Umwanditsi akaba n’umushakashatsi Georgianne Nianeber yibaza niba bishoboka gushyigikira ibiganiro hagati y’amatsinda ashyamiranye, nyuma ugafata icyemezo ko rimwe rigabwaho ibitero?. Tutagiye kure iri tsinda rivugwa ni umutwe wa M23 urwanya Repubulika iharanira Demokarasi ya Congo (RDC). Ibitero bivugwa hano ni ingabo z’umutwe udasanzwe washyizweho mu kubungabunga amahoro n’umutekano mu burasirazuba bwa Congo Kinshasa.

Mu gitekerezo kigaragara ku rubuga rwa huffingtonpost, Umwanditsi Nianeber avuga ko igikorwa kigiye kubera muri Congo kizubura amakimbirane hagati y’abanyafurika ubwabo. Abanyafurika batanzweho igitambo na Loni bagera ku 3000 baturutse mu bihugu bitandukanye birimo Afurika y’Epfo, Tanzania, Malawi na Mozambique; bikazaba bitoroshye igihe bazatangira guhangana n’imitwe yitwaje intwaro iherereye mu Burasirazuba bwa RDC.

Akomeza avuga ko hashize imyaka 19 habaye Jenoside yakorewe Abatutsi mu Rwanda, iba Loni yarayirebereye ihitamo kwicecekera. Ahangaha akavuga ko ari na byo irimo gukora kuko yirengagije ukuri ku bibera muri Congo.

Umwanditsi avuga ko Loni hari icyo itakoze mu 1994 ariko noneho aho bigeze igomba guhagarika ibikorwa byo kuryanisha Abanyafurika, ibasaba kujya kumena amaraso y’abavandimwe babo muri Congo.

Nubwo bivugwa ko mu Burasirazuba bwa Congo habarirwa imitwe yitwaje intwaro irenga 30, abenshi mu bakurikirana hafi ibibera muri icyo gihugu bemeza ko umutwe w’ingabo za Loni icyo ugamije ari ukurandura umutwe wa M23 gusa.

Umwanditsi avuga ko umwanzuro Loni uvuga ko ugamije kugarura amahoro mu karere, M23 yari yaratangiye kuwushyira mu bikorwa kera, kuko yahoze ihangana n’imitwe yitwaje intwaro irwanya Leta z’ibihugu byo mu karere.

Loni irataba ukuri

Avuga ko byiyongereye ku gikorwa cya Loni cyo gutaba cyangwa se guhamba ukuri “To bury the Truth”, ubu igiye gukingura imiryango y’imva z’Abanyafurika benshi bazapfira mu ntambara zigiye kubera mu karere.

Ati “Ibihugu bitanu bihoraho mu kanama ka Loni gashinzwe umutekano (u Bushinwa, u Bufaransa, u Burusiya, u Bwongereza, na Leta zunze Ubumwe za Amerika) ntacyo bizahomba keretse u Rwanda na Moroke, abanyamuryango badahoraho mu kanama ka Loni gashinzwe umutekano bazahura n’ingaruka kuko bakomoka ku mugabane w’Afurika.

Uyu mwanditsi Georgianne Nianeber mu gitekerezo cye yanditse yifashije ibitekerezo by’abantu batandukanye, ntiyemeranya n’intambara zigiye kubera mu karere. Yifashishije ibitekerezo by’umunyamakuru wo muri Uganda Andrew Mwenda, Georgianne avuga ko Raporo y’impuguke za Loni yigeze gukorwa ari yo nyirabayazana w’izo ntambara.

Amagambo ya Andrew Mwenda umwanditsi yakoresheje, agira ati “ Urugero, mu ntangiriro z’umwaka ushize, itangazamakuru mpuzamahanga (Amerika n’u Burayi) ryatangije intambara ya ntagatifu ‘Jihad’ yo kurwanya Perezida Paul Kagame w’u Rwanda. Uruganda rucura intwaro (zakoreshwaga muri iyo ntambara) ni raporo y’impuguke za Loni yashinjaga u Rwanda gutera inkunga umutwe wa M23 uhanganye na Perezida wa Congo, Joseph Kabila.” Uwo mwanditsi avuga ko iyo raporo ivugwa yanditswe n’abo twakwita abacengezamatwara “Propagandists”, bafite icyo bagamije kugeraho.

Abandi bavuga ko hari igishaka kugerwaho, harimo Perezida w’Afurika y’Epfo uherutse kuvuga ko abona hari ibihugu biva hanze y’umugabane w’Afurika, bigamije gutembagaza Leta zo muri Afurika yo hagati ndetse no muri Repubulika iharanira Demokarasi ya Congo.

Umukaraza mukuru w’intambara zo mu karere

Georgianne Nianeber avuga ko umuryango uharanira uburenganzira bwa muntu “Human Rights Watch”, ari umukaraza mukuru (Principal drumbeater) w’intambara zo mu karere. Ikindi ni uko ibihugu byo mu kanama ka Loni gashinzwe umutekano byo byafashe umwanzuro wo kohereza Abanyafurika kurwanya Abanyafurika bigendeye ku murongo wa “Human Right Watch.”

Gusa ariko nubwo abo banyafurika bagiye kurwanya bene wabo, guhangana n’umutwe wa M23 bishobora kutaborohera kuko ikibuga cy’intambara ukizi neza. M23 izi amayeri y’ingabo za Congo waranazitsinze ubwo wafataga Goma.

Nianeber agira ati “Nk’uko byakomeje kuvugwa, n’ubundi ingabo z’Afurika y’Epfo n’iza Tanzania niziramuka zitsinzwe bazongera bavuge ko u Rwanda rubyihishe inyuma.” Akomeza avuga ko kugira ngo wenda bitazaba wabona ari yo mpamvu u Rwanda rwashyize umukono ku mwanzuro wa 2098 wo kohereza ingabo muri Congo. Ibi byose begereka ku Rwanda babikora bagamije guharabika urugamba rw’uko u Rwanda ruhangana no kwiyubaka nyuma ya Jenoside yakorewe Abatutsi mu mwaka wa 1994.

Mu mpera z’igitekerezo Georgianne Nianeber yibaza impamvu nta muryango uharanira uburenganzira bwa muntu urahaguruka ngo ugire icyuvuga ku gitambo cy’Abanyafurika 3000, Loni igiye gutamba igamije kurengera inyungu z’Abanyaburayi.