00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Umunyarwenya Eric Omondi yigaragambirije ku Nteko Ishinga Amategeko

Yanditswe na Uwiduhaye Theos
Kuya 17 Ugushyingo 2021 saa 02:56
Yasuwe :
0 0

Umunyarwenya w’Umunya-Kenya, Eric Omondi, yigaragambirije ku Nteko Ishinga Amategeko muri Kenya, ashaka ko abahanzi bo muri icyo gihugu bahabwa umwanya munini mu bitangazamakuru kurusha abo hanze.

Omondi yafunzwe azira guteza umutekano muke ku Nteko Ishinga Amategeko y’iki gihugu ariko nyuma y’amasaha make aza gufungurwa.

Icyatumye uyu munyarwenya yigaragambya ngo ni uko ashaka ko abahanzi muri rusange muri Kenya bahabwa agaciro ndetse hakabaho n’impinduka ku kuntu bafatwa uyu munsi mu ruganda rw’imyidagaduro.

Mbere yo kwigaragambya kuri uyu wa Kabiri tariki 16 Ugushyingo 2021, yari yabanje kwandika ku mbuga nkoranyambaga agaragaza ko agiye gukora akantu.

Ati “Amateka agiye gukorwa… ejo saa yine za mu gitondo ku wa 16 Ugushyingo 2021 ni itariki izibukwa mu myaka igiye kuza. Ndahamagarira abanyamuziki, abahanzi muri rusange ibitangazamakuru ko tuzahurira ku nyubako y’Inteko Ishinga Amategeko muri Kenya.”

Mu mashusho yakwirakwijwe ku mbuga nkoranyambaga uyu munyarwenya agaragara ahanganye na polisi ndetse yashyirwa mu modoka akanga guhita ajyamo. Nyuma aza gushyirwamo ku gahato akajyanwa kuri sitasiyo ya Polisi muri Nairobi.

Ikinyamakuru The Star cyo muri Kenya cyatangaje ko uyu muhanzi avuga ko abahanzi bakwiriye kujya bishyurwa amafaranga akwiye mu bikorwa bitandukanye batumiwemo ndetse asaba ko bazajya bahabwa amafaranga amwe n’ayo abanyamahanga batumirwayo bahabwa.

Ikindi yavuze ngo ni uko yifuza ko ibitangazamakuru muri Kenya byajya biha umwanya munini abahanzi bo muri iki gihugu mu ngeri zose nibura ibyo bakora bigahabwa umwanya wa 75%.

Ati “Nifuza ko ibitangazamakuru by’imbere mu gihugu byajya bikina 75% by’abahanzi bo muri Kenya nk’uko bimeze muri Nigeria, Afurika y’Epfo, Ghana, Zimbabwe n’ahandi.”

Umuyobozi wa Polisi muri Nairobi, Adamson Bungei, yavuze ko Omondi yatawe muri yombi kubera guteza umutekano muke hafi y’inyubako y’Inteko Ishinga Amategeko ndetse no kudakurikiza amategeko.

Omondi ni umwe mu banyarwenya bakomeye muri Kenya
Eric Omondi yafunzwe azira guteza umutekano muke ku Nyubako y'Inteko Ishinga Amategeko ariko nyuma aza gufungurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .