Day Makers igiye gukumbagaza abanya-Kigali mu gitaramo cy’urwenya cyashyize igorora abakoresha Yolo

Yanditswe na Uwiduhaye Theos
Kuya 26 Nzeri 2019 saa 08:24
Yasuwe :
0 0

Abanyarwenya babarizwa mu itsinda rya Daymakers Entertainment, bagiye kongera gukora igitaramo gikomeye cyiswe ‘Bigomba Guhinduka II’, cyitezweho kuzatembagaza benshi bazacyitabira.

Ni igitaramo kizabera muri Kigali Conference & Exhibition Village[Camp Kigali] ku wa 12 Ukwakira 2019.

Kigiye kuza gikurikira ikindi nk’iki cyabaye ku mugoroba wo ku wa 27 Mata 2019. Icyo gitaramo cyarangiye abacyitabiriye bikanda imbavu.

Icyo gihe ubutumwa bwatanzwe bwibanze ku ngingo zigaruka ku mikoreshereze y’imbuga nkoranyambaga, urukundo rwo mu mujyi no mu cyaro, Kimenyi Yves ukinira APR FC uheruka gushyirwa hanze yambaye ubusa n’ibindi.

Mu kiganiro cyahuje iri tsinda ry’abanyarwenya, abanyamakuru n’abaterankunga, bagaragaje ko imyiteguro bayigeze kure kandi biteguye gutuma abantu bazitabira batahana akanyamuneza.

Mugisha Emmanuel[Kibonke Clapton] ukuriye Daymakers Entertainment, yavuze ko ashimira intambwe iri tsinda rye rimaze kugeraho mu bijyanye n’urwenya, ashimira MTN ku bufatanye yaberemeye.

Ati “Uyu munsi turi hano mu gikorwa cya ‘Bigomba Guhinduka’ nshimira cyane MTN kuko ni umwe mu bamamaza ibikorwa byabo dukorana neza ndetse ubu bari kunshyigikira muri iki gitaramo kuko ndibuka ko igitaramo cya mbere nateguye kitigeze kiba. Nyuma nakomeje kugerageza kugira ngo nzamuke. Kuri uyu munota ndashimira MTN ko yadutekerejeho.”

Yongeyeho ati “Ababonye igitaramo cy’ubushize cyabaye cyiza, ubu noneho bizaba ari byiza kurushaho, kizaba kiri ku rundi rwego. Abantu bakunda urwenya bazaze bareba aho abanyarwanda bamaze kugera mu gutera urwenya.”

Gisele Fanny Wibabara ushinzwe ibikorwa byo gutera inkunga muri MTN, yavuze ko bashatse gufatanya na Day Makers kuko bashaka ko abanyarwanda bahora bishimye.

Ati “MTN yifuje gufatanya na Kibonke kuko ni umwe mu bantu dukorana, ni umuntu usanzwe ageza urwenya ku banyarwanda rero twifuje gufatanya na Daymakers ye ariko na none dushaka gushishikariza abanyarwanda guhora bishimye baseka.”

Yakomeje avuga babanje kubaza urubyiruko bagasanga urwenya ari kimwe mu bintu bigezweho cyane ku buryo byaba byiza bigiye biba kenshi cyane.

Yavuze ko abantu bari muri Yolo bazaba badabagijwe muri iki gitaramo kuko bazishyura amafaranga yo ku giciro cyo hasi ugereranyije n’abantu bakuru.
Yolo ni poromosiyo ya MTN igenewe urubyiruko rutarengeje imyaka 25, aho bahabwa iminota yo guhamagara na Internet byinshi ku giciro gito.

Iki gitaramo kizahuriramo abanyarwenya barimo Kibonke Clapton, Michael Sengazi, Patrick, Nimu Roger, Divine, Joshua, Kepha Lee na Bishop Gafaranga; hiyongereho Japhet na 5K Etienne.

Anita Pendo niwe uzavanga imiziki naho Bushali n’Itorero Inkindi Itatse basusurutse abazitabira. Kwinjira ku bantu bari muri Yolo ni 2 000 Frw, 5 000 Frw mu myanya isanzwe ku bantu bakuru ndetse na 10 000 Frw mu myanya y’icyubahiro. Kugura amatike ni ukwifashisha code ya *182*8*1*900444#.

5K Etienne uri mu bagize itsinda rya Day Makers mu kiganiro n'abanyamakuru
Bushali uri mu bazaririmba muri iki gitaramo mu kiganiro n'itangazamakuru
Abazakora iki gitaramo bijeje ibyishimo abazakitabira
Gisele Fanny Wibabara ushinzwe ibikorwa byo gutera inkunga muri MTN, yavuze ko bashatse gufatanya na Day Makers kuko bashaka ko abanyarwanda bahora bishimye
Japhet (wambaye umupira w'umuhondo) na we ari mu banyarwenya bazasusurutsa abazitabira igitaramo cya Day Makers
Mugisha Emmanuel[Kibonke Clapton] ukuriye Day Makers Entertainment, yavuze ko ashimira intambwe iri tsinda rye rimaze kugeraho mu bijyanye n’urwenya, ashimira MTN ku bufatanye yaberemeye

Amafoto: Lewis Ihorindeba


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza