Ni igitaramo cyabereye muri Camp Kigali [Kigali Conference Exhibition Village] mu ijoro rya tariki 25 Kamena 2023 cyari kiyobowe na Arthur Nkusi.

Cyari igitaramo gihuriyemo abanyarwenya batandukanye barimo Teacher Mpamire, Daliso Chaponda, Hervé Kimenyi , Muhinde , Fred Rufendeke na Joseph.

Cyasojwe mu rwenya ruri hejuru cyane nyuma yo kubona uburyo Teacher Mpamire yinjiye ku rubyiniro mu isura ya Perezida Museveni akunze kwigana bikanyura benshi kuva ku muturage usanzwe kugeza kuri uyu mukuru w’igihugu ubwe.

Uyu munyarwenya yateye urwenya avuga uko yari abayeho mu gihe cy’akato yari amazemo iminsi nyuma yo kwandura COVID-19 mu minsi ishize, avuga ko nubwo yarwara ahora afite imbaraga.

Mu gusubiza ibibazo yabazwaga na Arthur Nkusi wari wagiye mu mwanya w’uwakiriye umukuru w’igihugu yamubajije igihe azavira ku butegetsi.

Mu ijwi rijya gusa n’irya Perezida Museveni neza uyu munyarwenya yagize ati "Hari abavuga ngo nzagenda, njyahe se ko nkiri muto? muzi ko ari nayo mpamvu Mama anyita ’baby face’."

"Abose bakubwira kuza kumbaza icyo kibazo uzababaze niba bazi igihe Yesu azagarukira."

Yabajijwe impamvu asinzira ari mu kiganiro, uyu munyarwenya nanone mu ijwi rijya gusa n’irya Perezida Museveni yasubije agira ati "Kuriya mumbona mpumirije ntimukagire ngo mba nasinziriye mba ndi kuvugana n’Imana."

Uko abandi banyarwenya bitwaye

Arthur Nkusi wari uyoboye iki gitaramo mbere y’uko yakira Muhinde , umunyarwenya wazamukiye muri Gen-Z Comedy yabanje kugaruka ku burebure bw’uyu musore ukunze gutera urwenya agaruka ku ndeshyo ye.

Uyu munyarwenya uri mu batanga icyizere muri uru ruganda yatangiye avuga uburyo ari umwe mu bashoramari batunzwe n’ubugufi bwabo.

Hari aho yageze agira ati "Mbonye umuhungu mugufi uri kunseka, buriya rero ndi Ambasaderi wanyu, inama nabagira mujye mutega abamotari barebare kuko hari aho muzagera akagusaba kumukandagirira aho atagera "

"Niba uri mugufi ntukajye mu kabyiniro, nigeze kujyayo nambaye imyenda y’icyatsi, ubwo nicaraga ku meza ntegereje icyo kunywa narebye ku ruhande mbona abasore bagize amerwe bati kiriya ki Mützig kinini bazanye noneho ni icyanjye."

Nyuma yo kuva ku rubyiniro, abakunzi b’urwenya bakigaragaza ko bakimushaka, Arthur Nkusi yabwiye Muhinde ko ubu ari kwegereza igihe cyo kuba yakorerwa igitaramo cye wenyine.

Fred Rufendeke yagarutse ku ijambo riri muri bibiliya rivuga ko Yesu azaza nk’Igisambo atera urwenya agira Ati "Buriya Yesu ntiyaba yaraje tukamufatira i Nyabugogo akaba ari i Mageragere, abari yo nyabuna muzatubarize niba ataraza."

Hervé Kimenyi yateye urwenya abwira abo baba i Burayi kwitondera abakobwa b’i Kigali kuko abenshi baza babashakaho Visa.

Yavuze uburyo hari abirabura babaye abazungu bitewe n’ibyo bakora cyangwa imitekerereze yabo.

Uyu munyarwenya yagarutse ku mazina abakiritisu bita bagenzi babo atanga urugero ku ntama.

Ati "Gute naza gusengera iwanyu munyita intama koko byibuze nta no kuvuga Antelope basi , ubwose nibavuga Aleluya nzavuga Amena cyangwa ni Meeeee."

Teacher Mpamire mu ikositumu ya karokaro, yitwaje ingwa n’ibitabo mu ntoki, yinjiye ku rubyiniro ahindura igitaramo ishuri.

Uyu munyarwenya yaganirije abitabiriye anabigisha isomo ry’urukundo abasaba kwirinda gukopera.

Yatanze ikizamini agira ati “Musa yinjiye mu rusengero nta nkweto yambaye , kora intero utangije ijambo Inkweto…”

Daliso Chaponda wari utegerejwe na benshi yateye urwenya avuga uburyo kureba filime z’urukundo bibeshya abantu benshi, bakibwira ko bazagira urukundo nk’urwo babona mu bitabo cyangwa filime.

Yateye urwenya avuga uburyo yahuye n’umunyamasengesho wamubeshye ko iyo asenga agafashwa avuga mu ndimi.

Daliso yavuze ko nyuma yo kugera mu Rwanda yasanze ibyo uwo munyamasengesho yavugaga cyari Ikirundi.

Yasangije abitabiriye uburyo yateye urwenya ku bendera rya Malawi ubuyobozi bw’igihugu bumukangisha kumufunga naramuka avuye mu Bwongereza.

Arthur Nkusi yagarutse ku rubyiniro atungurwa no kubona Juno Kizigenza yicaranye na Alliah Cool, ni uko aterura agira ati " Juno nawe ubwo araje , ufite inzu ya miliyoni 500Frw, uyu ntabwo ari Ariel Wayz mwana."

Iki gitaramo cyarangiye saa ine n’igice abakunzi b’urwenya bagaragaje ko bagikeneye kumva inkuru z’aba banyarwenya.

Kuva ibi bitaramo ngarukakwezi byagaruka muri uyu mwaka, abakunze kubyitabira bakomeje gusaba Arthur Nkusi kubazanira Trevor Noah.

Arthur Nkusi atangaza ko hari imbanzirizamushinga zamaze gutangira zo kuzana uyu munyarwenya ufite inkomoko muri Afurika y’Epfo akaba icyamamare ku Isi biciye mu biganiro by’urwenya akora ndetse ubu ari no mu bitaramo bizenguruka Isi.

Abanyarwenya Fally Merci na 5K Etienne bari bagiye gushyigikira bagenzi babo

Abato n'abakuru ntibatangwa muri Seka Live

Akanyamuneza kari kose ku bitabiriye Seka Live isoza ukwezi kwa Kamena 2023

Andy Bumuntu na Malik Shaffy batashye bikanda imbavu kubera guseka cyane

Arthur Nkusi yagarutse kuri gahunda yo gufunga ibitaramo saa tatu avuga uburyo hari abatashye aribwo bagitangira kubyina

Arthur Nkusi yagarutse kuri Juno Kizigenza wari wicaranya na Alliah Cool amubwira ko atagomba kwibeshya akamugereranya na Ariel Wayz bigeze gukundanaho

Benshi batashye banyuzwe

Arthur Nkusi yasabwe gutumira Trevor Noah muri ibi bitaramo

Daliso Chaponda ni inshuro ya kabiri ataramiye i Kigali

Byakugora kuva mu bitaramo nk'ibi by'urwenya udasetse

Daliso Chaponda wari utegerejwe na benshi yateye urwenya avuga uburyo kureba filime z'urukundo bibeshya abantu benshi

Daliso Chaponda yavuze uburyo yigeze gutera urwenya ku ibendera rya Zambia bakamukangisha gufungwa naramuka avuye mu Bwongereza aho aba

Fred Rufendeke yateye urwenya avuga ko Yesu ashobora kuba yaraje bakamufunga niba koko yaraje nk'igisambo nk'uko bivugwa muri bibiriya

Hervé Kimenyi avuga ko atumva ukuntu Emmanuel Macron ari umuzungu niba agera ku buyobozi agakuba umushahara we kabiri

Hari igihe kwifata bikunanira bitewe n'urwenya rutanzwe

Hervé Kimenyi yateye urwenya abwira ababa i Burayi kwitondera abakobwa b’i Kigali kuko abenshi baza babashakaho Visa bitwaje urukundo

Ibitwenge byari byose muri Seka Live

Iyo wageze aho abanyarwenya bateraniye

Muhinde yateye urwenya avuga uburyo ari umwe mu bashoramari batunzwe n'ubugufi bwabo

Kuri bamwe bwari ubwa mbere bitabiriye Seka Live

Muhinde yateye urwenya avuga uburyo ari umwe mu bashoramari batunzwe n'ubugufi bwabo

Nadia Umutoni ni umwe mu bitabiriye Seka Live y'uku kwezi

Ntibiba byoroshye kwifata wageze mu bitaramo by'urwenya

Nyuma yo kubwirwa ko akuze cyane, Teacher Mpamire wari wisanishije na Museveni, yahagurutse yerekanako agifite imbaraga ndetse ko agishoboye no kubyina

Seka Live y'ukwezi kwa Kamena yari yatumiwemo abanyarwenya batandatu

Shemi (uri ibumoso) ni umwe mu bitabiriye Seka Live

Teacher Mpamire mu ishusho ya Perezida Museveni yagiranye ikiganiro na Arthur Nkusi wari wagiye mu mwanya w'umunyamakuru

Teacher Mpamire atera urwenya ameze nka mwarimu mu ishuri

Teacher Mpamire bwa mbere yinjiye ari mwarimu ugiye gutanga amasomo

Teacher Mpamire nyuma yo gutanga amasomo yagarutse mu isura ya Perezida Museveni

Teacher Mpamire mu isura ya Perezida Museveni yagaragaje ko uyu muyobozi w'igihugu cya Uganda agifite akagufu

Teacher Mpamire yabanje gusuhuza abitabiriye abaha intashyo za Perezida Museveni

Teacher Mpamire yahinduye icyumba cyaberagamo igitaramo ishuri nawe ahinduka umwarimu

Teacher Mpamire yinjiye yambaye agapfukamunwa dore ko Perezida Museveni aherutse kwanduka COVID-19

Ukimubona ushobora kugira ngo ni Perezida Museveni uhingutse

Uyu munyarwenya yavuze ko ababona Perezida Museveni asinziriye atari uko biba bimeze ahubwo aba ahumirije avugana n'Imana

Uncle Austin yanyuzwe n'urwenya rwari muri Seka Live

Yagiye atanga imyitozo yagoye benshi

Yahamagaye Coach Gael amusaba kumushoramo imari agakomeza umuziki we nk'uko Perezida Museveni yigeze kuwukora mu gihe cyashize

Amafoto: Gisele Iturize