Abanyarwanda 82.5% bafite ishusho mbi ku madini n’amatorero y’inzaduka

Yanditswe na IGIHE
Kuya 8 Mutarama 2019 saa 11:50
Yasuwe :
0 0

Abanyarwanda baca umugani ngo “Uburo bwinshi ntibugira umusururu”! Jenoside yakorewe Abatutsi mu 1994 yagize ingaruka nyinshi ku muryango Nyarwanda. Uretse gupfusha abarenga miliyoni mu gihe kitarenze iminsi 100, jenoside yakorewe abatutsi yasenye ubumwe bw’abanyarwanda hiyongeraho no guhungabana mu mitekerereze yabo n’imyemerere yabo.

Nyuma y’i 1994, mu Rwanda havutse amatorero n’amadini mashya menshi. Mu 1962 yari atarenze 10, mu 2012 agera kuri 350 naho mu 2017 agera ku 1000. Aho abantu basengera hiyongereye ku buryo bukabije bigera aho umubare w’insengero urenga 15,000 usumba kure umubare w’imidugudu y’u Rwanda.

Mu mujyi wa Kigali by’umwihariko, byagaragaye ko buri mudugudu wari ufite nibura insengero zirenga ebyiri kubera ko ku midugudu itarenga 1175 Umujyi wa Kigali wonyine wari ufite ahasengerwa harenga 2000.

Kuva aho Leta ibinyujije mu rwego rwayo rw’Imiyoborere (RGB), ifatiye ingamba zo gushyira ku murongo akajagari kamaze iminsi kagaragaraga mu madini n’amatorero, hagashyirwaho umurongo ngenderwaho amadini n’amatorero yose agomba kubahiriza, gufunga amatorero amwe cyangwa ahasengerwa hatujuje ibisabwa no gushyiraho itegeko rishya rigenga amatorero n’amadini.

Havuzwe byinshi bamwe bashyigikiye ingamba leta yafashe abandi barabinenga cyane cyane imwe mu miryango mpuzamahanga n’amwe mu matorero byagizeho ingaruka.

Kugira ngo imiterere y’icyo kibazo cy’imikorere y’amadini n’amatorero ishobore kumenyekana no gushakirwa umuti urambye, Christian Universty of Rwanda, yakoze ubushakashatsi bwimbitse nk’umusanzu wayo kugira ngo ubwinshi bw’amadini n’amatorero aho kuba ikibazo ahubwo bube igisubizo ku iterambere ry’Igihugu.

Ubwo bushakashatsi bwakozwe ku “Ishusho y’uko Abanyarwanda babona ubwinshi bw’Amadini n’Amatorero, impamvu z’ubwo bwiyogere, ingaruka bigira ku muryango nyarwanda n’ingamba zafatwa kugira ngo amadini n’amatorero agire uruhare rwiza mu kubaka umunyarwanda n’iterambere rirambye”.

Abashakashatsi ba Christian University of Rwanda, babajije Abanyarwanda b’ingeri zose bakoresheje ubuhanga bw’ubushakashatsi; mu babajijwe harimo Abagore bakorera mu miryango y’Abagore, Urubyiruko rwo mu mashyirahamwe y’urubyiruko, Abavuga rikumvikana, Abayobozi b’Inzego z’Ibanze, Abayobozi b’amadini n’Amatorero n’abanyeshuri ba za Kaminuza za Leta n’Izigenga.

Abanyarwanda 82.5% ntibabona neza amadini n’amatorero y’inzaduka

Ku bijyanye n’ishusho rusange Abanyarwanda bafite ku matorero n’amadini, 82.5% by’ababajijwe bafite ishusho mbi ku madini n’amatorero cyane cyane amatorero agenda avuka mu bihe bya vuba.

Iyo shusho mbi igaragazwa n’uko amatorero ashyira imbere uburyo bwo kwigisha bubazanira amafaranga n’imitungo kurusha kwigisha ijambo ry’imana;

Amatorero mashya menshi yataye umurongo wo kugorora, gukiza no kugarura mu nzira y’agakiza abayoboke bayo;

Amatorero menshi ntagikora ibikorwa byo kwita ku batishoboye, imfubyi, abapfakazi n’abakene cyangwa ku mibereho myiza y’abayoboke bayo;

Amatorero atera urujijo mu bayoboke bayo kubera inyigisho z’ibitangaza, ubuhanuzi n’uburiganya bushingira ku bibazo by’ubuzima abayoboke bafite (amafaranga, akazi, urubyaro, kubona umugabo cyangwa umugore, kubona aho gutura, kwishyura imyenda ya banki….).

Ubushakashatsi bwanagarutse ku bijyanye n’impamvu zatumye amatorero aba menshi, zimwe muri izo ni amakimbirane avuka hagati y’Abayobozi b’Amadini n’Amatorero agatuma abiyomoye ku bandi bashinga amatorero yabo (byemejwe na 83.5% by’ababajijwe);

Kuba Leta y’Ubumwe bw’Abanyarwanda yatanze ubwisanzure bukabije ku myemerere no koroshya uburyo bwo gushinga amatorero mashya (81.2%);

Amatorero mashya yadukanye uburyo bushya bw’imyigishirize yibanda ku marangamutima y’abayoboke aturuka ku ngaruka za jenoside yakorewe abatutsi no ku bindi bibazo by’imibereho ya buri munsi (76.4%);

Amatorero yahindutse uburyo bworoshye bwo kwihangira umurimo, gushaka akazi, imibereho n’inyungu z’amafaranga n’imitungo (72.9%);

Amadini n’amatorero ya mbere ya 1994 yatengushye abayoboke bayo kubera uruhare muri jenoside yakorewe abatutsi, bituma umubare utari muto mu bayoboke bayo bitabira amatorero mashya (72%);

Hari no kuba kandi amatorero mashya yazanywe n’imyemerere Abanyarwanda bakuye mu Bihugu bari barahungiyemo mbere ya 1994 na nyuma yaho (62.4%).

Ingaruka z’ubwiyongere bukabije bw’amatorero

Ababajijwe mu bushakashatsi bagaragaje ko ubwiyongere bukabije bw’amatorero bufite ingaruka zirimo; Kurengera mu buryo bw’imigishirize butajyanye n’inshingano z’ibanze z’amadini n’amatorero(83.5%); kudaha agaciro aho gusengera kuberako insengero zashyizwe ahabonetse hose(78.8%); Amatorero yitirirwa abayashinze, kwiha ikuzo uko bishakiye no gushingira ku miryango cyangwa ikimenyane (75.3%);

Imyigishirize ya propagande itandukanye n’iyobokamana (74.1%); gutwara imitungo y’abayoboke hashingiwe ku nyigisho z’ibitangaza n’ibinyoma (75.3%); imyemerere ibabaza umubiri kandi ikurura ubunebwe no kutitabira umurimo (75.3%); ubumenyi buke bw’abayobozi n’abakozi b’amatorero (70.6%); gutanya no gukurura amakimbirane mu miryango (69.4%); ihohoterwa ry’igitsina ku bagore n’abakobwa bizezwa ibitangaza n’ubuhanuzi (67.1%).

Nyuma y’ubushakashatsi ku ishusho Abanyarwanda bafite ku madini n’amatorero, ku mpanvu zateye ubwiyongere bukabije bw’amadini n’amatorero n’ingaruka zabyo, ubushakashatsi kandi bwagaragaje ibyifuzo kugira ngo amadini n’amatorero arusheho gukora neza kandi agire uruhare mu iterambere ry’Igihugu.

Hakorwe iki?

Leta igomba gukaza uburyo bwo kwemerera amatorero gutangira no gushyiraho uburyo bukomeye bwo gukurikirana imikorere yayo ku nyungu z’abaturage (84.7%);

Gufasha amadini n’amatorero gushyiraho urwego rwigenzura mu rwego rw’ubufatanye na Leta (74.1%);

Leta igomba gukorera amadini n’amatorero isuzumwa rya buri mwaka ku ruhare mu iterambere ry’imibereho y’abaturage (74.1%);

Leta igomba gukorera igenzura ku buryo buhoraho (audits) ry’imikorere n’imicungire y’amatorero n’amadini (72.9%) hagamijwe inyungu rusange;

Hari kandi kongerera ubushobozi abari mu mirimo y’amatorero no guteza imbere imyigishirize y’iyobokamana n’ubuyobozi ku bayobozi n’abakozi b’amadini n’amatorero binyuze mu Bigo na Kaminuza bifitemo ubuzobere (72.9%);

Gushyigikira umuco w’ibiganiro bihoraho binyuze mu itangazamakuru, imiryango itari iya Leta, Amashuri ya Kaminuza n’ayisumbuye bikangurira Abanyarwanda guhuza imyemerere, imikorere y’amadini n’amatorero n’iterambere rirambye ry’Abanyagihugu (70.6%);

Gushyigikira ibikorwa by’ubushakashatsi bwigenga ku mikorere n’imikoranire y’amadini n’amatorero no ku ruhare rwayo mu iterambere ry’Igihugu muri rusange n’abaturage by’umwihariko(70.5%)

Mu gusoza, ubushakashatsi ku rwego rwa Kaminuza buba bugamije guteza imbere ubumenyi ariko cyane cyane kugira uruhare mu gushaka ibisubizo biteza abaturage imbere.

Turizera ko ibyagaragajwe n’ubu bushakashatsi biramutse bihawe agaciro, amatorero n’amadini byareka kuba uburo bwinshi ahubwo akaba umusingi w’iterambere ry’u Rwanda, kubera ko Abanyarwanda benshi ari abayoboke b’amadini n’amatorero.

Ubushakashatsi bwayobowe na Prof Dr Pierre Damien HABUMUREMYI, Perezida wa Christian University of Rwanda, Umwarimu n’Impuguke mu bya politiki n’imiyoborere na Mr Vedaste HABAMENSHI, Umwarimu n’Umushakashatsi muri Christian University of Rwanda.

Zimwe mu nsengero zarafunzwe hagamijwe guca akajagari kamaze iminsi kagaragaraga mu madini n’amatorero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza