Uyu mushinga uri gukorerwa mu Murenge wa Kacyiru, Akarere ka Gasabo, munsi y’Ibitaro byitiriwe Umwami Faisal kugeza ahateganye na Vision City ndetse n’Ikibuga cya Golf cya Kigali.

Igishushanyo mbonera cyawo, kigaragaza ko hazubakwa inyubako ndende ebyiri n’izindi zizigaragiye ziringaniye, ubusitani bugari butanga amahumbezi, piscine, parikingi nini, imihanda myinshi n’ibindi.

Ku gice umuntu yakwita ko ari icy’imbere hari inyubako 10 zigeretse rimwe zo guturamo, ziri ku gice kirebana n’Ikibuga cya Golf cya Kigali. Zizaba zifite ubusitani bwazo bunini n’imihanda inyura mu busitani.

Ku rundi ruhande, hari inyubako ndende ebyiri, zirimo izaba ifite amagorofa 26 n’ifite 24. Iruhande rwazo hari indi miturirwa ine, irimo uzaba ufite amagorofa 16, hari indi izaba igeretse 12, n’indi izaba igeretse inshuro 10. Muri izo nyubako ndende ebyiri, imwe izaba iyagenewe ibiro (offices) naho indi ibe iyagenewe guturwamo (apartments).

Ubuyobozi Ramba Real Estate buvuga ko imirimo yo kubaka iyi Ramba Hills izatwara miliyoni 80$ (Asaga Miliyari 115 ,7 Frw). Bwatangaje kandi ko ari imirimo izatwara imyaka ine muri rusange, aho mu mezi 17 ari imbere, hazuzura inzu ziganjemo izo guturamo, nyuma y’imyaka iri hagati y’ibiri n’igice n’itatu hakuzura inyubako ya ’apartments’, naho inyubako izaba irimo ibiro bitandukanye izuzura mu mwaka ine.

Ubwo yatangizaga imirimo yo kubaka uyu mushinga, ku wa 25 Kanama 2025, Umuyobozi Mukuru wa RDB, Jean-Guy Afrika, yagaragaje ko imishinga nka Ramba Hills nubwo ari ishoramari ry’abikorera, ariko bigira uruhare mu kubaka umujyi wifuzwa no kugera ku cyerekezo cy’igihugu cya 2050 na guhunda y’igihugu yo kwihutisha iterambere NST2.

Yashimangiye ko Guverinoma y’u Rwanda yiteguye gukomeza gushyigikira ishoramari guhera mu ntekerezo zaryo kugera rishyizwe mu bikorwa neza, mu mucyo kandi mu bufatanye.

Umuyobozi Mukuru w’Urwego rw’Igihugu rw’Iterambere, RDB, Jean-Guy Afrika, yatangije imirimo y'umushinga wa Ramba Hills

Umuyobozi Mukuru w’Urwego rw’Igihugu rw’Iterambere, RDB, Jean-Guy Afrika, yagaragaje ko imishinga nk'iyo ijyanye n'icyerekezo cy'igihugu

Hazubakwa inyubako ndende y'amagorofa 26

Biteganyijwe ko uwo mushinga uzashyirwa mu bikorwa mu gihe cy'imyaka ine

Igishushanyo mbonera cy'ahazubwa inzu zo muri uwo mushinga