Kwamamaza abakandida depite b’ishyaka riharanira Demokarasi n’imibereho myiza y’abaturage (PSD), mu Karere ka Ngoma byatangiriye mu murenge wa Jarama ku wa kabiri tariki 27 Kanama 2013.

Iki gikorwa cyitabiriwe n’abarwanashyaka batandukanye baturutse mu mirenge igize Akarere ka Ngoma, abakandida depite ba PSD hamwe na bamwe mu bayobozi bakuru b’iri shyaka bari baturutse ku rwego rw’igihugu.

Nk’uko byagarutsweho mu magambo atandukanye, hibukijwe ko gutora PSD ari ugutora Ubutabera, Ubwisungane, n’amajyambere.

Bamwe mu barwanashyaka ba PSD bo mu karere ka Ngoma, batangarije IGIHE ko bishimira ko ubu babonye ubwisungane mu kwivuza, bakaba bivuza bo n’imiryango yabo ku buryo bworoheje, kandi iki gitekerezo cyo gushyiraho iyi gahunda kikaba cyarazanywe na PSD.

Bakomeza basaba abakandida depite ba PSD bagiye guhatana n’indi mitwe ya politiki yemewe mu Rwanda, ko mu gihe bazaba babatoye kuzahagarira abanyarwanda mu nteko ishinga amategeko, bagomba kujya begera abaturage, bakabagezaho ibikorwa by’ibanze bakeneye kandi byihutirwa kurusha ibindi, kugira ngo babakorere ubuvugizi bityo bishyirwe mu bikorwa.

Mukakanyamugenge Jacqueline Visi Perezida wa kabiri w’ishyaka PSD, wari umushyitsi mukuru, yatangaje ko mu byo iri shyaka rishyize imbere harimo kugabanya ubukene mu banyarwanda, iterambere rikagera kuri bose nta n’umwe usigaye inyuma, buri muturage agakomeza kugira uruhare mukongera umusaruro w’ibyo akora.

Akomeza avuga ko abana bose b’u Rwanda bagomba kujya mu ishuri bagahabwa uburere nyabwo bukwiriye umwana w’umunyarwanda, na ho Demokarasi, yo igomba gushinga imizi mu tugari twose tugize igihugu, hakagaragara imitwe ya politiki itandukanye kandi igakorana neza nta muvundo.
Abakandida depite bari bahari bahawe umwanya, maze berekana ko gutora PSD ari Ugushimangira imibereho myiza n’iterambere.