Umunyarwanda Kivu Ruhorahoza yahembwe ibihembo bibiri bikomeye mu bihembo icyenda byatanzwe mu muhango wo gosoza iserukiramuco nyafurika ry’amafilme ku nshuro yaryo ya cyenda ryitwa African Film Festival of Cordoba-FCAT ku wa Gatanu tariki ya 20 Ukwakira 2012 muri Espagne.

Ibi bihembo yabihawe kubwa filme ye yitwa Matière Grise (Grey Matter) yari mu mafilme nyafurika arindwi yahatanaga.

Nk’uko ikinyamakuru The New Times cyabitangaje, igihembo cya mbere yahembwe ni icya the honorary Griot Award, agiherewe kuba Uwayoboye Filme neza ‘Best Director’. Icya kabiri ni icya the SIGNIS Award kubwa Filme nziza ngufi ivuga inkuru, ‘Best Feature Length Narrative Film’.

Abagize akanama-nkemurampaka bamuhembye berekanye ko yagize umurava wo kugaragaza ingaruka mbi z’intambara ku rubyiruko.

Kwegukana ibi bihembo kwa Ruhorahoza byahesheje ishema u Rwanda n’akazi yakoze kuko yatsinze ahatana n’amafilme atandatu yandi yaturutse mu Misiri, Afrika y’Epfo, Algeria, Morocco, Senegal na Mozambique; yose yakozwe mu myaka ibiri ishize.

Ibi byagaragaje ko iyi filme Matière Grise (Grey Matter) na cinema nyarwanda muri rusange biri kugana ku rwego mpuzamahanga.

Ruhorahoza yagiye akora amahugurwa menshi mu bijyanye na Cinema. Ubu yatangiye umwuga wo kuba umuyobozi w’amafilme (documentaries), aho yibanda ku kumurikira isi amateka y’u Rwanda.

‘Grey Matter’ ni imwe mu mafilme yanditswe ikanayoborwa n’Umunyarwanda. Iheruka gutoranywa muri filime 12 zahatanaga muri Tribeca Film Festival mu 2011.

Iyi filme igaragaramo umuhanzi Nirere Shanel, Hervñe Kimenyi umwe mu bashinze itsinda ry’abakinnyi basetsa rya Comedy night, Ramadhan “Shami” Bizimana watsindiye igihembo cy’umukinnyi witwaye neza muri Tribeca Film Festival.

Uretse ibi bihembo bibiri Ruhorahoza yahawe, abandi bahawe ibihembo ni Sylvia Perel (Argentina), Tanya Valette (Dominican Republic) na Carolyn Kamya (Uganda).