00:00:00 IGIHE NETWORK KN KINYARWANDA EN ENGLISH FR FRANCAIS

Amatora mu Bufaransa: U Rwanda rwagira nyungu ki Perezida Macron yongeye gutorwa?

Yanditswe na Kanamugire Emmanuel
Kuya 3 December 2021 saa 11:31
Yasuwe :

Abafaransa biteguye amatora y’Umukuru w’Igihugu ateganyijwe ku matariki ya 10 na 24 Mata 2022. Ni amatora arimo abakandida benshi ariko ibintu bica amarenga ko Perezida Emmanuel Macron na we azongera kwiyamamaza kandi afite amahirwe menshi yo gutsinda.

Emmanuel Macron winjiye muri politiki anyuze mu Ishyaka La République En Marche, yatsinze amatora ya Perezida mu 2017 mu buryo butari bwitezwe na benshi.

Kugeza ubu ntaratanga kandidatire ye ariko abasesenguzi bavuga ko nta kizamubuza gushaka manda ya kabiri nk’uko mu bamubanjirije hari ababigerageje bamwe bagatsinda abandi ntibibahire. Urugero ni Charles de Gaulle, Georges Pompidou yarabigerageje, Valery Giscard d’Estaing, Mitterand, Chirac na Sarkozy.

Macron na we ari muri uwo murongo kuko ishyaka rye (La République En Marche) riri gushaka kwihuza n’andi mashyaka arimo irya François Bayrou wahoze ari Minisitiri w’Ubutabera mu Bufaransa mu rwego rwo gushaka amaboko.

Mu nkuru iherutse gutambuka mu kinyamakuru ’Les echos’ bivugwa ko mu barwanashyaka ba République En Marche harimo abo bigaragarira ko Macron aziyamamaza muri manda ya kabiri kandi ko afite amahirwe yo gutsinda amatora uko byagenda kose.

Mu byo bashingiraho harimo kuba nta mukandida wizewe uhari ushobora kumuhiga no kuba benshi mu Bafaransa babona ko aramutse avuye ku butegetsi impinduka yatangije zitaba zigezweho.

Umwanditsi w’iyi nkuru (Vassili Joannidès de Lautour) akomeza avuga ko nka Perezida w’Inteko Ishinga Amategeko y’u Bufaransa, Richard Ferrand, atahwemye kuvuga ko Macron akeneye manda ebyiri kugira ngo abashe gushyira mu bikorwa porogaramu ze, imwe ku yindi.

Perezida w'u Bufaransa, Emmanuel Macron nubwo ataratangaza kandidatire ye, bigaragara ko nta kizamubuza kwiyamamaza muri manda ya kabiri

Ikindi ni uko abameya bagera kuri 600 na bo baherutse gusinya ‘petition’ bagaragaza ko bakeneye Macron, bifuza ko yiyamamaza ngo akomeze porogaramu yatangiye zirimo guteza imbere inganda mu gihugu, kwimakaza ikoranabuhanga, kugarura ituze n’ibindi.

Macron ari gushaka amaboko mu ihuriro ry’amashyaka

Ni ibisanzwe ko Perezida uri ku butegetsi atangaza kandidatire ye hasigaye igihe gito gishoboka ngo amatora abe kugira ngo ibikorwa byose akora, aho ajya hose, akomeze kwitwikira izina ry’umukuru w’igihugu ariko bitabujije ko aba yaratangiye ibikorwa bibanziriza kwiyamamaza.

Na Macron ari muri uwo mujyo kuko byanze bikunze azaba umukandida. Kuri ubu yasabye ishyaka rye ko ryinjira muri ’coalition’ kugira ngo agwize imbaraga zizamushoboza gutsinda.

Ashaka kumvikana na François Bayrou wo mu Ishyaka ‘MoDem’ na Edouard Philippe wahoze ari Minisitiri w’Intebe wari umaze washinze Ishyaka ryitwa Horizons.

Amahirwe afite ni uko uruhande rwa ‘gauche’ rurimo ‘Parti Socialiste’, ‘Ecologiste’, Melenchon n’Aba-communistes iyo bose bishyira hamwe bari kugira ingufu bakamutsinda cyangwa bakanganya ariko kuba haragiyemo abakandida bane bizatuma bagabana amajwi 25 bitume bose baza munsi y’icumi.

Kuri ‘extreme droite’ hari babiri (Marine Le Pen na Eric Zemur) ariko bishoboka ko hazazamo n’abandi bakandida bato bato bikazatuma mu cyiciro cya mbere Macron aba uwa mbere.

Abakandida bamaze kwigaragaza kugeza ubu

Abakandida bagera kuri 13 ni bo bamaze kugaragaza ko bazahatana mu matora y’umukuru w’igihugu mu Bufaransa.

Barimo Nathalie Arthaud, Umuvugizi w’Ishyaka Lutte Ouvrière kuva mu 2008. Ishyaka rye ryamutanze nk’umukandida waryo muri kongere ya 50 yabaye mu Ukuboza 2020.

Abandi ni François Asselineau washinze ishyaka rya ‘Union populaire republicaine’ akaba ari na we uriyobora kuva mu 2007, Nicholas Dupont-Aignan wa ‘Debout la France’, ishyaka yashinze mu 2008 akaba n’umudepite uhagarariye Essone kuva mu 1997.

Anne Hidalgo wo muri ‘Parti Socialiste’, akaba n’Umuyobozi w’Umujyi wa Paris na we ari mu bakandida. Hiyongeraho Yannick Jadot wo muri ‘Europe Ecologie les Verts’, umudepite mu Nteko Ishinga Amategeko ya EU kuva mu 2009.

Hari kandi Jean Lasalle, Perezida w’Ishyaka ’Resistons’ kuva mu 2016 akaba umudepite uhagarariye Pyrénées-Atlantiques kuva mu 2002 ndetse na Marine Le Pen, umudepite wa Pas-de-Calais wo mu Ishyaka ’Rassemblement National.’

Ishyaka ’La France insoumise’ na ryo rifite umukandida witwa Jean Luc Mélenchon, umudepite uhagarariye Bouches-du-Rhône kuva mu 2017 naho Ishyaka ’L’Engagement’ rikagira Arnaud Montebourg.

Abandi ni Jean Frédéric Poisson (Via la voie du people), Philippe Poutou (Nouveau anticapitaliste), Fabien Roussel (Parti Communiste fancçais) na Antoine Waechter (Mouvement Ecologiste indépendent).

Abasesenguzi bavuga ko Macron aramutse yongeye gutorwa waba ari umwanya mwiza wo gukomeza intambwe yatangije iganisha ku kuvugurura umubano w'igihugu cye n'u Rwanda

Kongera gutorwa kwa Macron u Rwanda rubifitemo inyungu?

Kuva Perezida Macron yatorerwa kuyobora u Bufaransa, hatewe intambwe yo kugerageza kuzahura umubano wabwo n’u Rwanda wari umaze imyaka hafi 27 warazambye biturutse ku ruhare muri Jenoside yakorewe Abatutsi iki gihugu gishinjwa.

Muri Werurwe uyu mwaka Macron yamurikiwe raporo yitiriwe Vincent Duclert yacukumbuye amateka y’u Rwanda n’u Bufaransa hagati ya 1990 na 1994. Perezida Emmanuel Macron ni we washyizeho iyo komisiyo. Mu mwanzuro wayo isobanura ko u Bufaransa bwari buyobowe na François Mitterrand bwananiwe kugira icyo bukora mu guhagarika Jenoside yakorewe Abatutsi.

Muri Gicurasi kandi Macron yagiriye uruzinduko mu Rwanda ‘yemera uruhare’ igihugu cye cyagize mu mateka mabi ya Jenoside yakorewe Abatutsi mu 1994. Ni uruzinduko Perezida Kagame yavuze ko rwashimangiye ‘ukuri’ kw’amateka ya Jenoside yakorewe Abatutsi kandi yagizwemo uruhare rukomeye n’u Bufaransa.

Muri Kamena ubwo yari mu Ihuriro rya ‘Qatar Economic Forum’, Perezida Kagame yasobanuye ko impamvu kwemera uruhare rw’u Bufaransa muri Jenoside byari ingenzi cyane, ari uko bizarushaho kwemeza abantu ko Jenoside yakorewe Abatutsi yabayeho, bityo bigaca intege abagifite umugambi wo kuyihakana no kuyipfobya.

Uru ruzinduko rwa Macron mu Rwanda rwaharuriye inzira ubufatanye hagati y’ibihugu byombi haba ku rwego rwa dipolomasi, ubuhahirane, ishoramari n’ibindi byatumye mu mpera z’ukwezi gushize abahagarariye sosiyete zigera kuri 30 zo mu Bufaransa baraje mu Rwanda bashaka uko bashora imari mu nzego zirimo ubuzima, gutwara abantu n’ibintu, ubwubatsi, ikoranabuhanga, gutunganya umusaruro ukomoka ku buhinzi n’izindi mu buryo butanga inyungu ku mpande zombi.

Kuri ubu u Bufaransa bufite Ambasaderi mu Rwanda nyuma y’igihe kirekire cyari gishize rutamugira ndetse amakuru ahari avuga ko Macron yashyizeho umuntu ukurikirana dosiye z’abakekwaho Jenoside bari mu Bufaransa, uyu akaba akorera muri Ambasade y’u Bufaransa mu Rwanda.

Kuri ubu ngo hari amadosiye agera kuri 37 y’abakurikiranyweho Jenoside ari hafi kurangira ngo ajyanwe mu rukiko mu gihe mu myaka 27 hari harakozwe abarirwa ku rutoki.

Umusesenguzi ukurikiranira hafi politiki y’u Bufaransa n’u Rwanda waganiriye na IGIHE, yavuze ko u Rwanda rufite inyungu mu kuba Macron yatsinda amatora amugumisha ku butegetsi kuko byatuma akomeza intambwe yateye mu kunoza umubano w’ibihugu byombi ndetse n’indi mishinga ahuriyeho na Perezida Kagame irimo ujyanye no guteza imbere ikoranabuhanga binyuze muri Digital Africa, u Rwanda ruhuriyeho na Sénégal.

Perezida Macron hamwe na mugenzi we Paul Kagame ubwo yagiriraga uruzinduko mu Rwanda muri Gicurasi uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .