Hagaragajwe uko guhera mu 1959 hashinzwe ibinyamakuru byinshi byo kubiba amacakubiri mbere ya za ‘Kangura’

Yanditswe na Twarabanye Venuste
Kuya 11 Mata 2020 saa 07:30
Yasuwe :
0 0

Umunyamabanga Nshingwabikorwa wa Komisiyo y’igihugu yo kurwanya Jenoside (CNLG) Dr. Bizimana Jean Damascene yavuze ko ikinyamakuru cyitwaga ‘Ijwi rya rubanda rugufi’ cyasohotsemo amategeko 10 y’abahutu aricyo cya mbere cyatangiye kubiba urwango mu banyarwanda.

Guhera mu 1956 amashyaka ya Politiki yakoraga nk’amashyirahamwe, yaje kwemererwa gukora ku mugaragaro nk’amashyaka ya Politiki muri Gashyantare 1959.

Ayo mashyaka yatangiye gushinga ibinyamakuru kugira ngo biyafashe gutambutsa ibitekerezo byayo.

Mu kiganiro ku ruhare rw’Itangazamakuru muri Jenoside yakorewe Abatutsi, Dr. Bizimana Jean Damascene yavuze ko muri ibyo binyamakuru hashinzwemo ‘Ijwi rya rubanda rugufi’ cyari icya APROSOMA (Association pour la promotion sociale de la masse, APROSOMA) naho Parmehutu ishyiraho icyitwaga ‘Jya mbere’.

Ibyo binyamakuru byombi byakanguriye Abahutu kwanga no kwica Abatutsi. Dr Bizimana avuga ko mu nyandiko za mbere zirimo iyo ku wa 27 Nzeri 1959 y’Ijwi rya rubanda rugufi yasohotsemo amategeko 10 y’Abahutu.

Ni amategeko Gitera Joseph yavugiye mu nama (mitingi) y’ishyaka rye ndetse yamaze kuyandika muri icyo kinyamakuru ahita atangira kugikwirakwiza uwo munsi.

Mu kukigeza ku bantu benshi ngo yahoranaga isakoshi yajyanaga mu misa igihe abantu basuhuzanya ihumuje akagenda akibaha. Banakoreshaga iposita ya Kiliziya gatolika yitwa ‘Courier missionaire’.

Ayo mategeko yigishaga urwango akavuga koo umuhutu n’umututsi badashobora kubana, gusangira cyangwa kugirana indi mishyikirano.

Ati “Icyo Kinyamakuru rero tugomba kukivuga kuko nicyo kinyamakuru cya mbere, cyatangiye kubiba urwango ku mugaragaro.”

Uretse ayo mategeko 10 y’Abahutu Gitera yasohoye, yanasohoye indi nyandiko ibwira abahutu uko bagombaga kwitwara mu gihe cy’amatora dore ko hari ayari ari gutegurwa mu mezi atatu yari gukurikira mu Ukuboza. Yasabaga ko batora Abahutu, bakanga abatutsi n’abahutu babanye neza n’Abatutsi.

Ati “Murumva ko Kangura tujya tuvuga ngo niyo yatangiye kwigisha urwango nyamara siyo ni Ijwi rya rubanda rugufi.”

Itangazamakuru rishinjwa kugira uruhare rukomeye cyane mu gushishikariza abahutu kwica abatutsi ndetse mu gihe cya Jenoside abanyamakuru barangaga aho Abatutsi banyuze bahunga cyangwa bihishe.

Uretse ibyo binyamakuru hari Radiyo RTLM. Yatangiye kuvuga ku wa 8 Nyakanga 1993 ariko yagize uruhare rugaragara muri Jenoside hagati ya Mata na Nyakanga 1994.

Iyi radiyo yumvwaga n’abaturage benshi cyane, byatumye ikwirakwiza urwango mu buryo bworoshye. Mu bintu byatumye ubwicanyi bugira imbaraga kandi bugakwirakwira vuba, harimo amagambo y’ikangura yavugirwaga kuri iyi Radiyo.

Dr. Bizimana Jean Damascene yagaragaje uko guhera mu 1959 hashinzwe ibinyamakuru byinshi byo kubiba amacakubiri mbere ya za ‘Kangura’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .