00:00:00 IGIHE NETWORK KN KINYARWANDA EN ENGLISH FR FRANCAIS

Imyitwarire y’abayobozi, kweguzwa, ibyiciro bishya by’ubudehe…: Ikiganiro na Minisitiri Gatabazi

Yanditswe na Rabbi Malo Umucunguzi
Kuya 26 March 2022 saa 07:44
Yasuwe :

Minisiteri y’ubutegetsi bw’igihugu ivuga ko yahagurukiye abayobozi batanga serivisi mbi, abasaba akantu, n’ibindi bibazo bituma umuturage atabona serivisi akwiye.

Iyi minisiteri ifite ishingano zikomeye kuko ikurikirana by’umwihariko abayobozi bagera ku bihumbi 253 bari mu nzego z’ibanze, bafatwa nk’izingiro ry’ishyirwa mu bikorwa rya gahunda zitandukanye mu gihugu.

Mu kiganiro na IGIHE, Minisitiri w’Ubutegetsi bw’igihugu Gatabazi Jean Marie Vianney yagarutse ku birimo gukorwa mu kunoza imiyoborere, n’izindi ngingo rusange zijyanye n’ubuzima bw’igihugu.

Ibi ni bimwe mu byaganiriweho:

IGIHE: Muheruka guhura n’abagize Urwego Ngishwanama rw’Inararibonye. Mwaganiriye iki?

Ni abantu bafite amateka mu rugamba rwo kubohora u Rwanda kuri bamwe, abandi bagiye bagira imirimo mu byiciro binyuranye kandi bikomeye, bafite ubunararibonye, kandi n’imyaka yabo n’ubuzima baba baraciyemo, ubwabyo nabyo ni ishuri.

Nkumva rero ari abantu umuntu akwiye kugisha inama ndetse no kuba twababaza ibintu bimwe na bimwe twakosora kugira ngo dukorere abaturage, dukore gahunda zigende mu cyerekezo n’ubundi baba baratekereje, buriya ubarebye usanga ari nko guhererekanya agati hagati y’urungano rumwe n’urundi.

Tuvuge wenda niba ari ikibazo cy’imitangire ya serivisi, bafite uko babibona. Bafite uko babyifuzaga, urugamba rwo kubohora igihugu rufite icyo rwashakaga, umukuru w’igihugu afite umurongo aduha ujyanye n’imitangire ya serivisi.

Bariya mu bunararibonye nabo bafite inama bagombaga kutugira, cyane cyane bakurikije na za raporo zari zimaze gutambuka, ari raporo ya RGB, n’izindi zagaragaje ko abaturage batishimiye serivisi bahabwa ku bipimo binyuranye.

Twagiyeyo batubaza impamvu bimeze bityo, tubasobanurira ko natwe twemera ko hari ibyiciro binyuranye bitanga serivisi zitari nziza nk’uko byagaragajwe na raporo, ariko usibye na raporo, natwe ubwacu hari aho tuba tubona serivisi zidatangwa neza, ndetse dukurikije n’ibyo abaturage baba batubaza umunsi ku munsi, bigaragaza ko abayobozi bakwiye kuvugurura imitangire ya serivisi, bakayinoza.

Kimwe mu byo twabemereye ni uko twubaka Akagali neza nk’uko biteganywa n’ubundi, kandi twanabiganiriyeho n’inzego nkuru z’igihugu ku buryo guhera ku itariki ya 1 Nyakanga 2022 bizatangira neza mu buryo buvuguruye.

Hanyuma n’izo nzego z’imirenge zikeneye ibikoresho bya ngombwa n’ingengo y’imari kugira ngo zishobore gutanga serivisi zihagije, ibyo nabyo turi kubitekerezaho kandi birazirikanwa mu ngengo y’imari tuba turimo gutegura.

Harimo no kubaka ubushobozi bw’abatowe, umukuru w’umudugudu yaratowe, ese amaze gutorwa azi inshingano ze, azi ibyo agomba gukora, hari aho byanditse, azi icyo agomba gukora ku wa Mbere, ku wa Kabiri, azi raporo agomba gutanga n’igihe agomba kuyitangira, azi ibigomba kuba biri muri iyo raporo, twaje gusanga nabyo nta bihari, umuntu baramutora gusa akajya mu kazi.

Ibintu byose bituma umuturage atishima twagiye tubiganiraho nabo kandi twemera ko tugiye kubikosora kandi twaratangiye, kandi turizera ko bizagenda neza.

Ibyo birajyana n’ibyo bari batubajije bijyanye n’imyumvire, bigaragara ko mu bushishozi bwabo hari imyumvire yabo ikwiye guhinduka.

Mu byo twabagaragarije twatangiye ni uko abaturage b’abanyarwanda bakwiye gutozwa umuco wo kumva ko bagomba gukora cyane kandi neza, inzego zikabasobanurira, zikabereka ibigomba gukorwa, ariko nabo bakitanga, na bya bindi leta iba yabakoreye bakabigiramo uruhare, bakabirinda.

IGIHE : Ni ibihe bibazo bindi bikiri mu mitangire ya serivisi ?

Nubwo ari bakeya ariko barahari, aho usanga umuturage ajya gushaka serivisi umuyobozi akamusiga mu biro akigira mu bindi, ukakira umuntu uri kuri telefoni utamuteze amatwi, ugasanga umuturage ntabwo afite umwanya kandi umuturage ni we ufite umwanya mbere y’ibindi.

Twagiye tubona serivisi mbi ziri mu butaka, twumvikanye n’ikigo cy’ubutaka ko tugomba gushaka uko icyumweru cy’ubutaka cyabaho kenshi, cya gihe abaturage baza gushaka ibyangombwa by’ubutaka, bahinduze, bakajya babitegura kenshi, kandi byinjiza n’amafaranga, abaturage bakabona ibyangombwa byabo.

Turashaka gukomeza kuvugurura za One top Center hajyamo abakozi bashoboye, ndetse tunabara ko muri iyi mijyi ya kabiri kuri Kigali, mu minsi izaza izaba yarahinduriwe n’imbonerahamwe y’abakozi kubera ko hari ibyo bakenera abandi badakenera, kandi itegeko ryarabigennye.

Ibyo byose rero bizaba bigamije ngo twongere ubushobozi babandi bashinzwe gutanga serivisi, twongere umubare wabo, abatari bahari tubuzuze mo, niturangiza dutangire kubabaza inshigano zabo.

Ngira ngo icyagaragaye mu minsi ishize hari abakozi benshi bavaga mu mirimo yabo kubera ibihe twari turimo bya COVID-19 ntibasimburwe, ku buryo twari tumaze kugera ku bakozi 6583 bari baravuye mu nshingano mu byiciro binyuranye […], ariko ubungubu tumaze gutoresha ku buryo abayobozi muri izi nzego bose ni bashya.

Hari ikindi twabonye bimwe abantu baba bavuga ngo abakuru b’imidugudu ntabwo batanga serivisi nziza, ngo baka ruswa, n’abandi bakozi bo mu nzego z’ibanze, turimo gukora ubushakashatsi mu bijyanye n’iyo myitwarire y’abayobozi, ku buryo twifuza ako abayobozi nk’abongabo batakomeza kuba mu nzego z’ibanze.

Abayobozi barya ruswa, abayobozi basaba akantu, umuyobozi usanga rimwe na rimwe atita no ku muturage kandi yaragiza akamukenera, abo bose turagira ngo tuzabashyire ku murongo.

Icya nyuma kuri ibingibi ni uko nubwo abakozi bacu badatanga serivisi neza, dufite umugambi nka MINALOC wo gukora ibishoboka byose abo bayobozi bakora mu nzego z’ibanze bagashyira umutima hamwe, ntibahore birukanka, bahunga bavuga bati twabuze akazi cyangwa tugiye gusezera, tugiye kweguzwa.

Nibakore neza, bagaragaze umusaruro, babane n’abaturage, umusaruro wabo ube ugaragarira mu mpinduka, mu iterambere ry’abaturage. Nibyo abantu bazajya banaheraho mu kubazamura mu ntera bakaba bajya no mu zindi nzego.

IGIHE : Hari ikibazo kitavuzweho rumwe kijyanye n’urusaku, cyahagaritse indangururamajwi ku bayisilamu igihe batora Adhan. Cyashingiwe ku ki ?

Impamvu byaje ni uko hari abantu bakomeje gutakamba, gusaba, bakavuga bati twebwe ntidusinzira, abantu uba utangiye gufata igitotsi bakagukangura, mu kanya bakongera bakagukangura, hakaba haje abandi.

Ibyo byose byagiye bigaragara ndetse n’ibingibi bigaragara muri za karitsiye bikazana urusaku, abaturage baba babigaragaje, ahubwo ni uko babigaragazaga wenda abantu ntibabumve ko nabo bafite uburenganzira.

Soma: Imvano y’icyemezo cyahagaritse ’Adhan’ mu masaha y’ijoro

IGIHE: Ibyiciro bishya by’Ubudehe bigeze he?

Byose byararangiye, impapuro zarakozwe, hasigaye kugira ngo abantu babimenyeshwe ku buryo burambuye, ariko ibyo nta kibazo kikirimo.

Abantu bifuzaga kujya mu byiciro bahabwa amafaranga cyangwa bahabwa inkunga, ariko ibyo twabagaragarije ko ubundi nta muntu wishyira mu byiciro.

Buri wese ashatse kwishyira mu byiciro, si n’abanyarwanda gusa ahari, umuntu wese yumva yajya ahantu bazamufasha, ugasanga nk’umuntu afite amasambu atanu, afite inka, afite imodoka, ari mu cyiciro cy’abakene.

Ugasanga byose biragaragara ko muri uru rugendo rwo kugira ngo tumenye abo tugomba gufasha nyabyo biba bigoranye, ku buryo abantu batarebye neza ibintu bazabirwanya mu bundi buryo.

Gushyira abantu mu byiciro by’ubudehe byararangije, ibijyanye n’uburyo abantu bazajya bava mu cyiciro bajya mu kindi mu gucutsa abahawe inkunga ndetse n’amafaranga y’inguzanyo, hari abayafata bakayishyura neza n’abayafata bakavuga ngo ni ayo Muzehe yabihereye, ariko hakaba n’inkunga ihabwa abatishoboye, hakaba abishyurirwa ubwisungane mu kwivuza, ku buryo nibwira ko gahunda igenda neza.

IGIHE: Hari ikibazo cyo kugwingira mu turere dufite ibiribwa, ndetse Perezida Kagame aheruka kuvuga ngo "bihindurwe cyangwa muhindurwe." Murimo guhangana na cyo mute?

Abaturage bacu b’Abanyarwanda, hari abashobora kubona indyo mbi kubera ko bafite ubutaka buke badashobora guhinga ngo beze, ariko abongabo ni abashobora gushaka akazi bagakorera abandi, ari nabo duha amahirwe muri za VUP.

Ikindi tubona ni uko abantu bigaragara ko bafite imirire mibi, barimo kugwingira, baragaragara muri utwo turere tweza n’ubundi.

Hari igihe abantu uko beza batibuka no gushaka iby’intungamubiri, umwana akamuha ibirayi, akamuha ibijumba, akamuha ibishyimbo, hahandi bateza ho noneho akajya gushaka dodo, agashaka indagara, agashaka agafu n’ibindi, kuko ari dukeya akaduha umwana kandi ugasanga nitwo tumugirira akamaro kurusha wa mubyeyi ufata ibirayi birimo igishyimbo kimwe, akabishyira ku isaha akabiha umwana.

Ikindi ugasanga abantu bahawe inka, babonye amata, aho kugira ngo bayahe abana bayajyanye ku isoko barayagurikishije kuko bashaka kubona amafaranga, kandi bamara kubona amafaranga bakayanywera cyangwa akajya gukemura ibindi bibazo by’ababyeyi, kandi yagombaga gukemura ibibazo by’umwana nk’icyo perezida wa repubulika yabahereye inka.

Ibyo twarabibonye, dusaga ikibazo kiri mu myumvire n’imyigishirize.

Niyo mpamvu twashyizeho urugo mbonezamirire rwo ku mudugudu, tubashyiriraho n’abantu twita abafashamyumvire mu bijyanye n’imirire, noneho tukaba dushaka ngo abantu bajye bahurira kuri icyo gikoni cy’umudugudu, babigishe guteka.

IGIHE: Hari ikibazo cyakomeje kubaho cy’abana bo mu mihanda. Uyu munsi cyifashe gite?

Abana bo mu mihanda, b’inzererezi, abana bato bavuye mu mashuri bayataye, ni ikibazo gihangayikishije ariko ntabwo navuga ko cyageze ku rwego rudasanzwe, ariko nta mwana ukwiye kiba atari mu ishuri, nta mwana ukwiye kuba ari mu muhanda, adafite aho arererwa.

Ni yo mpamvu politiki ya leta ivuga ko abana barerera mu muryango.

Ariko byaragaragaye ko hari abari mu muhanda, ba marine, benshi turabafata tukabajyana mu kigo ngororamuco bakavugururwa, bakigishwa, bagatozwa, bagategurwa.

Turashaka ko muri ibyo bigo tuhagira ikigo tuvanamo n’impano, niba umuntu agiye muri icyo kigo bashobora kumufata bakamugira umukinnyi, akaba yagira ahandi agera agatera imbere, tukabafasha tubigisha kugira ngo bavemo bafite umwuga bashobora kujya gukora biteza imbere.

Ariko nyuma yaho igikwiriye kuba kibanza ni ukuvanaho icyatumye ajya mu muhanda, ni ukuvanaho icyatumye ajya gusabiriza, ni ukuvanaho icyatumye ajya muri marine hariya mu miferege.

Kuko ushobora gufata abana basa nabi ukabajyana mu ngo zabo, ukagenda ukaba uzi ko ukemuye ikibazo, cyangwa ukabafata ukabajyana mu ishuri bambaye imyenda mibi, badafite n’amakaye, ntabwo byakunda kuko ntiyagumayo.

Ariko nyuma y’aha turashaka uruhare rw’ababyeyi, umuntu wabyaye abana agomba kuzirikana ko bagomba kwiga, haba hari n’ibibazo agasaba leta ko imufasha aho kugira ngo abana bajye mu mihanda bajye kwirirwa basabiriza, bashobora no kuhavana n’izindi ngorane harimo n’iz’abana bato bo mu mihanda baterwa inda, ugasanga babyaye ari abana, nabo bakabyara abandi bana.

IGIHE: Hari uturere twinshi dufite amakipe ariko afite ibibazo by’amikoro. Ubundi afitiye akamaro uturere?

Cyane! Usibye n’amakipe y’umupira w’amaguru mubona mwebwe, siporo muri rusange ni umuti, iravura, siporo ihuza abantu, siporo ni n’umwanya wo kunyuzamo ibitekerezo, siporo ni ubukungu, imikino isigaye itanga n’amafaranga.

Rero turabishyigikiye cyane ni yo mpamvu twanabihagurukiye, twashyizeho itsinda ririmo kudusuzumira ukuntu siporo mu kagari yaba ishingiro, abantu bo mu kagari bakajya bahura bagakina imikino inyuranye irimo umupira w’amaguru, kuzenguruka batanga agati, imikino idasaba abantu benshi, gusiganwa, kugenda ku magare, turifuza ko buri karere kagira byibuze siporo kagiraho umwihariko.

Icyo ni kimwe. Icya kabiri, abayobozi b’uturere twaganiriye nabo n’abakuru ba njyanama, tuza gusanga ikipe ntabwo ushobora kuyigenera amafaranga atagomba kurenza gusa (forfeit), kuko ikipe igenerwa amafaranga ukurikije ibyo igomba gukora.

Niba ari amarushanwa y’igikombe cy’amahoro, shampiyona, imikino ya gicuti, ibyo byose ugomba kubibara mu mafaranga noneho akajya mu ngengo y’imari.

Kuko siporo izadufasha kuzana ba baturage bataboneka, siporo izadufasha kuzana ba bajene bataboneka mu nama zisanzwe, dukora inama hakazamo abantu bakuru n’ababyeyi, ariko abana ntabwo baza, ariko bashobora kujya ku kibuga cy’umupira, bamara gukina iminota 30 ugafata imizindaro ukaba wavuga ugatanga ubutumwa ugomba gutanga, kandi ukabona abantu utari buzabone.

Siporo rero ni nziza turayikunda, hanyuma ndashimira cyane uturere dufite amakipe, ariko nkagaya abatayafite kuko bashobora gutekereza ko ibintu byose bimeze neza kandi nta ruhare babigizemo.

Iyo ikipe yavutse ntabwo iba ikigendera ko Meya ayishaka cyangwa atayishaka, ikipe iba yabaye iy’abaturage. Ntabwo ushobora kwima abaturage ibyishimo witwaje urwego uriho, ahubwo bakwiye kuba babigaragaza no mu igenamigambi.

Mu igenamigambi rero twamaze kwemeza ko bazajya bateganyiriza ikipe bakurikije ibyo ikeneye mu buryo burambuye, ku buryo iyo urebye usanga n’amafaranga atajya munsi ya miliyoni 200 Frw, washyiraho n’izindi siporo zishobora kuba zanavuka ndetse n’ibikorwa remezo byangombwa, ibibuga n’ibindi, abantu bakabiha ubwihutirwe kuko siporo ni ubuzima.

Siporo ni umwarimu wigisha, ari ukwihangaa, ari ugusangira, ari uguca bugufi, siporo ni umwalimu ukomeye cyane.

Nka APR igiye gukina i Rusizi hoteli zose zirara zuzuye, bakarya, bakanywa, bagakira gute, ababigemura b’abaturage bakabona aho bacuruza, mu gitondo gutyo, bagasigayo amafaranga nka miliyoni zingahe, buri wese aba afite ibihumbi 300 Frw, 400 Frw, 500 Frw, bakabisiga mu karere.

Wowe rero Meya wapanze ikipe, wayipangiye neza, amafaranga watanze yo gufasha ikipe uzayagarura kuko bariya baza, bahahurira, bazana amafaranga akinjira mu misoro, hotel zigakora, urubyiruko rukabona akazi n’ibindi.

IGIHE: Mu gihe gito u Rwanda rurakira CHOGM. Ni iki musaba abaturage?

Abaturage icyo basabwa cya mbere ni uko ari abakora ubucuruzi, mu gutanga serivisi, ari ugutunganya imijyi yacu igasa neza, ari isuku, ari n’ibindi byose, ni ukwicara biteguye umushyitsi udasanzwe.

Igituma ari umushyitsi udasanzwe ni uko CHOGM izamo abaperezida benshi, ikazamo abayobozi benshi cyane, abantu benshi.

Ku buryo buri wese akwiye kuba yiteguye ati ’ariko iyo CHOGM nzayivanamo iki’ mu bijyanye n’icyo yagurisha, nzayivanaho iki ku bijyanye na serivizi azatanga, ibijyanye no kuba bahura n’abandi bantu bakamenyaka nabo.

Minisitiri Gatabazi yasobanuye ibigiye gukorerwa abayobozi badatanga serivisi nziza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .