Itsinda ry’abahanzi bibumbiye mu kitwa “IRIS-PRO FILMS 1000 HILLS Ltd” ryateguwe umukino wiswe ‘Nerekeze he ko mbona inzira nyinshi imbere yanjye’ ugamije gusana imitima y’abahuye n’ibibazo basigiwe na jenoside yakorewe abatutsi no kwerekana ko inzira yo kwiteza imbere ari icyizere.

Ubusanzwe ‘IRIS-PRO FILMS 1000 HILLS Ltd’ ni itsinda ry’abahanzi bakora ibintu bitandukanye, harimo gutegura, gukina no gukinisha film, kwerekana imideri, gutegura ibirori no kubiyobora, kwamamaza, kwigisha urubyiruko n’abakuze kuri gahunda runaka, n’ibindi, ariko ubu bakaba barafashe gahunda ko mu bikorwa byo kwibuka ku nshuro ya 19 Jenoside yakorewe abatutsi mu w’1994 nabo bagomba kugira uruhare runini cyane cyane ku rwego rw’isanamitima no kubaka icyizere.

Aganira na IGIHE, Umuyobozi wayo ‘Ntawirema Celestin, yagize ati: “Nk’abahanzi, twasanze ari ngombwa ko tugira uruhare runini mu kubaka igihugu, kandi itafari dufite ryo gushyiraho ni ibihangano byacu. Nyuma yo kuba hari abakoresheje ibyabo basenya, twe twafashe intego yo gukoresha ibyacu twubaka. ’Nerekeze he?’ ni umukino ushingiye ku gitabo nise ‘Hope for the Future (Icyizere cy’ejo hazaza)’ nitegura gushyira hanze.”

Ntawirema Celestin, Umuyobozi wa 'IRIS-PRO FILMS 1000 HILLS Ltd'

Celestin yakomeje asobanura ko uyu mukino uvuga ku mateka y’impamo, aho abana babiri; umuhungu na mushiki we bishakamo icyizere bagakora bakabasha kwivana mu bibazo basizwe na Jenoside yakorewe abatutsi, ndetse bakanabera urugero abandi bagenzi babo.

Yunzemo ati: “Muri gahunda dufite, tuzajya dukinira uriya mukino ahantu hose bazatwiyambaza bari mu gikorwa cyo kwibuka.”

Bari kandi gutegura filme ndende bazashyira hanze mu mpera z’uyu mwaka.

Bamwe mu bagize 'IRIS-PRO FILMS 1000 HILLS Ltd'