filime nshya ari gukinamo yitwa 'Entre-Deux'

Sonia Rolland ubwo aheruka mu Rwanda yasuye Ibitaro bya Ruhengeri biherereye mu Mujyi wa Musanze, anabigenera inkunga yo kugura ibikoresho byo kwita ku mpinja zivukana ibibazo

Sonia Rolland aheruka mu Rwanda muri Werurwe mu 2023