Bwa mbere mu mateka, kuri uyu wa Mbere filimi yakorewe kandi igakinirwa mu gihugu cya Kenya yitwa ‘Nairobi Half Life’ yemerewe kujya ku rutonde rwa filimi zizahatanira igihembo cya Oscar nka filimi ikinwe mu rurimi rw’amahanga nziza.

‘Nairobi Half Life’ yayobowe n’uwitwa David Gitonga ’Tosh’, irahatanira iki gihembo n’izindi filimi mpuzamahanga zaturutse mu bihugu 70 zigomba kujogorwamo eshanu zizahatanira iki gihembo muri iki cyiciro.

Urutonde rwa filimi zatoranijwe ruzatangazwa tariki 10 Mutarama 2013, naho imihango yo gutanga ibihembo bya Oscar muri rusangeyo akaba ateganijwe tariki 24 Gashyantare umwaka utaha i Hollywood muri Leta Zunze Ubumwe z’Amerika.

Igihugu cya Afurika y’Epfo ni cyo gihugu cyo munsi y’ubutayu bwa Sahara kindi cyabashije gutanga filimi ijya guhatana muri iki cyiciro cya filimi zikinnye mu ndimi z’amahanga.

Urubuga rwa internet rwa Africa Review dukesha iyi nkuru ruravuga ko uretse kuba iyi filimi yarerekanywe muri Leta Zunze Ubumwe z’Amerika, yanerekanye mu maserukiramuco ya Sinema atandukanye harimo Durban Film Festival yo muri Afurika y’Epfo, aho umwe mu bakina muri iyi filimi witwa Joseph Wairimu yanegukanye igihembo cy’umukinnyi mwiza.

N’ubwo mwaka wa 2008, filimi yitwa ‘Heart of Fire’ nayo ifatwa nk’iyakorewe muri Kenya kuko yayobowe n’abakinnyi bo muri Kenya ku bufatanye n’Abadage ikaza kujororwa n’Abataliyani yahamagawe yo ariko ntigire amahirwe yo kuza muri filimi eshanu zihatanira igikome, itsinda rya Oscar muri Kenya ryatoranije iyi filimi ryatangaje ko rifite icyizere ko yo izakomeza kuko urwego rwa Sinema muri Kenya rumaze kugera ku rwego rushobora guhangana n’izindi filimi mpuzamahanga.

Ibihembo bya Oscar mu rwego rwa Sinema bifatwa nk’igihembo cy’ikirenga muri uru rweg aho uwagifashe aba yubashywe ku rwego mpuzamahanga.