Nyuma y’Inteko Ishinga Amategeko y’inzibacyuho, yagiyeho kuva mu 1994 – 2003, igakurikirwa na manda ya mbere y’Abadepite yabaye 2003-2008, manda ya kabiri ikaba muri 2008-2013, kuri uyu wa gatanu, tariki ya 4/10/2013, ni bwo Abadepite bitowe mu kwezi gushize kwa Nzeri bazarahirira gutangira imirimo yabo muri manda ya gatatu y’Umutwe w’Abadepite iva 2013 -2018.

Umuhango wo kurahiza Abadepite bashya uteganywa n’Itegeko Nshinga rya Repubulika y’u Rwanda ryo ku wa 4/6/2003, nk’uko ryahinduwe kandi ryujujwe kugeza ubu, mu ngingo yaryo ya 65 ivuga ko mbere yo gutangira imirimo, abagize Inteko Ishinga Amategeko barahirira imbere ya Perezida wa Repubulika, ataboneka bakarahirira imbere ya Perezida w’Urukiko rw’Ikirenga.

Nk’uko tubikesha Habimana Augustin, Umuyobozi Mukuru w’Itumanaho n’Iyegera ry’Abaturage mu Nteko Ishinga Amategeko, mu nama ya mbere kandi Abadepite bitoramo abagize biro, ni ukuvuga Perezida na ba Visi Perezida babiri, umwe ushinzwe amategeko no kugenzura ibikorwa bya Guverinoma ndetse n’ushinzwe Imari n’Abakozi.

Nyuma y’amatora y’Abagize Inteko Ishinga Amategeko yabaye tariki ya 16-18 Nzeri 2013, Komisiyo y’Amatora yemeje burundu Abadepite 80 bayatsinze. Muri bo abagabo ni 29 mu gihe abagore ari 51, bangana na 63,7%. Uwo mubare munini w’Abagore ukomeje gutuma u Rwanda rukomeza kuba urwa mbere ku Isi mu Nteko zifite umubare munini w’Abagore. Uwo mwanya rwawubonye guhera mu mwaka wa 2008 ubwo hatorwaga Abadepite bo muri manda ya kabiri, kuko bari 56%.

Nk’uko kandi byagaragajwe n’amatora muri iyi manda, Umuryango wa FPR-Inkotanyi watsindiye imyanya 41, Ishyaka PSD ritsindira imyanya 7 na ho Ishyaka PL ritsindira imyanya itanu. Kuri abo Badepite 53 bakomoka mu mitwe ya Politiki, hiyongeraho Abadepite 24 b’Abagore nk’uko biteganywa n’ingingo ya 9 y’Itegeko Nshinga rya Repubulika y’u Rwanda, ivuga ko mu nzego zose zifatirwamo ibyemezo Abagore niibura bagomba kuba 30%, hakiyongeraho kandi Abadepite 2 batorwa n’inzego z’Urubyiruko ndetse n’Umudepite umwe utorwa n’Inzego z’Ababana n’Ubumuga.

Kuri aba Badepite 80, muri bo 50 bari basanzwe ari Abadepite muri manda ya 2 naho Abadepite 30 bakaba ari bashya.

Iyo Abadepite bamaze kurahira baba bahagarariye Igihugu cyose ntabwo baba bahagarariye Imitwe ya Politiki cyangwa ibyiciro binyuranye batorewemo.

Kanda aha usome inkuru bifitanye isano. Ongera ukande n’aha usome indi. Kanda na hano noneho usome n’iyi.