Mu kwamamaza abakandida b’Umuryango FPR Inkotanyi, bahatanira kujya mu nteko ishinga amategeko, mu matora ateganyijwe ku wa 16 Nzeri 2013, abaturage b’Umurenge wa Kimihurura bizezwa ko iterambere ry’umuturage ari ryo riri ku isonga.

Mu gikorwa cyo kwamamaza abakandida depite mu matora atreganyijwe ku wa 16 Nzeri, ku gicamunsi cyo ku cyumweru tariki ya 8 Nzeri 2013, Umuryango FPR Inkotanyi wamamaje abakandida bawo ku mashuri ya Rugando, Umurenge wa Kimihurura, Akarere ka Gasabo.

Igikorwa cyitabiriwe n’abaturage baturutse mu tugari twa Kimihurura, Kamukina na Rugando bagejejweho imigabo n’imigambi ya FPR INkotanyi, ibikorwa Umuryango umaze kubageza cyane cyane imiyoborere myiza, ibishingiye ku bukungu, ubutabera, imibereho myiza y’abaturage n’iterambere.

Uwari uhagarariye ubuyobozi bukuru bwa FPR Inkotanyi muri icyo gikorwa, Senateri Gakuba Jeanne d’Arc akaba na Komiseri mu muryango ku rwego rw’igihugu, yatangaje ko icyo FPR ishyize imbere ari uko iterambere ry’abaturage rikomeza gushyigikirwa kuko ari yo ntego nyamukuru, hibandwa cyane cyane ku rubyiruko no ku batishoboye.

Avuga ko hazakomeza gushyigikirwa ibikorwa byagezweho kandi hagaharanirwa iterambere ry’igihugu rigera kuri bose, hashingiwe ku miyoborere myiza, ubukungu, ubutabera n’imibereho myiza y’abaturage.

Uretse abaturage bo mu murenge wa Kimihurura iki gikorwa cyitabiriwe na bamwe mu bakandida ba FPR Inkotanyi barimo Sheikh Saleh Habimana, Rwaka Pierre Claver, Karenzi Theoneste na Murumunawabo Cecile.

[email protected]