Loni yatangaje ko niba leta ya Repubulika Iharanira Demokarasi ya Congo itirukanye abasirikare bakuru babiri bazayobora ibitero birandura umutwe wa FDLR ngo ibasimbuze abandi bitarenze ku ya 13 Gashyantare 2015, izahita ihagararika inkunga yageneraga ingabo za Congo mu kurwanya FDLR .

Abasirikare basabwe kwirukanwa ni Jenerali Bruno Mandevu uyoboye ingabo za Congo byatangajwe ko zigiye kurwanya FDLR na mugenzi we banganya ipeti, Fall Sikabwe, bavugwaho ubugizi bwa nabi..

Abasirikare ba Congo bazatera FDLR bayobowe n'abajenerali b'inkoramaraso

Ibiro Ntaramakuru by’Abongereza dukesha iyi nkuru byatangaje ko abo basirikare bakuru baregwa ibyha byibasiye inyokomuntu, Loni ikanga ko bagabye ibitero kuri FDLR bakwica abasivili.

Ingabo z’icyo gihugu, FARDC zisanzwe ziterwa inkunga na Loni ndetse yanoherejeyo abasirikare bayo basaga ibihumbi 20 (MONUSCO) bagiye kubungabungayo amahoro.

Minisitiri w’Ububanyi n’Amahanga wa Congo, Raymond Tshibanda, yari yatangaje ko izi ngabo zagombaga kugaba ibitero kuri FDLR ku wa kane w’icyumweru cyashize.

Mu minsi ishize Leta ya Congo Kinshasa yasohoye itangazo rivuga ko yatangije ibitero kuri uyu mutwe, ibi ariko bikabonwa na bamwe ko ari uburyo bwo gushimisha amahanga.

Muri Nyakanga 2014, ICGLR na SADC byahaye FDLR itariki ntarengwa ya 2 Mutarama 2015 kuba yashyize intwaro hasi ku neza, itabikora hakitabazwa ingufu za gisirikare, uyu mutwe ntiwabikora, iyo tariki irenzeho ukwezi kose.

[email protected]