Komisiyo y’Igihugu y’Amatora yashyize ahagaragara urutonde rw’Abakandida 438, ko aribo bemerewe by’agateganyo guhatana mu matora y’Abadepite ateganyijwe muri Nzeri uyu mwaka. Abo bakandida baturutse muri RPF n’imitwe ya Politiki yifatanyije na yo, muri PS Imberakuri, PL, PSD, Abakandida bigenga, Abagore, urubyiruko n’abafite ubumuga. Muri bo 50% ni abagore.

Komisiyo y’igihugu y’Amatora itangaza ko RPF n’indi mitwe byifatanyije ari yo PDI, PDC, PSR na PPC batanze abakandida 80 by’agateganyo bose bakaba baremerewe. PS Imberakuri yatanze abakandida 65 by’agateganyo hemererwa 27; PL yatanze abakandida 68 by’agateganyo hemererwa 60. PSD yatanze abakandida 80 by’agateganyo hemererwa 58. Abakandida bigenga hasabye batanu (5) by’agateganyo hemererwa batatu (3). Iki cyiciro ni cyo kizatorwamo abadepite 53.

Mu rwego rw’abagore, mu Mujyi wa Kigali hatanzwe abakandida batanu (5) bemererwa bose; Intara y’Amajyepfo hatanzwe abakandida 28 hemererwa by’agateganyo25; Intara y’Uburengerazuba umubare w’abasabye ntiwagaragajwe ariko abemerewe by’agateganyo ni 23; Intara y’Amajyaruguru hatanzwe abakandida 22 hemererwa by’agateganyo 19; na ho mu Ntara y’Uburasirazuba hatanzwe abakandida 27 hemererwa 25. Muri iki cyiciro hazatorwamo abagore 24; ku buryo Umujyi wa Kigali uzagira 2; Intara y’Uburengerazuba 6, iy’Amajyaruguru 4, iy’Amajyepfo 6 na ho Intara y’Uburasirazuba na yo itange 6.

Mu cyiciro cy’urubyiruko abatanze kandidatire ni 24 hemejwe by’agateganyo 21. Na ho mu cyiciro cy’abafite ubumuga hatanze kandidatire 17, abemerewe by’agateganyo ni 10.

Abakandida batemerewe Perezida wa Komisiyo y’Igihugu y’Amatora, Prof Kalisa Mbanda atangaza ko bafite amahirwe yo gutanga ibyangombwa bibura bitarenze ku wa 18 Kanama kuko Lisiti ndakuka izemezwa ku wa 19 Kanama 2013. Abo batemerewe atangaza ko byatewe n’uko ibyangombya byabo basanze bituzuye.

Ku kibazo kirebana n’Ishyaka Democratic Green Party of Rwanda, yavuze ko hakongerwa igihe cyo gutanga Kandidatire kugira ngo na ryo rigire amahirwe yo kwiyamamaza, Perezida wa Komisiyo y’igihugu y’amatora yatangaje ko iryo ritigeze ribisaba kandi iyo binabaho bitari byoroshye ko bishoboka. Ati "Buri gikorwa kigira igihe cyacyo, iyo babisaba nta cyizere ko byari gupfa gushoboka."

Ku birebana n’uko hari igice cya PS Imberakuri kivuga ko gihagarariwe na Ntaganda, aho bavuga ko batanze Kandidatire zikangwa, Perezida wa Komisiyo y’Igihugu y’Amatora yatangaje ko PS Imberakuri yemewe n’amategeko ari iyobowe na Mukabunani Christine kandi byanditse mu mategeko, abo bandi bakoresha itegeko ryasheshwe.

[email protected]