Ikinyamakuru Forbes Magazine gisanzwe gikora intonde z’abanyamafaranga baba barahize abandi mu byiciro bitandukanye, cyashyize hanze urw’abakinnyi 10 b’abagore binjije akayabo kurusha abandi muri Hollywood muri 2013-2014.

Sandra Bullock uzwi cyane muri filime Gravity ni we uyoboye uru rutonde n’amadorali miliyoni 51(£30). Forbes yakurikije umubare aba bakinnyi binjije kuva muri Kamena 2013-Kamena 2014.

Umwaka ushize wa 2013, uru rutonde rwari ruyobowe na Angelina Jolie, icyo gihe Bullock yari ku mwanya wa 7 n’amadorali miliyoni 14. Kubera filime Gravity n’umusaruro w’amafaranga yavanyemo, uyu mukinnyi w’imyaka 50 y’amavuko yaciye agahigo ko kuyobora uru rutonde.

Filime ‘Gravity’, yahesheje Bullock guhatanira ibihembo bya Oscars mu cyiciro cya Best Actress. Iyo aherutse gukinamo yitwa The Heat, ayigaragaramo akinana na Melissa McCarthy ndetse nayo ikaba yaramuhesheje amafaranga menshi.

Jennifer Lawrence wamamaye muri filime Hunger Games, ni we uri ku mwanya wa kabiri na miliyoni 34 z’amadorali. Kuva muri 2013 kugeza ubu, uyu mukinnyi w’imyaka 23 yagaragaye muri filime zakunzwe ndetse zikanamuhesha amafaranga harimo nka X-Men: Days of Future Past , American Hustle n’izindi.

Ku mwanya wa Gatatu hari Jennifer Aniston winjije amadorali miliyoni 31. Mu mafaranga yabonye harimo ayo yakuye muri filime isekeje yitwa We’re the Millers.

Angelina Jolie wari uyoboye uru rutonde mu mwaka ushize, yaje ku mwanya wa Gatanu na miliyoni 18 z’amadorali.

Urutonde rw’abakinnyi 10 b’abagore binjije akayabo muri 2014 :

1. Sandra Bullock : miliyoni 51
2. Jennifer Lawrence: miliyoni 34
3. Jennifer Aniston: miliyoni 31
4. Gwyneth Paltrow: miliyoni 19
5. Angelina Jolie : miliyoni 18
6. Cameron Diaz: miliyoni 18
7. Scarlett Johansson: miliyoni 17
8. Amy Adams: miliyoni 13
9. Natalie Portman: miliyoni 13
10. Kristen Stewart: miliyoni 12

N.B: Aya mafaranga abaze mu madorali